Read Kapampangan Numbers 6 Bible Online

Numbers 6 - Kapampangan bible

Numbers 6

¹Nganang migsalita ning Ginu kang Moises,

²Sabian mu iti karing memalen na ning Israel: Nung gawa yang makabukud a panata ing metung a lalaki o babai at italaga na ing sarili na kanaku, ing Ginu, bilang Nazareo,

³e ya sukat miminum alak o king nanumang inuman a makalasing. E ya naman malyaring minum king nanumang inuman a ibat king katas ning ubas o mangan ubas o pasas.

⁴Kilub ding panaun na ning panata na bilang Nazareo, e ya malyaring mangan king nanumang ibat king tanaman ubas agyang balat o butul.

⁵E ya naman malyaring paputut a buak; paburen neng kumaba at ikat ne kabang dirikilan ne ing panata na. Sukat yang manatiling makatalaga kanaku, ing Ginu.

⁶E ya naman sukat lumapit king mete

⁷agyang pang ing mete ya i tata na o ima na o ing kapatad na. E na sukat dirinatan ing sarili na king uli da ring mete, uling atyu ya king mabilug nang katawan ing panatang Nazareo.

⁸Sukat yang manatiling makatalaga kanaku, ing Ginu, king kekaban na ning panata na.

⁹Nung sakaling bigla yang mete ing metung a taung atyu lele ning Nazareo at mirinatan ya ing buak nang makatalaga, kanita labahasan ne ing buak na king aldo ning pamaglinis na kalabas na ning pitung aldo.

¹⁰King kawalung aldo magdala yang aduang ayup a batu-batu o aduang pitsun king pari karin king pasbul ning Toldang tuknangan ku, ing Ginu.

¹¹Iyain ne ning pari ing metung kareti bilang ain-a-kapamayaran-king-kasalanan, at ing kadua bilang ain-a-durulukan at bilang panlinis uli na ning mitagkil ya king mete. Italaga nang pasibayu ing buak na king aldo mu ring ita

¹²at ing sarili na kanaku bilang Nazareo. Magdala ya namang biserung tupa a pabanua tua bilang ain-a-kapaglarinan-king-kasalanan. E mabilang ing milabas a panaun ning panata na uling mirinatan ya ing buak nang mitalaga inyang mitagkil ya king mete.

¹³Ini ing tukian a tuntunan potang agampanan na na ning Nazareo ing panata na. Idala ya king pasbul ning Toldang tuknangan ku, ing Ginu,

¹⁴at ibie na ing ain na kanaku, ing Ginu: metung a lalaking tupa a pabanua tua a alang dipektu bilang ain-a-durulukan, metung a babaing tupa a pabanua munaman tua at alang dipektu bilang ain-a-kapamayaran-king-kasalanan at metung a lalaking tupa a alang dipektu bilang ain-ning-pamisulusulu.

¹⁵Miyain ya namang metung a basket a tinape alang lebadura: makapal a tinape melutu king mapinung arina a semutanan laru at maimpis a tinape alang lebadura a kiskasanan king larung olibo. Magdala ya namang ain-a-binutil at inuman.

¹⁶Iyain na la ngan ning pari deting ain king arapan ku, ing Ginu, at ding ain-a-kapamayaran-king-kasalanan at ain-a-durulukan.

¹⁷Iyain ne ing lalaking tupa kanaku, ing Ginu, bilang ain-ning-pamisulusulu; iyain neng kayabe ing basket a ating tinape alang lebadura. Iyain na naman ing ain-a-binutil at inuman.

¹⁸Karin ketang pasbul ning Toldang tuknangan ku, ing Ginu, labahasan ne ning Nazareo ing buak na at ibili na iti king api nung nukarin durulukan ing ain-ning-pamisulusulu.

¹⁹Kuanan ne kanita ning pari ing pago ning lalaking tupa a mipabukal at abayanan neng metung a makapal a tinape alang lebadura at metung a maimpis a tinape alang lebadura a meyakua king basket at ibili na la king gamat na ning Nazareo.

²⁰Kaybat na nita, iyain na la reti ning pari kanaku, ing Ginu, bilang makapasubaling ain. Sagradu lang dake deti a mangaintulid king pari; subali pa ing pitsu at ing puad. Kaybat na nita, malyari neng minum alak ing Nazareo.

²¹Ila deti ring tukian a tuntunan king taung menatang maging Nazareo, nung mangaku yang lagpus ing Nazareo king aduan na ning panata, ita man sukat nang tuparan alang kapilisian.

²²Ngana ning Ginu kang Moises,

²³Sabian mu kang Aaron at karing anak nang lalaki king ini ing sabian da neng babie re ing bendisyun karing memalen na ning Israel.

²⁴Bendisyunan na kayu sana ning Ginu at ingatan;

²⁵aslagan na kayu sana ning Ginu king ganaka na, at maging malam ya kekayu.

²⁶Mananu na sanang lingapan na kayu ning Ginu, at dinan kapayapan.

²⁷Makanyan deng sabian ing lagyu ku karing memalen na ning Israel at bendisyunan ku la.