Read Kapampangan 1 Maccabees 10 Bible Online

1 Maccabees 10 - Kapampangan bible

1 Maccabees 10

¹King banuang dinalan anam apulu sekupan neng Alexander Epifanes a anak nang Antiocus ing Tolemaida nung nu re matulang tinggap bilang ari.

²Inyang abalitan nang Aring Demetrio iti tinatag ne ing metung a grupu ding sundalus at linage ya ban arapan ne king labanan.

³Antimu rin, peparalan neng sulat Demetrio i Jonatan. Sulat yang kakaluguran at mitmu ya king amanung pamipapuri

⁴uling ngana king sarili na, Unan ta ne i Alexander king kapamilatan na ning pamakikaluguran tamu kareng Judio bayu na akuang makikasundung Jonatan laban kekatamu.

⁵Magkang aganaka na pa ing kasakitan a gewa tamu at karing kapatad na at king mabilug a bansa nang Jonatan.

⁶Inya dininan neng upayang Demetrio i Jonatan ban tumipun dakal a sundalus at misadia king sablang kailangan da reti, at peintulut na ing mayaus yang kakampi na, at peintulut na pang mibili la lalam nang upaya ding bihag a atyu king kuta ning Jerusalem.

⁷Minta ya Jerusalem i Jonatan at binasa ne ing sulat king arapan da ring dakal a tau at karing sundalung atyu king kuta

⁸a mikatmuan takut inyang dimdam dang ing ari dininan neng upayang tumipun dakal a sundalus.

⁹Sinuku da la kang Jonatan ding bihag at binalik na la reti karing pengari da.

¹⁰Menuknangan ya Jerusalem i Jonatan at pegumpisan neng linarin at telakad pasibayu ing siudad.

¹¹Inutus na karetang manalakad king pader ing padurutan de ing Bunduk ning Zion karing kuadradung batu at iti merapat.

¹²Tinakas la ding dayuan a atyu karing kuta a telakad nang Bakides.

¹³Likuan ne ning balang metung karela ing makatutuk nang puestu at migbalik la king sarili dang balen.

¹⁴Makanyan man, atin pang mitagan king Betzur karetang Judiong ginulut king Kautusan nang Moises at karing tuntunan, at karin la menakit tuknangan.

¹⁵Abalitan na lang Aring Alexander ding pangaku nang Demetrio a binie na kang Jonatan, at belita da la naman ding pamakilaban at ing gelingan nang Jonatan at ding kapatad na at ing kasakitan a pibata ra.

¹⁶Nukarin ta pa manakit taung anti ya, nganang sinabi. Gawan ta yang kakaluguran tamu at kakampi.

¹⁷Inya sinulat yang anti kaniti:

¹⁸Ibat ya iting sulat kang Aring Alexander. Miparala ya king kapatad nang i Jonatan. Kukomustan da ka.

¹⁹Abalitan ku ing tetagan mu at karapatdapat kang maging kekaming kakaluguran.

²⁰Uli na niti, tutulduan da ka ngening aldong iti bilang Pekapun ding Pari ning kekang bansa at mayaus kang Kakaluguran ning Ari ban akayantabe ra ka king parasan mi at ban papanatilian mu ing pamakikaluguran kekami. Peparalan neng balabal a purpura at metung a koronang gintu.

²¹Sinulud nang Jonatan ing imalan na ning Pekapun ding Pari king kapitung bulan ning banuang dinalan at anam apulu, king Piesta da ring Dalungdung, at tinipun na la ding dakal a sundalus at misadia yang dakal a armas.

²²Megulu ya isip i Demetrio inyang abalitan na iti at ngana,

²³Nanu wari ing gewa tamu at aunan na katamu pang Alexander king pamakikaluguran at king kasaupan da ring Judio?

²⁴Paralan kia namang sulat a makipagkaluguran at dinan dangalan at regalu ban magpanig ya kanaku.

²⁵Nganang sinulat: Ibat ya iting sulat kang Aring Demetrio. Miparala ya king bansa da ring Judio. Kukomustan da kayu.

