Read Kapampangan 1 Maccabees 12 Bible Online

1 Maccabees 12 - Kapampangan bible

1 Maccabees 12

¹Inyang ikit nang Jonatan king mayap para king kapakanan na ing sablang malilyari, mitubud yang taung pinili na ban kilalanan at ibayu ing pamakikaluguran king Roma.

²Makanyan ya naman kalamnan ing sulat a peparala na Esparta at karing aliwang lugal.

³Miglakbe lang papunta Roma ding tubud at minta la king Senado at ngarang minie ulat: Tinubud na kaming Jonatan, ing Pekapun ding Pari, at ding memalen a Judio ban ibayu ya ing sadiang pamikaluguran at pamikampi.

⁴Dininan da lang sulat ding Romano para karing manibala karing balen a dalanan dang papunta Judea ban dinan da lang payapang pamaglabas.

⁵Oyni ing kopia ning sulat nang Jonatan karing tau Esparta:

⁶Ibat ya iting sulat kang Jonatan, ing Pekapun ding Pari, king katipunan da ring manimuna na ning bansa, karing pari, at karing aliwang memalen ning Judea, at miparala ya karing kapatad mi Esparta. Kukomustan da kayu ngan.

⁷King milabas a panaun, ing ari yung i Arius peparala yang sulat king kekaming Pekapun ding Pari, i Onias, nung nu na sasabian ing kaugnayan da ring adua tamung bansa, antimo ing mayayakit kening makatuking kopia.

⁸Tinggap neng Onias king mitmung dangalan ing kekayung tubud at kilala na ing tinggap ne ing kekayung sulat a magpabalu king kekatamung pamikampi at pamikaluguran.

⁹E mi kikilalanan ing sarili mi antimong mangailangan pamakikampi, uling ing panibatan ning sikanan mi atyu karing banal a librung atyu kekami.

¹⁰Makanyan man mengangas kaming mitubud at ibayu ya iting kasunduan ning pamikakapatad at pamikakaluguran tamu. E mi buri ing mangalinguan kayu uling dakal namu ring panaun ing e yu pamaniulat kekami.

¹¹Karing mengalabas a panaun, karing aldo piesta at karing aliwang aldo makatuldu, gaganakan da kayu karing kekaming ain-sakripisyu at panalangin, uli na ning karapatdapat at matulid iti kareng mikakapatad;

¹²katutula mi ing mibabantug kayu.

¹³Ikami naman mibili kami karing mituki-tuking kaguluan at mengailangan kaming makilaban dakal a gera uling e da kami patugutan lulusuban ding aring makapadurut kekami.

¹⁴King panaun da reting pamakilaban mi e mi na pignasan pa ing lingasngasan da kayu o ding aliwa ming kakampi at kakaluguran.

¹⁵Atyu kekami mamantabe ing kasaupan na ning Ginu inya miligtas kami karing kekaming kalaban at mesambut la.

¹⁶Makanyan mi yang apili i Numenius a anak nang Antiocus at i Antipater a anak nang Jason, at tinubud mi la karing Romano ban ibayu ing kekaming sadiang pamikaluguran at pamikampi.

¹⁷Penabilinan mi la namang munta kekayu a kayabe ning kekaming pamangumusta, at ibie iting sulat tungkul king pangabayu na ning kekatamung pamikakapatad.

¹⁸At ngeni ipanalangin mi ing iparala ye kekami ing ablas yu kaniting sulat.

¹⁹Iti ya ing kopia ning sulat da ring tau Esparta kang Onias:

²⁰Ibat ya iti kang Arius, ing ari ning Esparta, miparala ya kang Onias, ing Pekapun ding Pari. Kukomustan da kayu.

²¹Meyakit ya ing metung a dokumento nung nu mababasa king ding tau Esparta at ding Judio mikamaganak la, lahi na lang Abraham.

²²Ngening abalu mi iti, aduan mi kekayu ing sulatanan yu kami at sabian yu ing kabilian yu.

