Read Kapampangan Haggai 2 Bible Online

Haggai 2 - Kapampangan bible

Haggai 2

¹King kaduang pulu't metung a aldo ning kapitung bulan na ning banua mu ring ita, migsalita yang pasibayu ing Ginu king kapamilatan nang propeta Hageo.

²Sinabi na kang Hageo king sabian na kang Zerubabel, ing gobernador na ning Juda, kang Josue, ing matas dili katungkulan karing pari, at karing memalen ing anti kaniti:

³Atin kekayu a e mekakalinguan king leguan na ning sadiang Templo? Nanu ing itsura na ngeni? Balamu ala yang bitasang leguan.

⁴Oneng e kayu paisira lub. Magobra kayu uling atyu ku libutad yu.

⁵Inyang meko kayu Ehipto, pengaku ku king manatili kung mamantabe kekayu. Angga ngeni kayabe yu ku. Inya e kayu sukat mitatakutan.

⁶E lumuat, ugunan ke ing banua at ing yatu, ing bansa at ing dagat.

⁷Ibagsak ku la ding sablang bansa at midala la keti ding karelang pibandian at kumatmu yang pibandian ing Templo.

⁸Kanaku ing sablang pilak at gintu ning yatu.

⁹Maging maygit ya leguan ing bayung Templo kesa king minunang mitalakad. At karin ku ibie karing memalen ku ing kanawan at ing kapayapan. Ing Ginung Mayupaya ya ing migsalita.

¹⁰King kaduang pulu't apat a aldo ning kasiam a bulan na ning kaduang banua ning pamag-ari nang Dario, migsalita yang pasibayu ing Ginung Mayupaya kang propeta Hageo.

¹¹Ngana, Ikutang mu karing pari ing pakibat da kaniting kutang:

¹²O nu mong ing metung a tau kuma yang kapirasu king karning mibie bilang ain-sakripisyu at ipamulsa na iti. Kaybat na nita, paburen neng mitagkil ing susulud nang imalan king nanumang tinape, king pamangan, king alak, king larung olibo o nanu pa mang pamangan, ita kayang pamangan a ita maging sagradu ya naman? Inyang miyapag ya iting kutang karing pari, ing pakibat da: Ali ya.

¹³Kanita kitang nang Hageo, O nu mong mirinatan ya ing metung a lalaki uli na ning tigkilan ne ing metung a bangke, at kaybat tagkilan ne ing isanu man kareting mesabing pamangan, mirinatan la munaman deti? Ngarang mekibat ding pari, Wa.

¹⁴Kanita sinabi nang Hageo, Sasabian na ning Ginu king ing anti kanyan a bage tutu munaman karing memalen na niting bansa at king sablang bage a karelang daraptan. Inya ating dinat ing balang bage yayain da king altar.

¹⁵Sasabian na ning Ginu, E yu apansinan ing mepalyari kekayo? Bayu ye pegumpisan telakad ing Templo ning Ginu,

¹⁶lepitan ye ing makatumpuk a binutil at asahan yung manikua kayung aduang pulung datukanan, oneng apulu mu ing atyu karin. Buri yu ing manikua kayung limang pulung galun a alak king metung a datukanan, oneng manikua kayu mung aduang pulu.

¹⁷Peparala kung mapaling angin at uran-lipat ban siran ing sablang kekayung tenam, makanyan man e kayu sinisi.

¹⁸Ing aldong iti ya ing kaduang pulu't apat a aldo ning kasiam a bulan, ing aldo nung kapilan ya meyari ing pundasyun na ning Templo ning Ginu. Pagumasdan yu ing mapapalyari manibat ngeni.

¹⁹Agyang ala nang bitasang mitagan a binutil at e la pa mekapamunga ding ubas, ding tanaman a higera, ding pomegranate at olibo, makanyan man, bendisyunan da kayu manibat ngeni.

²⁰King aldo mu ring ita, ing kaduang pulu't apat na ning bulan, binie ne ning Ginu kang Hageo ing metung pang mensahi

²¹para kang Zerubabel, ing gobernador ning Juda. Ngana, Malapit ku nia mung ugunan ing banua at ing yatu,

²²at ibagsak ku la ding kayarian at angganan ku ing upaya ra. Panuag ku la ding karung panggera at ding magmanehu kareti; mate la ding kabayu at mipapatayan la ding pakasake.

²³Kuanan da ka king aldong ita, Zerubabel a talasuyu ku, at gawan da kang pamuntuk a mamahala king lagyu ku. Ika ing pinili ku. Ing migsalita ya ing Ginung Mayupaya.