²⁶Maragul kami tula king abalitan ming tiparan yu ing tenguanan yu at menatili kayu king pamikaluguran yu kekami, at e kayu migpanig karing kalaban mi.

²⁷Nung makanyan, manatili kayung magtiwala kekami at ablasan da kayung e mu nanu uli na ning sablang daraptan yu para king kekaming parasan.

²⁸Dinan da kayung kapaintulutan e mamayad buis at miyayaliwang karapatan.

²⁹At ngeni mibie ya ing pangakabius yu at pangapasubali yu at ding sablang Judio king pamamayad king makabukud a buis, buis king asin, at aliwa pang pangkaraniwan a buis.

³⁰Manibat king aldong iti at king daratang a panaun e ra na kayu papamayaran king katlung dake ning pupul yu at king kapitna ning pupul yu karing bungang tanaman a mangaintulid kaku. Manibat ngeni at king kekaban ning panaun, e ku na la singilan pa king Judea o karing atlung distritung sadiang dake ning Samaria at Galilea, a ngeni yayabe kung maging dake ning Judea.

³¹Maging sagradu ya at alang bayaran a buis ing Jerusalem at ing sakup na, kayabe ning sikapulu na at aliwang babayaran da.

³²Susuku ku naman ing upaya ku king kuta a atyu Jerusalem at ibie king Pekapun ding Pari ing upayang ibili na la ding sundalung pinili na.

³³Didinan ku lang ganap a kalayaan ding sablang Judiong mebihag king labanan nu man karin king kakung kayarian. Alang ninuman ing makasingil nanumang buis karela at pati na karing sese dang animal.

³⁴Alang makasingil buis kenu mang Judio nu man karin king kakung kayarian neng Aldo ning Sabbath, neng Piesta da ring Bayung Bulan, at karing nanumang mituldung piesta. Subali pa kaniti alang makasingil buis atlung aldo bayu at atlung aldo kaybat ning isanu pa man karing piesta.

³⁵Ala ninuman ing ating matulid king isanu man karing aldo deti ing manyingil o munie kaguluan kekayu king makananu pa mang paralan.

³⁶Malyari lang miyabe karing sundalus na ning ari ding Judio angga king bilang a atlung pulung libu at tanggap lang sueldung kalupa da ring aliwang sundalus ning ari.

³⁷Ating midistinu karing mangaragul nang kuta ning ari, ating mitulduan karing maselan a katungkulan king kapamahalan. Kalahi da la ring mamuntukan karela at opisyal da, at tukian da ing sarili rang ugali, antimo ing inutus na ning ari para king Judea.

³⁸Ding atlung distritung miragdag king Judea a ibat king sakup ning Samaria miyabe la king Judea at mibili lang bukud mung king lalam nang upaya ning Pekapun ding Pari.

³⁹Babie ke king Templo ning Jerusalem para gamitan king gastus na ing panakitan na ning siudad ning Tolemaida at ing sakup nang bansa.

⁴⁰Ibabie ku la ding labing limang libung salaping pilak balang banua a ibat king pondu ning ari.

⁴¹Mibayaran ing mabilug a kakulangan king saup a ibie ning kapamahalan a e miyabie karing milabas a banua, at ing pangabayad misundu manibat ngeni para king pamangailangan na ning Templo.

⁴²Antimu rin e mi na la panayan pang ibie yu ding banua-banuang limang libung salaping pilak ibat king panakitan na ning Templo. Bandi re ding susuyung pari iting pondu.

⁴³Ninuman ing ating utang king ari o nanumang aliwang kautangan at salikut ya kilub ning Templo king Jerusalem o nu man karin king sakup na e ya malyaring dakpan ni kuanan ing bandi na.

⁴⁴Mabayad king pondu ning ari ing gastus ning pangatalakad nang pasibayu at pangalarin ning Templo.

⁴⁵Mabayad munaman king pondu ning ari ing pangalarin na ning pader ning Jerusalem, at ing makapadurut nang kuta, antimu rin ding kuta king Judea.

⁴⁶Inyang damdaman nang Jonatan at ding memalen ing aluk nang Aring Demetrio e la meniwala ni tinggap, uling aganaka ra ing makatakut a kasiran a pepasari na niting ari king Israel at ing mabagsik nang pamanalipit karela.

