Read Kapampangan Numbers 4 Bible Online

Numbers 4 - Kapampangan bible

Numbers 4

¹Nganang sinabi ning Ginu kang Moises at kang Aaron,

²Ilista yu la ngan ding Levitang linto king lahi nang Kohat agpang king karelang pamilya,

³at ding sablang lalaking maki idad nang atlung pulung banua anggang limang pulung banua a malyaring makapagobra king Toldang tuknangan ku.

⁴Ila ring maging talaingat karing bage sagradu na niti.

⁵Potang oras na ban lumipat king aliwang lugal, i Aaron at ding anak nang lalaki ila ring lungub king Tolda ban kalag king tabing arap ning Kaban ning Kasunduan at takpan de ing Kaban kaniting tabing.

⁶Kaybat ibalut de king balat kambing at takpan babo king telang kule asul at saka da na la kanita ibili ring tambayuk karing argolya.

⁷Takpan de king telang kule asul ing lamesang pibibilianan king tinape a yayain king Ginu at karin da la itumpak ding pinggan, ding silyo, ding pidatukanan karing ain, at ding pitsil a pilulanan alak. Sukat parating ating tinape king lamesa.

⁸Takpan da la king imalan a malutu at takpan ne man iti king balat kambing, at kaybat ipalub da la ring tambayuk karing argolya.

⁹Takpan da la king imalan a kule asul ding tumpakan-sulu, ding sulu, ding sipit, ding bandehadu, at ding lulanan laru.

¹⁰Kaybat idatuk da la king lulanan a balat kambing ding kasangkapan at ibili king lulanan a tatambayukan.

¹¹Takpan ya king imalan a kule asul ing gintung altar at takpan ne man iti king balat kambing at ibili la ring tambayuk.

¹²Sukat da la ngan kuanan ding kasangkapan a megamit king kasuyuan king Banal a Lugal, at ibalut la king imalan a kule asul at takpan ne man iti king balat kambing. Kaybat idatuk la king lulanan a tatambayukan.

¹³Kailangan ing ilako ra ing abu king altar at kaybat ibalut de king imalan a kule granati.

¹⁴Itumpak da la kanita babo da reti ding sablang kasangkapan a megamit king kasuyuan king altar antimo ring kawali, sipit, pala, at palanggana. Takpan da la reti king balat kambing at ibili la ring tambayuk.

¹⁵Potang ayari na neng abalut Aaron at ding anak nang lalaki ing Toldang tuknangan ku, ing Ginu, at ding kasangkapan na niti, at miras na ing oras para lumakad, datang la kanita ding pamilya nang Kohat ban ila ring magdala kareting sagradung kasangkapan. Pero e ra la sukat tatagkilan deting kasangkapan, uling mate la kabud tigkilan da la. Ila deti ring katungkulan da ring pamilya nang Kohat neng lilipat de ing Toldang tuknangan ku, ing Ginu.

¹⁶I Eleazar a anak nang Aaron a pari ya ing ating katungkulan king laru da ring sulu, king mabanglung insenso, karing ain a karaniwan, at king larung paglania. Ya mu rin ing maki pakibatan manibala king kabilugan a Toldang tuknangan ku, ing Ginu, at karing sablang kasangkapan na niti.

¹⁷Ngana ning Ginu kang Moises at Aaron,

¹⁸E yu paburen ing mipahamak la ring pamilya nang Kohat at mawala king tribu nang Levi

¹⁹king kapamilatan na ning paglapit da karing sagradung kasangkapan. Ban e la mate ituru na lang Aaron at ding anak nang lalaki ing sukat dang idala at gawan.

²⁰E da la sukat lawan man ding sagradung kasangkapan agyang saguli mu ban e la mate.

²¹Ngana ning Ginu kang Moises,

²²Ilista mu la ring anak nang lalaking Gerson agpang king karelang pamilya

²³magumpisa king idad atlung pulu anggang limang pulung banua a malyaring sumuyu king Toldang tuknangan ku.

