Read Kapampangan Numbers 7 Bible Online

Numbers 7 - Kapampangan bible

Numbers 7

¹King aldo a ayari neng telakad Moises ing Toldang tuknangan ning Ginu, linian neng laru at telaga king Ginu pati na ring kasangkapan na, ing altar at ding kasangkapan na.

²Dinatang la mu rin king aldong ita ring pamuntuk ning Israel a alang aliwa nune ring lalaking manimuna karing tribung sinaup king pamangawang sensus.

³Magdala lang ain para king Ginu: anam a karitun at labing aduang lalaking baka, metung a karitun karing balang aduang manimuna at metung a baka king balang manimuna. Dela da la ngan deti arapan ning Toldang tuknangan ning Ginu.

⁴Kanita ngana ning Ginu kang Moises,

⁵Tanggapan mu la reng babie dang den at gamitan la king obra ning Tolda; ibie mu la karing Levita ban gamitan da la agpang king obrang mitutuk karela.

⁶Kinua na lang Moises ding karitun at ding lalaking baka, at saka na la binie karing Levita.

⁷Binie na la ring aduang karitun at ding apat a lalaking baka karing Gersonita,

⁸at ding apat a karitun at walung lalaking baka karing Merarita. I Itamar a anak nang Aaron ya ing mamahala king nanumang obrang itutuk na karela.

⁹Ala yang binie karitun o lalaking baka i Moises karing Kohatita, uling ing obra da ya ing pusanan da la karing pago da ring sagradung bage.

¹⁰Migdala la namang ain ding manimuna da ring tribu inyang mitalaga ya ing altar. Dela da la ring ain da king altar.

¹¹Ngana ning Ginu kang Moises, Ibie ne ning metung at metung karing manimuna ing ain na king pangatalaga ning altar king aldo a mitutukan ya.

¹²King mumunang aldo i Nason, ing anak nang Aminadab at pamuntuk ning tribu nang Juda, ya ing minie ain.

¹³Minain yang metung a bandehadung pilak a titimbang limang pulung onsa at metung a silyo pilak a titimbang atlung pulung onsa, agpang king timbangan ning santuaryu. Mitmu la reti king arinang sinamut king larung olibo bilang ain-a-binutil.

¹⁴Minain ya namang metung a platitung gintu a titimbang apat a onsa. Mitmu ya iti king insenso.

¹⁵Minain ya namang metung a biserung toro, metung a lalaking tupa, at metung a lalaking tupa a pabanua tua bilang ain-a-durulukan.

¹⁶Minie ya namang metung a lalaking kambing bilang ain-a-kapamayaran-king-kasalanan.

¹⁷Para king ain-ning-pamisulusulu migdala ya namang aduang lalaking baka, limang lalaking tupa, limang lalaking kambing, at limang lalaking tupa a pabanua tua. Iti ngan ing inain nang Nason a anak nang Aminadab.

¹⁸King kaduang aldo i Netanel, ing anak nang Zuar at pamuntuk ning tribu nang Isacar, ya ing minie ain.

¹⁹Minain yang metung a bandehadung pilak a titimbang limang pulung onsa, at metung a silyo pilak a titimbang atlung pulung onsa, agpang king timbangan ning santuaryu. Mitmu la reti king arinang sinamut king larung olibo bilang ain-a-binutil.

²⁰Minain ya namang metung a platitung gintu a titimbang apat a onsa. Mitmu ya iti king insenso.

²¹Minain ya namang metung a biserung toro, metung a lalaking tupa, at metung a lalaking tupa a pabanua tua bilang ain-a-durulukan.

²²Minain ya namang metung a lalaking kambing bilang ain-a-kapamayaran-king-kasalanan.

²³Minain ya namang aduang baka, limang lalaking tupa, limang lalaking kambing, at limang lalaking tupa a pabanua tua bilang ain-ning-pamisulusulu. Ila deti ring inain nang Netanel a anak nang Zuar.

²⁴King katlung aldo i Eliab, ing anak nang Helon at pamuntuk ning tribu nang Zebulun, ya ing minie ain.

