Read Kapampangan Numbers 31 Bible Online

Numbers 31 - Kapampangan bible

Numbers 31

²Mablas ka karing tau Midian uli na ning depat da karing memalen na ning Israel. Kaybat na nita, mate na ka.

³Inya nganang Moises karing tau, Magsadia na kayu para king pamakilaban karing tau Midian ban matupad na ing pamanablas na ning Ginu karela.

⁴Padala yang libu kataung pakasandata ing balang tribu.

⁵Inya peparala yang libung lalaking makasadiang makilaban ing balang tribu. Heganagana, labi lang aduang libu.

⁶Tinubud na lang Moises ban makilaban lalam nang pamanimunang Fineas a anak nang Eleazar a pari. Darala na la ding sagradung kasangkapan na ning santuaryu at ding trumpeta a gamitan king pamaniaus king pamakilaban.

⁷Lisuban de ing Midian, antimo ing inutus na ning Ginu kang Moises, at pete da la ngan ding lalaki,

⁸at ding limang ari na ning Midian: i Evi, i Rekem, i Zur, i Hur, at i Reba. Pete ria naman i Balaam a anak nang Beor.

⁹Binihag da la ring babai at ding anak at kinua da la ngan ding sese rang animal at pibandian.

¹⁰Kaybat silaban da la ring siudad at ding toldang tuknangan da.

¹¹Kinua ra ngan ing sablang buri dang kuanan antimo ring bihag at animal.

¹²Kaybat dela ra la kang Moises at Eleazar ampon karing memalen na ning Israel a makakampu kanita king kapatagan ning Moab lipat ning Jordan tulid ning Jerico.

¹³Linual la king kampu ri Moises, Eleazar a pari, at ding sablang manimuna na ning balen ban saganan da la ring sundalus a ibat king pamakilaban.

¹⁴Mua ya i Moises karing opisyal a matas a katungkulan angga na karing mababa katungkulan karela.

¹⁵Ngana karela, Obat tinagan yong mabie ding babai?

¹⁶E yu wari balu king ding babaing den ila ring memintu king kausukan nang Balaam ban dapat lang kataksilan ding Israelita laban king Ginu inyang atyu tamu karin Peor? Inya dinatang ing salut king mabilug a balen.

¹⁷Inya paten yu la ring anak a lalaki at babaing talasawa.

¹⁸Pero itagan yu la ring dalaga para kekayu.

¹⁹E kayu pa lulub king kampu yu kilub ning pitung aldo. Ing ninumang kekayung mekapate at mekatagkil mete sukat yang maglinis pati na ring bihag yu king katlu at king kapitung aldo, agpang king aduan ning kautusan.

²⁰Pipian yu ing imalan yu, ing sablang kagamitan a megawa king balat animal, bulbul kambing, at dutung.

²¹Ngana ning paring i Eleazar karing sundalus a ibat king labanan, Iti ya ing tuntunan a inutus na ning Ginu king kapamilatan nang Moises:

²²bukud mung ding bage a e masisilab antimo ing gintu, pilak, tangsu, bakal, lata o tinggaputi ing dalisayan yu king api. Itang malyaring dalisayan king danum karin dalisayan.

²³

²⁴Pipian yu ing imalan yu king kapitung aldo at luminis kayu agpang king aduan ning kautusan. At malyari na kayu kanitang lungub king kampu.

²⁵Ngana ning Ginu kang Moises,

²⁶Ika at ing paring i Eleazar ampon ding manimuna na ning balen ilista yu ing sablang meyakua karing Midianita, antimo ding bihag at ding sese rang animal.

²⁷Gawan yung aduang dake; ing metung a dake para kareta yang mekilaban at ing kadua para karing memalen ya.

²⁸Bilang buis da ring sundalus a mekilaban, kuma kang metung king balang limang dalan a bihag, baka, asno, tupa, at kambing.

²⁹Ibie la reti king paring i Eleazar bilang makabukud a dake ning Ginu.

³⁰King dake da ring memalen, kuma kang metung munaman karing balang limang pulung bihag, baka, asno, tupa, at kambing. Ibie la reti karing Levitang mamahala king Toldang tuknangan ku.

³¹Memintu la ri Moises at Eleazar king inutus na karela ning Ginu.

³²Oyni ing listahan na ning sablang ikua ra at inuli da ring sundalus a mekilaban king Midian subali pa ketang kinua ra para karela: anam a ralan at pitung pulu't limang libung tupa,

³³pitung pulu't aduang libung baka,

³⁴anam apulu't metung a libung asno,

³⁵at atlung pulu't aduang libung babaing e talasawa.

³⁶Miras ing kapitna kareti karing sundalus a mekilaban: atlung dalan atlung pulu't pitung libu at limang dalan a tupa ing miyabie karela,

³⁷at anam a ralan pitung pulu't lima ing dinake ra king Ginu,

³⁸atlu lang pulu't anam a libung baka ding miras karing sundalus a mekilaban, at pitu lang pulu't adua ring dinake ra king Ginu;

³⁹atlu lang pulung libu at limang dalan ding asnong miras karing sundalus a mekilaban, at anam lang pulu't metung ding dinake ra king Ginu;

⁴⁰labi lang anam a libung babaing bihag a e talasawa ding miras karing sundalus a mekilaban, at atlu lang pulu't adua ring dinake ra king Ginu.

⁴¹Inya binie na la ngan Moises kang Eleazar a pari ding dake a mangaintulid king Ginu, agpang king inutus na.

⁴²Itang dake da ring memalen na ning Israel kalupa na bilang nitang miras karing sundalus a mekilaban:

⁴³atlung dalan atlung pulu't pitung libu at limang dalan a tupa,

⁴⁴atlung pulu't anam a libung baka,

⁴⁵atlung pulung libu at limang dalan a asno,

⁴⁶at labing anam a libung bihag a babaing e talasawa.

⁴⁷Keting dake da ring memalen kinangwa yang metung i Moises king balang limang pulung animal o tau, at binie na la karing Levitang mamahala king Toldang tuknangan ning Ginu, agpang king inutus na ning Ginu.

⁴⁸Linapit la kang Moises ding opisyal da ring sundalus a mekilaban king Midian

⁴⁹at ngarang minie ulat: Abilang mi na la pu ring tauan mi at metung man ala pung mete.

⁵⁰Darala mi la pu ring gintung alahas a ikua mi antimo ding pulseras, singsing, tingga, at kwintas. Binie mi la king Ginu bilang pamangilala king pamagligtas na kekami.

⁵¹Tinggap da ri Moises at Eleazar ing darala rang gintu at alahas.

⁵²Maygit apat a ralan a libra ing bayat ning atipun da ring opisyal.

⁵³Selikut da retang e opisyal itang karelang ikua.

⁵⁴Tinggap da ri Moises at i Eleazar a pari ing gintung darala da ring opisyal, at dela ra king Tolda ning Ginu ban manatili na lang ingatan ning Ginu ding memalen na ning Israel. fig,... gintung alahas...,(31:50)fig*