²⁴Iti ing karelang katungkulan:

²⁵pusanan da la ring tabing na ning Tolda, ing takap king kilub at king kilual, ing balat a mapinung panakap, ing tabing king pasbul na ning Tolda,

²⁶ding tabing at lubid ning patyu a makapaligid king Toldang tuknangan ku at ning altar, ding tabing king pasbul na ning patyu at ding aliwa pang kagamitan makataid kareti. Ila ring ating katungkulan dapat karing sablang bage ating kaugnayan kareti.

²⁷I Aaron at ding anak nang lalaki ilang mamahala king sablang obra da ring pamilya nang Gerson. Ika ing manutuk king sukat dang pagobran.

²⁸Iti ing katungkulan da ring lalaking pamilya nang Gerson lalam nang pamanibalang Itamar, ing anak nang Aaron a pari. fig,malyaring sumuyu king Toldang tuknangan ku.,(4:23)fig*

²⁹Ilista mu la naman ding sablang pamilya nang Merari agpang king karelang pamilya

³⁰magumpisa king idad a atlung pulu anggang limang pulung banua a malyaring sumuyu king Toldang tuknangan ku.

³¹Iti ing karelang katungkulan: idala de ing balangkas ning Tolda, ding barote, ding posti, ding sulpakan,

³²at ding asias na ning patyu at ding sulpakan na, ding tulus, ding lubid, at ding sablang kagamitan a makaugne kareti. Ituldu mu karela ing sukat nang dalan ning balang metung karela.

³³Iti ing katungkulan da ring pamilya nang Merari lalam nang pamanibalang Itamar, ing anak nang Aaron a pari.

³⁴I Moises at i Aaron, at ding pamuntuk da ring tribu na ning Israel, ila ring ginawa king malawak a sensus da ring heganaganang pamilya da ri Kohat, Gerson, at Merari.

³⁵Linista da la ngan a lagyu ding sablang lalaking idad atlung pulu anggang limang pulung banua a malyaring sumuyu king Toldang tuknangan ning Ginu.

³⁶Adua lang libu at pitung dalan limang pulu

³⁷ing kabilangan da ring pamilya nang Kohat a linista da ri Moises at Aaron, agpang king inutus na karela ning Ginu. Ila ring maging kasaup king kasuyuan king Toldang tuknangan ning Ginu.

³⁸Ding mebilang at mitala karing pamilya nang Gerson

³⁹magumpisa king idad atlung pulu anggang limang pulung banua at malyaring sumuyu king Toldang tuknangan ning Ginu:

⁴⁰adua lang libu at anam a ralan atlung pulu.

⁴¹Iti ya ing kabilangan da ring pamilya nang Gerson a linista da ri Moises at Aaron, agpang king inutus na karela ning Ginu. Maging kasaup la naman king kasuyuan king Toldang tuknangan ning Ginu.

⁴²Ding mebilang at milista karing pamilya nang Merari

⁴³magumpisa king idad atlung pulu anggang limang pulu a malyaring sumuyu king Toldang tuknangan ning Ginu:

⁴⁴atlu lang libu at aduang dalan.

⁴⁵Iti ya ing kabilangan da ring sabla nang pamilyang Merari a linista da ri Moises at Aaron, agpang king inutus na karela ning Ginu.

⁴⁶Gewa de ri Moises at Aaron ing sensus da ring Levita at ding pamuntuk da ring tribu ning Israel.

⁴⁷Linista da la ngan a lagyu ding lalaking idad atlung pulung banua anggang limang pulung banua a malyaring sumuyu at mamuat king Toldang tuknangan ning Ginu.

⁴⁸Heganagana, walu lang libu at limang dalan walung pulu.

⁴⁹Milista ya lagyu ing balang metung at metung, agpang king inutus na ning Ginu king kapamilatan nang Moises. At king kapamilatan na namang Moises mitutukan ya ing metung at metung king obrang sukat nang gampanan.