Read Kapampangan Numbers 34 Bible Online

Numbers 34 - Kapampangan bible

Numbers 34

¹Ngana ning Ginu kang Moises,

²Sabian mu at iyutus karing memalen na ning Israel ing maging angganan na ning Canaan, ing gabun a babie ku ban maging bandi yu. Ila reti:

³king dane mauli ya ing ilang ning Zin lele na ning Edom at ing angganan na king dane mauli ya ing wakas ning Dagat a Mete king dane aslagan.

⁴Kaybat liku ya king dane mauli na ning dalan paukiat Akrabim at taglus-taglus ya libutad ning Zin at miyangganan ya king dane mauli ning Kades Barnea. Kaybat liku ya Hazar Adar at dumalan ya lele na ning Azmon.

⁵At liku ya ing angganan na manibat king Azmon papunta king Batis ning Ehipto at mapupus ya king Dagat ning Mediteraneo.

⁶Ing angganan na king dane albugan ya ing Dagat ning Mediteraneo.

⁷Ing angganan na king dane norti ya iti: ing Dagat ning Mediteraneo angga king Bunduk ning Hor,

⁸at manibat karin taglus-taglus ya king dalan palub king Hamat, taglus ya Zedad

⁹at Zifron at miyangganan ya king Hazar Enan.

¹⁰Ing angganan na king dane aslagan manibat ya king Hazar Enan angga ya Sefam.

¹¹Taglus ya mauli na ning Harbel, king dane aslagan ning Ain angga king bunduk-bundukan at dane aslagan na ning pasigan na ning Dagat-dagatan ning Galilea

¹²angga king lele na ning Ilug ning Jordan papunta king Dagat a Mete. Ila deti ring apat a angganan na ning kekayung gabun.

¹³Inya nganang sinabing Moises karing memalen na ning Israel, Iti ya ing gabun a tanggapan yu king kapamilatan na ning bagutan, ing gabun a tituk na ning Ginu karing siam at kapitnang tribu.

¹⁴Tinggap da na ing dake da ring tribu nang Ruben, Gad, at ing kapitna na ning tribu nang Manase ning dane aslagan, agpang karing karelang pamilya.

¹⁵Atyu iti king dane aslagan ning Ilug ning Jordan a kasumangid ning Jerico.

¹⁶Ngana ning Ginu kang Moises,

¹⁷I Eleazar a pari at i Josue a anak nang Nun ila ring mamahala king pangaparti na ning gabun a maging bandi yu.

¹⁸Mamili ka namang metung a manimuna king balang tribu a maging kasaup da.

¹⁹Ila deti ring lalaking mepili: i Caleb a anak nang Jefune ning tribu nang Juda,

²⁰i Selumiel a anak nang Amiud ning tribu nang Simeon,

²¹i Elidad a anak nang Kislon ning tribu nang Benjamin,

²²i Buki a anak nang Jogli ning tribu nang Dan,

²³i Haniel a anak nang Efod ning tribu nang Manase a anak nang Jose,

²⁴i Kemuel a anak nang Siptan ning tribu nang Efraim,

²⁵i Elizafan a anak nang Parnak ning tribu nang Zebulun,

²⁶i Paltiel a anak nang Azan ning tribu nang Isacar,

²⁷i Aihud a anak nang Selomi ning tribu nang Aser at

²⁸i Pedael a anak nang Amiud ning tribu nang Neftali.

²⁹Ila deti ring lalaking pinili na ning Ginu ban sumaup king pangaparti na ning gabun ning Canaan para karing memalen na ning Israel.