⁴⁷Makapanig la kang Alexander uling ya ing megumpisa king aluk ning kapayapan; inya menatili lang kakampi na angga king kawakasan.

⁴⁸Mekatipun yang dakal a sundalus i Alexander at migpuestu yang laban kang Demetrio.

⁴⁹Inyang miyarapan la king labanan ding aduang ari ginulut la at memulayi ding sundalus nang Alexander, at tinagal la ding sundalus nang Demetrio at mibabo la king labanan.

⁵⁰Linaban yang maigpit i Alexander angga na itang sisilim, oneng mete ya i Demetrio king aldong ita.

⁵¹Kaybat na nita, peparala yang tubud i Alexander kang Aring Tolomeo a Kanam ning Ehipto, at anti kanini ing pepasabi na:

⁵²Mibalik ku king kayarian ku at linukluk king tronu ding makatua ku. Kinua ke ing gobiernu at aku ngeni ing mamahala king bansa.

⁵³Lebanan ke king labanan i Demetrio, at simbut ke at ding sundalus na at sekupan ke ing kayarian na.

⁵⁴Ngeni gawa katang pamikampi; ibie me kanaku king kasal ing anak mung babai at maging manuyang mu ku at ibie ku la kekong adua bilang regalu detang karapatdapat king kekong kabilian.

⁵⁵Nganang mekibat Aring Tolomeo, Masaya yang aldo ing pamagbalik mu king bansa da ring kekang makatua at inyang sampa ka king tronu ning karelang kayarian. Ibie ku ngeni ing aduan mu,

⁵⁶mu pin munta ka Tolemaida ban mikit kata, at antimo ing minungkahi mu, maging katuangan mu ku.

⁵⁷King banuang dinalan anam apulu at adua menulakan ya Ehipto i Tolomeo at i Cleopatra, ing anak nang babai, at miras la Tolemaida.

⁵⁸Selubungan na lang Aring Alexander at binie neng Tolomeo kang Alexander ing anak nang i Cleopatra ban pakasalan na. Merapat ing kasal king mitmung karangalan antimo ing mangaintulid karing ari.

⁵⁹Sinulat ya i Aring Alexander kang Jonatan king datangan ne sana at pakikitan.

⁶⁰Maluhu ya piblas minta Tolemaida i Jonatan at mekikit ya karing aduang ari. Dininan na lang pilak ampon gintu, at minie ya pang miyayaliwang regalu karing matas dang opisyal; inya ikua na ing mayap dang pilubluban.

⁶¹Ating mapilan a taksil a Judiong ginulut king Kautusan nang Moises a misabuatan misampang reklamu laban kang Jonatan. Oneng e na la dininan pansin ning ari,

⁶²bagkus minie yang utus ing ilukas da ing imalan nang Jonatan at tibabalan deng purpura at iti merapat.

⁶³Pepaluklukan ne ning ari king siping na at inutus na karing opisyal na ing ituki re i Jonatan king kalibudtan ning siudad, at ihayag king alang ninuman ing misasampang dalum laban kang Jonatan o babie kaguluan maging king nanu pa mang kasangkanan.

⁶⁴Tinakas la detang migtangkang e mayap kang Jonatan inyang marapat iting pamipahayag at inyang ikit da ing karangalan na, at ing purpurang tibabal a makasulud kang Jonatan.

⁶⁵Makanyan neng peparangalan ning ari i Jonatan at inabe ne karing makaunang listahan da ring Kakaluguran ning Ari, at gewa neng heneral at gobernador ning probinsia.

⁶⁶Masaya ya king tagumpe nang Jonatan inyang magbalik ya Jerusalem.

⁶⁷King banuang dinalan anam apulu at lima, i Demetrio a Kadua, ing anak nang Aring Demetrio a Mumuna, menibatan ya Creta dinatang ya Siria, ing bansa da ring makatua na.

⁶⁸Megulu ya isip ing Aring Alexander keting balita at mibalik ya Antiokia, ing kabisera ning Siria.