²⁵Minain yang metung a bandehadung pilak a titimbang limang pulung onsa, at metung a silyo pilak a titimbang atlung pulung onsa. Mitmu la reti king arinang sinamut king larung olibo bilang ain-a-binutil.

²⁶Minain ya namang metung a platitung gintu a titimbang apat a onsa, agpang king timbangan ning santuaryu. Mitmu ya iti king insenso.

²⁷Minain ya namang metung a biserung toro, metung a lalaking tupa, at metung a lalaking tupa a pabanua tua bilang ain-a-durulukan.

²⁸Minain ya namang metung a lalaking kambing bilang ain-a-kapamayaran-king-kasalanan.

²⁹Migdala ya namang aduang baka, limang lalaking tupa, limang lalaking kambing, at limang lalaking tupa a pabanua tua bilang ain-ning-pamisulusulu. Ila deti ring inain nang Eliab a anak nang Helon.

³⁰King kapat a aldo i Elizur, ing anak nang Sedeur at pamuntuk ning tribu nang Ruben, ya ing minie ain.

³¹Minain yang metung a bandehadung pilak a titimbang limang pulung onsa, at metung a bandehadung pilak a titimbang atlung pulung onsa, agpang king timbangan ning santuaryu. Mitmu la reti king arinang sinamut king larung olibo bilang ain-a-binutil.

³²Minain ya namang metung a platitung gintu a titimbang apat a onsa. Mitmu ya iti king insenso.

³³Minain ya namang metung a biserung toro, metung a lalaking tupa, metung a lalaking tupa a pabanua tua bilang ain-a-durulukan.

³⁴Minain ya namang metung a lalaking kambing bilang ain-a-kapamayaran-king-kasalanan.

³⁵Migdala ya namang aduang baka, limang lalaking tupa, limang lalaking kambing, at limang lalaking tupa a pabanua tua bilang ain-ning-pamisulusulu. Ila deti ring inain nang Elizur a anak nang Sedeur.

³⁶King kalimang aldo i Selumiel, ing anak nang Zurisadai at pamuntuk ning tribu nang Simeon, ya ing minie ain.

³⁷Minain yang metung a bandehadung pilak a titimbang limang pulung onsa at metung a pilak a silyo a titimbang atlung pulung onsa, agpang king timbangan ning santuaryu. Mitmu la reti king arinang sinamut king larung olibo bilang ain-a-binutil.

³⁸Minain ya namang metung a platitung gintu a titimbang apat a onsa. Mitmu ya iti king insenso.

³⁹Minain ya namang metung a biserung toro, metung a lalaking tupa, metung a lalaking tupa a pabanua tua bilang ain-a-durulukan.

⁴⁰Minain ya namang metung a lalaking kambing bilang ain-a-kapamayaran-king-kasalanan.

⁴¹Migdala ya namang aduang baka, limang lalaking tupa, limang lalaking kambing, at limang lalaking tupa a pabanua tua bilang ain-ning-pamisulusulu. Ila deti ring inain nang Selumiel a anak nang Zurisadai.

⁴²King kanam a aldo i Eliasaf, ing anak nang Deuel at pamuntuk ning tribu nang Gad, ya ing minie ain.

⁴³Minain yang metung a bandehadung pilak a titimbang limang pulung onsa at metung a pilak a silyo a titimbang atlung pulung onsa, agpang king timbangan ning santuaryu. Mitmu la reti king arinang sinamut king larung olibo bilang ain-a-binutil.

⁴⁴Minain ya namang metung a platitung gintu a titimbang apat a onsa. Mitmu ya iti king insenso.

⁴⁵Minain ya namang metung a biserung toro, metung a lalaking tupa, at metung a lalaking tupa a pabanua tua bilang ain-a-durulukan.

⁴⁶Minain ya namang metung a lalaking kambing bilang ain-a-kapamayaran-king-kasalanan.

⁴⁷Migdala ya namang aduang baka, limang lalaking tupa, limang lalaking kambing, limang lalaking tupa a pabanua tua bilang ain-ning-pamisulusulu. Ila deti ring inain nang Eliasaf a anak nang Deuel.

