Read Kapampangan Numbers 25 Bible Online

Numbers 25 - Kapampangan bible

Numbers 25

¹Inyang migkampu la ding Israelita king Sitim, mekipangatawan la ding lalaki da karing babaing Moabita.

²Deti namang babai inagkat da lang munie ain-sakripisyu karing kikilalanan dang dios. Inya mengan la at sinamba karing kikilalanan dang dios da ring Moabita.

³Mikaluku ing mua ning Ginu karing Israelita uling sinamba la kang Baal ning Peor.

⁴Inya ngana ning Ginu kang Moises, Kuanan mu la ngan ding manimuna ning Israel at kaybat ipabite mu la king arapan ku at king akakit da ring tau ban milako ing milalablab kung mua king Israel.

⁵Nganang Moises karing pamuntuk, Paten yu la ding sabla yung lalaki a sinamba king Baal ning Peor.

⁶Kabang manangis la ding memalen arap ning Toldang tuknangan ning Ginu, dinatang ya ing metung karing Israelita a ating kayabe babaing Midianita, at king akakit da linub ne king toldang tuknangan na.

⁷Inyang ikit na iting Fineas a anak nang Eleazar at apu nang Aaron a pari, tinalakad ya at kinangwa yang tandus.

⁸Tikian na la king tolda at tindus na la king atian. Inya tinuknang ing salut a makamate karing memalen na ning Israel.

⁹Makanyan man, adua lang pulu at apat a libu pa mu rin ding mete king salut.

¹⁰Ngana ning Ginu kang Moises,

¹¹E na ku mua uli na ning depat nang Fineas a anak nang Eleazar at apu nang Aaron a pari, uling e na peintulut ing ating sambang aliwang dios subali kanaku. Inya e ku la pete king mua ku ring memalen na ning Israel.

¹²Sabian mu kang Fineas king gagawan keng kayabe na ing metung a kasunduan a manatili king kapilan pa man.

¹³Manatili ya kang Fineas at karing lahi na ing panga-pari uling e na peintulut ing mika karibal ku at ginawa yang paralan ban mipatawaran ing kasalanan da ring memalen na ning Israel.

¹⁴Ing Israelitang migdalang babaing Midianita at pete na king tandus Fineas ya i Zimri. Anak neng Salu, ing metung karing manimuna na ning tribu nang Simeon.

¹⁵Ing babai naman a mete kayabe nang Zimri ya i Cozbi. Anak neng Zur, ing metung karing manimuna da ring Midianita.

¹⁶Kaybat na nita, migsalita ya ing Ginu kang Moises. Ngana,

¹⁷Guluan yu lang alang patugut ding Midianita at paten yu la,

¹⁸uling megulu kayu king pamaglinlang da kekayu at mitake kayu king pamanyamba king Baal ning Peor at uli nang Cozbi a mepate king tandus kanitang dinatang ing salut king Peor.