Read Kapampangan Numbers 24 Bible Online

Numbers 24 - Kapampangan bible

Numbers 24

¹Apansinan nang Balaam king talagang buri neng bendisyunan ning Ginu ing Israel. Inya e ne linawe pang lugal at tanda a pipagbatayan king ula na. Minarap ya king disyerto

²at ikit na la ring Israelita a makakampu agpang king karelang tribu. At dinatang ya kang Balaam ing espiritu na ning Dios,

³inya migsalita yang ula. Ngana: Iti ya ing ula nang Balaam a anak nang Beor, ing kapasiagan ning taung mibuklat a mata,

⁴ning makiramdam king sasabian na ning Mayupayang Dios, ing manakit king vision a parala na ning Mayupaya; milugmuk ku, oneng mibuklat la ding kakung mata.

⁵Kasanting da, O Israel, ding kekang tolda; kalagu rang lalawan ding kekang tuknangan!

⁶Mengari la karing malualas a kapatagan, kalupa da la ring hardin king lele ning ilug o ding tanaman a mabanglung tenam ning Ginu, at ding tanaman a sedro lele ning danum.

⁷Magus ing danum karing datukanan na, at tumubu lang bini na karing lugal da ring miparanuman ban ari na maging mas maragul ya kang Agag, at laganap yang kayarian na.

⁸Liwal na la ning Dios king Ehipto; anti ya king malyap a torong makilaban para karela, laklakan na lang kalaban na, pamaklian na lang butul da at pati na ding paslu ra.

⁹Balamu leon ya neng magkera ya; mengari yang babaing leon a pikakunuan mung gisingan. Misaplala la detang panuan keka at misumpa detang maniumpa keka.

¹⁰Inya mikaluku ing mua nang Balak kang Balaam; durugdug na la ring gamat na. Ngana kang Balaam, Inaus da ka ban paniumpa mu la ring kalaban ku, ba't binendisyunan mo pang mekatatlung besis?

¹¹Sulung, muli na ka keta kekayu! Pengaku ku pa mo ing parangalan da ka, oneng sebat na iti ngeni ning Ginu.

¹²Nganang Balaam kang Balak, Sinabi ku na karing kekang tinubud kanaku

¹³king agyang ibie mu ngan kanaku ing pilak at gintu ning palasyu mu e ku mu rin labagan ing utus ning Ginu. Ala kung akarapat, mayap man o e mayap, king sarili ku; ita mung pasabi na ning Ginu ya ing malyari kung sabian.

¹⁴Nganang Balaam kang Balak, Muli na ku keta kekami, pero bayu ku mako, sabian ku keka nung nanu ing daptan da king daratang a panaun ding memalen na ning Israel karing taung sasakupan mu.

¹⁵At migsalita yang ula. Ngana: Iti ula neng Balaam a anak nang Beor, ing ula ning taung mibuklat a mata,

¹⁶ing ula ning makaramdam karing amanu na ning Dios at makaintindi king kabiasnan na ning Kakataskatasan. Akakit ku karing kakung mata ing metung a vision a ibat king Dios a Mayupaya.

¹⁷Akakit ke, oneng ali ke ngeni; akakit ke, oneng e king malapit. Ating metung a batuin a lunto king Israel, at talakad ya karin ing metung a setro; ya ing lumaso karing buntuk nang Moab at gumisan karing sablang anak nang Set.

¹⁸Bihagan ne ing kalaban nang i Edom, ing Seir antimu rin. Ing Israel darapat ya king katapangan.

¹⁹Sakupan na la ngan ning Israel at lasawan ne ing mitagan a miligtas siudad.

²⁰Linawe ya kang Amalek at kaybat megumpisa yang migsalitang ula. Ngana: Ing Amalek ya ing peka mayupayang bansa, oneng kasiran ing maging kawakasan na.

²¹Linawe ya karing Keniteo at kaybat megumpisa yang migsalitang ula. Ngana: Matibe ya ing kekong tuknangan, uling batu ing katatalakaran na,

²²makanyan man, ikong Keniteo mawalan kong kabaldugan. E lumuat mabihag kayu kang Asur.

²³Ngana pang Balaam, Ah, ninu kaya ing mitagan mabie potang daptan ning Ginu ite?

²⁴Datang la ring barku ning Kitim ban lupigan ing Asur at ing Eber, oneng kaybat ila naman ding masintang.

²⁵Kaybat na nita, tinalakad ya i Balaam at minuli ya keta karela. Minuli nia naman i Balak.