⁴⁸King kapitung aldo i Elisama, ing anak nang Amiud at pamuntuk ning tribu nang Efraim, ya ing minie ain.

⁴⁹Minain yang metung a bandehadung pilak a titimbang limang pulung onsa, at metung a pilak a silyo a titimbang atlung pulung onsa, agpang king timbangan ning santuaryu. Mitmu la reti king arinang sinamut king larung olibo bilang ain-a-binutil.

⁵⁰Minain ya namang metung a platitung gintu a titimbang apat a onsa. Mitmu ya iti king insenso.

⁵¹Minain ya namang metung a biserung toro, metung a lalaking tupa, at metung a lalaking tupa a pabanua tua bilang ain-a-durulukan.

⁵²Minain ya namang metung a lalaking kambing bilang ain-a-kapamayaran-king-kasalanan.

⁵³Migdala ya namang aduang baka, limang lalaking tupa, limang lalaking kambing, at limang lalaking tupa a pabanua tua bilang ain-ning-pamisulusulu. Ila deti ring inain nang Elisama a anak nang Amiud.

⁵⁴King kawalung aldo i Gamaliel, ing anak nang Pedazur at pamuntuk na ning tribu nang Manase, ya ing minie ain.

⁵⁵Minain ya namang metung a bandehadung pilak a titimbang limang pulung onsa at metung a pilak a silyo a titimbang atlung pulung onsa, agpang king timbangan ning santuaryu. Mitmu la reti king arinang sinamut king larung olibo bilang ain-a-binutil.

⁵⁶Minain ya namang metung a platitung gintu a titimbang apat a onsa. Mitmu ya iti king insenso.

⁵⁷Minain ya namang metung a biserung toro, metung a lalaking tupa, at metung a lalaking tupa a pabanua tua bilang ain-a-durulukan.

⁵⁸Migdala ya namang metung a lalaking kambing bilang ain-a-kapamayaran-king-kasalanan.

⁵⁹Migdala ya namang aduang baka, limang lalaking tupa, limang lalaking kambing, at limang lalaking tupa a pabanua tua bilang ain-ning-pamisulusulu. Ila deti ring inain nang Gamaliel a anak nang Pedazur.

⁶⁰King kasiam a aldo i Abidan, ing anak nang Gideoni at pamuntuk na ning tribu nang Benjamin, ya ing minie ain.

⁶¹Minain ya namang metung a bandehadung pilak a titimbang limang pulung onsa, at metung a pilak a silyo a titimbang atlung pulung onsa, agpang king timbangan ning santuaryu. Mitmu la reti king arinang sinamut king larung olibo bilang ain-a-binutil.

⁶²Minain ya namang metung a platitung gintu a titimbang apat a onsa. Mitmu ya iti king insenso.

⁶³Minain ya namang metung a biserung toro, metung a lalaking tupa, at metung a lalaking tupa a pabanua tua bilang ain-a-durulukan.

⁶⁴Minain ya namang metung a lalaking kambing bilang ain-a-kapamayaran-king-kasalanan.

⁶⁵Migdala ya namang aduang baka, limang lalaking tupa, at limang lalaking kambing, at limang lalaking tupa a pabanua tua bilang ain-ning-pamisulusulu. Ila deti ring inain nang Abidan a anak nang Gideoni.

⁶⁶King kapulung aldo i Aiezer, ing anak nang Amisaddai at pamuntuk na ning tribu nang Dan, ya ing minie ain.

⁶⁷Minain ya namang metung a bandehadung pilak a titimbang limang pulung onsa, at metung a pilak a silyo a titimbang atlung pulung onsa, agpang king timbangan ning santuaryu. Mitmu la reti king arinang sinamut king larung olibo bilang ain-a-binutil.

⁶⁸Minain ya namang metung a platitung gintu a titimbang apat a onsa. Mitmu ya iti king insenso.

⁶⁹Minain ya namang metung a biserung toro, metung a lalaking tupa, at metung a lalaking tupa a pabanua tua bilang ain-a-durulukan.

