Read Kapampangan Numbers 35 Bible Online

Numbers 35 - Kapampangan bible

Numbers 35

¹Inyang atyu la karin king kapatagan ning Moab a malapit king Ilug ning Jordan kasumangid ning Jerico, migsalita ya ing Ginu kang Moises. Ngana,

²Iyutus mu karing memalen na ning Israel king dakayanan da la ring Levita king gabun a tinggap da ban mika siudad lang tuknangan at pipagpastulan.

³Maging karela iting gabun ban panuknanganan da at pipagpastulan karing sese rang animal.

⁴Sukad limang dalan a yarda ya ing pipagpastulan manibat king pader ning siudad at makanyan munaman a sukad karing miyayaliwang direksyun na

⁵ban mika kuadradung lugal a maki sukad metung a libung yarda king balang gilid at ing siudad ya ing atyu king libutad.

⁶Ding anam a siudad a ibie yu karing Levita magamit lang santungan para karing taung mekapate kalupa dang tau king e ra sasarian. Karagdagan kareti, dinan yu la pang apat apulu't aduang siudad.

⁷Heganagana apat lang pulu't walung siudad pati na ring pipagpastulan.

⁸Ibate ing bilang da ring siudad a ibie karing Levita agpang king dagul na o letian na ning dake ning balang tribu. Nung maragul ya ing tinggap na ning metung a tribu, dakal la ring siudad a ibie na; nung malati ya mu, ditak la mu ring ibie na karing Levita.

⁹Ngana ning Ginu kang Moises,

¹⁰Sabian mu karing memalen na ning Israel ing anti kaniti: Potang alipatan yu ne ing Ilug ning Jordan at miras na kayu king gabun ning Canaan,

¹¹mamili kayung siudad a santungan ban apuntalan na ning taung mekapate kalupa nang tau king e na sasarian.

¹²Karin ya salikut kabang e ya malilitis at ban e ne apate ning bisang mablas.

¹³Mamili kang anam a siudad;

¹⁴atlu king dane na ning aslagan ning Jordan at atlu king gabun ning Canaan.

¹⁵Ila deti ring maging siudad a santungan da ring memalen na ning Israel at ding dayuan a pansamantala mu o kaya manatiling manuknangan kekayu a mekapate kalupa rang tau king e ra sasarian.

¹⁶Nung mimua ya ing ninuman at king mua na pelupalu ne king bakal o batu o dutung ing kamuan na at apate ne, mikasala yang pamakamate at sukat yang paten ing mekapate.

¹⁹Ing pekamalapit nang kamaganak ning mete ya ing ating katungkulan paten ne itang mekamate king kamaganak na nu man karin ne akit.

²⁰Nung ing ninuman a ating samang lub king kalupa nang tau at pete ne uli ning siksak ne o tinulak ne o besibas ne

²¹o timbuk ne at kaybat apate ne, mikasala ya at sukat yang paten. Ing pekamalapit nang kamaganak ning mete ya ing ating katungkulan makamate king mekapate king kamaganak na nu man karin ne akit.

²²Nung mekapate yang tau ing ninuman king e na sasarian at ala ne mang mua king apate na agyang tinulak ne o besibas

²³o kaya memasibas yang batu a e pa mu miglalawe at kaybat atin yang tiran a tau at mete ya,

²⁴e ya sukat miyabie iting mekapate karing kamaganak na ning mete. Ing balen ya ing matul agpang king tuntunan a mebanggit na.

²⁵Sukat neng iligtas ning balen iting mekapate ban e ne apate ning pekamalapit nang kamaganak ning apate na king e na sasarian, at ibalik de king siudad a santungan na nung nu ya sinalikut. Karin ya manatili kabang mabie ya ing paring matas dili katungkulan.

²⁶Nung lumual ya king siudad a santungan ing taung mekapate

²⁷at kaybat akit ne ning pekamalapit nang kamaganak ning apate na at pete ne, ala yang pakibatan ing mekamate.

²⁸Itang mekapate at sinalikut king siudad a santungan sukat ya sanang manatili karin at e lulual kabang mabie ya ing pari a matas dili katungkulan. Potang mete ne iting paring matas a katungkulan kanita ya pa malyaring muli king siudad a ibatan na.

²⁹Ila deti ring tuntunan a sukat yung tuntunan at ding lahi yu king kapilan pa man at nu man karin kayu manuknangan.

³⁰Sukat yang paten ing ninumang mekamate kalupa nang tau, agpang king patutu da ring aduang testigu. E ya sukat mate, nung metung ya mu ing magtestigu.

³¹Sukat yang paten ing taung mekamate kalupa nang tau. E na malyaring bayaran salapi ning taung mikasala ing pamakamate na.

³²E kayu tatanggap salapi bilang bayad na ning taung sinalikut king siudad a santungan ban makapagbalik ne keta karela. E ya malyaring mako karin kabang mabie ya ing paring matas a katungkulan.

³³E ye mumusingan ing tuknangan yung lugal. Inya e ye padanakan daya king kapamilatan na ning pamakamate tau, uling mumusingan ne ning pamakamate ing gabun at alang makalinis nung e munaman ing daya na ning pepatulung daya karin.

³⁴E ye sukat dirinatan ing tuknangan yung lugal, uling aku, ing Ginu, manuknangan ku libutad da ring memalen na ning Israel.