⁶⁹Tilduan neng Demetrio bilang pekapun i Apolonio, ing gobernador ning Maragul nang Dake ning Siria. Tinipun na la ding dakal a sundalus at migkampu la lele ning Jamnia. Manibat karin peparala ne iting mensahi kang Jonatan, ing Pekapun ding Pari. Ngana ning sulat:

⁷⁰Magdili-dili na kang lalaban kekami at lalto kung manong. Baket kakalabanan mu ke pa karing bunduk-bundukan?

⁷¹Nung atin kang tiwala kareng kekang sundalus, kuldas ka ban pakitagpuan mu kami king kapatagan nung nukarin ta asubukan ing kekatang sikanan. Lawan mu atyu la kagulutan ku ding dakal a sundalus da ring siudad.

⁷²Mangutang ka; pakibaluan mu nung ninu aku at ding kakampi ku. Sabian da keka ing e ka maniambut kekami. Ding makatua mu adua na lang besis mesambut king sarili rang lugal.

⁷³At ngeni makananu mu lang sambutan ding kakung sundalus a pakakabayu at ining sikanan da ring sundalus ku king kapatagan? Karin ala kang apisalikutan a batu o lugal nung nu ka makatakas.

⁷⁴Mikalatang ya mua i Jonatan inyang tanggapan ne ing sulat nang Apolonio. Tiki na la ding piling apulung libung sundalus at minta ya Jerusalem. Pekiabayan ne ning kapatad nang i Simon at ding kayabe nang sundalus.

⁷⁵Migkampu la lual ning Jopa. Sera da la ring memalen kang Jonatan ding pasbul dalan uling kilub atin yang sundalus i Apolonio.

⁷⁶Inyang megumpisa na ing labanan, mitakutan la ding memalen at biklat da la ring pasbul dalan, uli na nita ikua neng Jonatan ing Jopa.

⁷⁷Inyang abalitan nang Apolonio iti tiki na la ding atlung libung sundalung pakakabayu at ding dakal a sundalung e pakakabayu at linakad lang papunta Asdod; balamu mo ing karin la dumalan, oneng uli ning pamanalig na karing sundalus na a pakakabayu, sinulung ya king kapatagan.

⁷⁸Tegalan na lang Jonatan angga Asdod, nung nu la miyarapan king labanan.

⁷⁹Oneng i Apolonio milakuan yang libung sundalung pakakabayu a pakasalikut king banda nang tauli,

⁸⁰at ikit nang Jonatan king ating manabat kagulutan na. Makapadurut la kang Jonatan ding kalaban na at pepatingapun da lang pepauranan paslu ding kalaban.

⁸¹Oneng menatili la king lugal da antimo ing panabilin na karelang Jonatan angga king mengaina la ding sundalung pakakabayu.

⁸²Inyang maina na la ding pakakabayu, lege na lang Simon ding sundalus na at inarapan da la at simbut ding kalaban. Simbut da la reti; misalbag la at memanakas.

⁸³Misalbag la king kapatagan ding sundalung pakakabayu at migkubli la king Asdod nung nu la sinalikut king templo nang Dagon, ing kikilalanan dang dios.

⁸⁴Oneng pepasilab neng Jonatan ing Asdod at ding kasiping nang baryu at kinua ra ing pibandian da; pepasilab ne ing templo nang Dagon pati na detang sinalikut kilub na niti.

⁸⁵Miras walung libu ing bilang da ring mete king espada pati na detang mesilab.

⁸⁶Meko ya Asdod i Jonatan at migkampu ya Askelon nung nukarin de seganan ding memalen karin king maragul a pamiparangal.

⁸⁷Kaybat na nita, minuli ne Jerusalem i Jonatan at ding tauan na; daralan da ing dakal a pibandian a ikua ra.

⁸⁸Inyang abalitan na ngang Aring Alexander ing sablang milyari lalu neng peparangalan i Jonatan.

⁸⁹Peparala ne kang Jonatan ing metung a habiliang gintu a miyabie mu kareng miparangalan kareng mayayaus Kamaganak ning Ari. Binie nia naman ing siudad ning Ekron at ing gabun a makapadurut keting siudad.