⁷⁰Minain ya namang metung a lalaking kambing bilang ain-a-kapamayaran-king-kasalanan.

⁷¹Migdala ya namang aduang baka, limang lalaking tupa, limang lalaking kambing, at limang lalaking tupa a pabanua tua bilang ain-ning-pamisulusulu. Ila deti ring inain nang Aiezer a anak nang Amisadai.

⁷²King kalabing metung a aldo i Pagiel, ing anak nang Ocran at pamuntuk na ning tribu nang Aser, ya ing minie ain.

⁷³Minain ya namang metung a bandehadung pilak a titimbang limang pulung onsa, at metung a bandehadung pilak a titimbang atlung pulung onsa, agpang king timbangan ning santuaryu. Mitmu la reti king arinang sinamut king larung olibo bilang ain-a-binutil.

⁷⁴Minain ya namang metung a platitung gintu a titimbang apat a onsa. Mitmu ya iti king insenso.

⁷⁵Minain ya namang metung a biserung toro, metung a lalaking tupa, at metung a lalaking tupa a pabanua tua bilang ain-a-durulukan.

⁷⁶Minain yang metung a lalaking kambing bilang ain-a-kapamayaran-king-kasalanan.

⁷⁷Migdala ya namang aduang baka, limang lalaking tupa, limang lalaking kambing, at limang lalaking tupa a pabanua tua bilang ain-ning-pamisulusulu. Ila deti ring inain nang Pagiel a anak nang Ocran.

⁷⁸King kalabing aduang aldo i Aira, ing anak nang Enan at pamuntuk na ning tribu nang Neftali, ya ing minie ain.

⁷⁹Minain yang metung a bandehadung pilak a titimbang limang pulung onsa, at metung a pilak a silyo a titimbang atlung pulung onsa, agpang king timbangan ning santuaryu. Mitmu la reti king arinang sinamut king larung olibo bilang ain-a-binutil.

⁸⁰Minain ya namang metung a platitung gintu a titimbang apat a onsa. Mitmu ya iti king insenso.

⁸¹Minain ya namang metung a biserung toro, metung a lalaking tupa, at metung a lalaking tupa a pabanua tua bilang ain-a-durulukan.

⁸²Minain ya namang metung a lalaking kambing bilang ain-a-kapamayaran-king-kasalanan.

⁸³Migdala ya namang aduang baka, limang lalaking tupa, limang lalaking kambing, at limang lalaking tupa a pabanua tua bilang ain-ning-pamisulusulu. Ila deti ring inain nang Aira a anak nang Enan.

⁸⁴Ing heganaganang inain da ring manimuna na ning Israel inyang mitalaga ya ing altar ya iti: labing aduang bandehadung pilak, labing aduang silyo pilak, at labing aduang platitung gintu. Nung ing balang metung a bandehadu titimbang yang limang pulung onsa, ing pilak a silyo titimbang yang atlung pulung onsa, at ing gintung platitu titimbang yang apat a onsa, heganagana, dinalan at walung libra ing timbang da subali pa ing insenso.

⁸⁵

⁸⁶

⁸⁷Labi lang adua ring toro; labing adua la ring lalaking tupa, at labing adua la naman ding lalaking tupa a pabanua tua. Deti ain lang durulukan subali pa king ain-a-binutil, at labing aduang lalaking kambing bilang ain-a-kapamayaran-king-kasalanan.

⁸⁸Adua lang pulu't apat ding baka, anam apulu la ring lalaking tupa, anam apulu la naman ding lalaking kambing, at anam apulu la naman ding lalaking tupang pabanua tua. Deti ain lang pamisulusulu. Iti ya ing kabilugan a bilang ding ain da ring Israelita inyang mitalaga ya ing altar kaybat nang mikuskusan king laru.

⁸⁹Inyang linub ya i Moises king Toldang tuknangan ning Ginu ban makipagsalita king Ginu, dimdam na ing siwala na a manibat king pilatan da ring aduang kerubin king babo ning Luklukan ning Lunus a atyu babo ning Kaban ning Kasunduan.