Read Kapampangan Numbers 28 Bible Online

Numbers 28 - Kapampangan bible

Numbers 28

¹Nganang migsalita ning Ginu kang Moises,

²Iyutus mu karing memalen na ning Israel king miyain lang ain kanaku; ain-a-pamangan king mitakdang panaun. Babie tula kanaku, ing Ginu, ing bau da reting ain.

³Oreti ding ain a iyain da kanaku aldo-aldo: aduang lalaking biserung tupa at alang dipektu.

⁴Iyain ya ing metung kareti neng abak at ing kadua neng sisilim na.

⁵Abayanan yang atlu at kapitnang litrung arina a sinamut king atlung litrung larung olibo.

⁶Iti ya ing aldo-aldo yung ain-a-durulukan a pegumpisan yu karin king Bunduk ning Sinai. Babie tula kanaku, ing Ginu, ing bau na niti.

⁷Magdala kayu namang metung at kapitnang litrung katas ubas bilang ain-a-inuman king balang metung at metung karing tupa. Itugtug iti king Banal a Lugal para kanaku, ing Ginu.

⁸Iyain ya ing kaduang tupa neng sisilim na at ing ain-a-pamangan ampon ain-a-inuman. Dulukan munaman iti at babie tula kanaku, ing Ginu, ing bau na niti.

⁹Neng Aldo ning Sabbath, aduang lalaking tupa a pabanua tua at alang dipektu ing iyain yu. Abayanan ya iti king ain-a-binutil at ain-a-inuman. Aduang kilung arina a sinamut king larung olibo ing ain-a-binutil.

¹⁰Iti ya ing iyain yu neng Aldo ning Sabbath, subali pa ketang aldo-aldo yung ain-a-durulukan, ain-a-pamangan, at ain-a-inuman.

¹¹King mumunang aldo ning balang bulan miyain kayung ain-a-durulukan kanaku, ing Ginu. Ini ing iyain yu: aduang biserung toro, metung a lalaking tupa, at pitung lalaking tupa a pabanua tua. Sukat la ngang alang dipektu.

¹²Miyain kayu namang ain-a-binutil king kapamilatan na ning atlung kilung arina a sinamut king larung olibo para king balang toro; aduang kilu para king balang metung a lalaking tupa

¹³at metung a kilung mapinung arina a sinamut king laru para king balang metung a lalaking tupa. Babie tula kanaku, ing Ginu, ing bau na niting ain-a-pamangan.

¹⁴Aduang litru ing ain-a-inuman king balang toro, aduang litru king balang lalaking tupa, at kulang king metung a litru king balang biserung tupa. Iti ing iyain yu king mumunang aldo ning balang bulan kilub ning pabanua.

¹⁵Subali pa kareting aldo-aldo ain-a-durulukan, miyain kayu namang metung a lalaking kambing bilang ain-a-kapamayaran-king-kasalanan.

¹⁶Ing kalabing apat nang aldo ning mumunang bulan ya ing Piesta ning Pamaglagpus a pagselebran bilang pakundangan king Ginu.

¹⁷Magumpisa ya ing piesta king kalabing limang aldo ning bulan at angga yang pitung aldo; tinape alang lebadura ing malyari yu mung kanan karing aldo reta.

¹⁸King mumunang aldo ning piesta, mitipun kayu ban samba. E kayu magobra king aldong iti.

¹⁹Miyain kayung ain-a-durulukan bilang ain-a-pamangan king Ginu: aduang biserung toro, metung a lalaking tupa, at pitung lalaking tupa a pabanua tua. Sukat la ngang alang dipektu.

²⁰Abayanan yeng ain-a-binutil: atlung kilung arina a sinamut king larung olibo king balang toro; aduang kilu king balang lalaking tupa,

²¹at metung a kilu king balang biserung tupa.

²²Miyain kayu namang metung a lalaking kambing para ain-a-kapamayaran-king-kasalanan da ring memalen.

²³Iyain yu la ngan deting ain kayabe ding aldo-aldo yung ain neng abak.

²⁴King makanyan a paralan kayu miyain ain-a-durulukan kilub da ring pitung aldo. Babie tula kanaku, ing Ginu, ing bau na niting ain. Iyain yu iting kayabe ning aldo-aldo yung ain.

²⁵King kapitung aldo, mitipun kayung pasibayu ban samba. E kayu magobra king aldong iti.

²⁶King mumunang aldo na ning Piesta ning Pamamupul, potang iyain yu na ing bayung trigu king Ginu, mitipun kayu ban samba. E kayu magobra king aldong iti.

²⁷Iyain ye ing ain-a-durulukan: aduang biserung toro, metung a lalaking tupa, at pitung lalaking biserung tupa a pabanua tua. Babie tula kanaku, ing Ginu, ing bau na niting ain.

²⁸Abayanan yu lang ain-a-binutil: atlung kilung arina a sinamut king larung olibo king balang toro; aduang kilu king balang lalaking tupa,

²⁹at metung a kilu king balang biserung tupa.

³⁰Miyain kayu namang metung a lalaking kambing para ain-a-kapamayaran-king-kasalanan da ring memalen.

³¹Sukat la ngan alang dipektu reti. Iyain yu iting at ning ain-a-inuman subali pa karetang aldo-aldo ain yu.