Read Kapampangan Numbers 2 Bible Online

Numbers 2 - Kapampangan bible

Numbers 2

¹Nganang migsalita ning Ginu kang Moises at Aaron,

²Sukat lang magkampu ring Israelita king lugal ning karelang tribu at lalam na ning karelang bandera. Italakad da la ring tolda ra king makapadurut ning Toldang tuknangan ku, ing Ginu.

³King dane aslagan, arapan na ning Toldang tuknangan ku, ing Ginu, karin ya manalakad tolda ing tribu nang Juda lalam nang pamamahala ning pamuntuk nang i Nason a anak nang Aminadab.

⁴Pitu lang pulu't apat a libu at anam a ralan a kabilangan ding makasadiang makilaban.

⁵Katuki na ning Juda ya ing tribu nang Isacar lalam nang pamamahala ning pamuntuk nang i Netanel a anak nang Zuar.

⁶Lima lang pulu't apat a libu at apat a ralan ding makasadiang makilaban.

⁷Ing tutuki ya ing tribu nang Zebulun lalam nang pamamahala ning pamuntuk nang i Eliab a anak nang Helon.

⁸Lima lang pulu't pitung libu at apat a ralan ding makasadiang makilaban.

⁹Heganagana, dinalan walung pulu't anam a libu at apat a ralan la ding king kampu nang Juda a makasadiang makilaban. Ila ring miyatasan mumunang magmartsa king paglakbe ra.

¹⁰King dane mauli ne man manalakad tolda ing tribu nang Ruben lalam nang pamamahala ning pamuntuk nang i Elizur a anak nang Sedeur.

¹¹Apat lang pulu't anam a libu at limang dalan ding makasadiang makilaban.

¹²Katuki na ning tribu nang Ruben ya ing tribu nang Simeon lalam nang pamamahala ning pamuntuk nang i Selumiel a anak nang Zurisadai.

¹³Lima lang pulu't siam a libu at atlung dalan ding makasadiang makilaban.

¹⁴Ing tutuki ya ing tribu nang Gad lalam nang pamamahala ning pamuntuk nang i Eliasaf a anak nang Reuel.

¹⁵Apat lang pulu't limang libu at anam a ralan limang pulu ding makasadiang makilaban.

¹⁶Heganagana, dinalan limang pulu't metung a libu at apat a ralan limang pulu la ding makasadiang makilaban king kampu nang Ruben. Ila ring miyatasan kaduang magmartsa king paglakbe ra.

¹⁷Pilatan da reting aduang tapuk at ding tauling adua ila ring Levita. Ila ring tutuking magmartsa kaybat deng kelagan ing telakad dang Toldang tuknangan ku, ing Ginu. Lumakad la ring tribu agpang king karelang pamitukituki at lalam ning karelang bandera.

¹⁸King dane albugan ya manalakad tolda ing tribu nang Efraim lalam nang pamamahalang Elisama a anak nang Amiud. Karin dia naman italakad ing bandera da.

¹⁹Apat lang pulung libu at limang dalan ding makasadiang makilaban.

²⁰Katuki ning tribu nang Efraim ya ing tribu nang Manase lalam nang pamamahala ning pamuntuk nang i Gamaliel a anak nang Pedazur.

²¹Atlu lang pulu't aduang libu at aduang dalan ding makasadiang makilaban.

²²Katuki na ning tribu nang Manase ya ing tribu nang Benjamin lalam nang pamamahala ning pamuntuk nang i Abidan a anak nang Gideoni.

²³Atlu lang pulu't limang libu at apat a ralan ding makasadiang makilaban.

²⁴Heganagana, dinalan walung libu at dinalan a katau la ring makasadiang makilaban king kampu nang Efraim. Ila ring katlung tapuk a miyatasan magmartsa king pamaglakbe ra.

²⁵King dane norti ya manalakad tolda ing tribu nang Dan lalam nang pamanimunang Aiezer a anak nang Amisadai. Karin dia naman italakad ing bandera da.

²⁶Anam lang pulu't aduang libu at pitung dalan ding makasadiang makilaban.

²⁷Ing katuki nang manalakad tolda ya ing tribu nang Aser lalam nang pamanimunang Pagiel a anak nang Ocran.

²⁸Apat lang pulu't metung libu at limang dalan ding makasadiang makilaban.

²⁹Kaybat ing tribu nang Neftali lalam nang pamanimunang Aira a anak nang Enan.

³⁰Lima lang pulu't atlung libu at apat a ralan ding makasadiang makilaban.

³¹Iting grupu nang Dan ya ing tauling magmartsa king pamaglakbe ra. Heganagana, dinalan limang pulu't pitung libu la at anam a ralan.

³²Ing kabilugan a bilang da ring sablang Israelitang milista king sensus: anam a ralan atlung libu at limang dalan limang pulu.

³³E la kabilang kareti ding Levita, agpang king inutus na ning Ginu kang Moises.

³⁴Makanyan da ngang tiparan ding memalen na ning Israel ing sablang inutus na ning Ginu kang Moises. Menalakad lang tolda lalam ning sarasarili dang bandera karing pipagkampuan da, at migmartsa king paglakbe ra agpang king sarasarili dang tribu.