²³Ing asabi mi naman kekayu ya ini, Kekami ing kekayu at ding kekayung baka ampon ing sabla yung pibandian, at kekayu naman ing nanumang kekami. Makanyan mi lang pinayuan magsalita kekayu ding kekaming tubud kekayu.

²⁴Abalitan nang Jonatan king mibalik la ding opisyal nang Demetrio a kayabe da ring dakal a sundalus kesa king sadia.

²⁵Linakad yang manibat Jerusalem at selubungan na la king lugal na ning Hamat. E na la dininan oportunidad makatuklu king bansa na.

²⁶Peparala yang ispia king kampu ra. Kabalik da reti belita ra king magsadia lang lumusub itang benging ita.

²⁷Kayalbug ning aldo minie yang utus i Jonatan king kabukas lang manatiling makagising at makasadiang lumaban. Mipuestu yang magbante makapadurut king kampu.

²⁸Mitakutan la ding kalaban inyang abalitan da king i Jonatan at ding tauan na makasadia lang makilaban. Mesira la lub at minurung la. Likuan da lang makasindi ding sulu ra king kampu.

²⁹Ngening akakit da lang mitatau ding sulu ra kilub ning kampu, e ra bitasang balu di Jonatan ing milyari nune na mu pangayabak.

³⁰Tinagal ya kanita i Jonatan at ding tauan na, oneng e ra no atagal uling mekadalakit na la king Ilug ning Eleutero.

³¹Inya inarapan na la ding Arabo a ausan dang Zabadeo. Simbut na la at kinua na ing pibandian da.

³²Kaybat, bigbag ne ing kampu na at minta ya Damasco at miglakbe ya king mabilug a bansa.

³³Linakad ya i Simon angga Askelon at ding kasiping nang kuta. Kaybat meko yang papunta Jopa.

³⁴Abalitan na king ding memalen karin buri da ing isuku re karing sundalus nang Demetrio. Bayu ra agawa iti, mibili yang sundalus karin ban idipensa re.

³⁵Kabalik nang Jonatan inaus ne king pulung ing katipunan da ring manimuna at pikasundu ra ing patalakad lang kuta king Judea,

³⁶king itas la ding pader ning Jerusalem, at patalakad lang matas a pader ban ikawani ya ing kuta king siudad. Makanyan yang mikawani ing kuta ban e ya makasali o makapisaling nanuman ing kalaban.

³⁷Mitipun la ban italakad deng pasibayu ing dipensa ning siudad, uling atin neng dake melasak ing pader king lele ning bangin king dane aslagan, at linarin ne itang dake ning pader a ausan dang Kafenata.

³⁸Pasibayu nia namang telakad Simon ing Adida king kapatagan ning kabitisan ning bunduk. Gewa neng kuta at pepatalakad na la ding pasbul dalan a ating kabat.

³⁹Mignasa yang maging ari ning Siria i Trifo inya migtangka yang mag-rebeldi laban kang Aring Antiocus ban kuanan ne ing korona.

⁴⁰Atin yang takut a pota lumaban ya i Jonatan ban pigilan na iti, inya ginawa yang planu ban arakap ne at apapate. Meko ya at miras ya Bet San.

⁴¹Selubungan neng Jonatan a kayabe da ring apat apulung libung piling sundalus at miras ya naman Bet San.

⁴²Inyang ikit nang Trifo king dakal la ding sundalus nang Jonatan mitakutan yang arapan ne king labanan.

⁴³Inya marangal neng tinggap at pepakilala ne karing sabla nang tagapayu. Dininan neng regalu at inutus na karing tagapayu na at sundalus ing pamintuan dia naman i Jonatan nung makananu reng pamintuan.

⁴⁴Ngana kang Jonatan, Baket binili mu la king maragul pang kaguluan deting sundalus samantalang e ta naman migigera?

⁴⁵Paulian mu na la ngeni. Mamili na kang mapilan ban mantabe keka at tuki ka kanaku Tolemaida. Ibie ke keka ing siudad at ding aliwa pang kuta, ding sundalus, at ding sablang opisyal, at kaybat maglakbe ku. Ya mu iti ing sangkan ning kanakung paniatang.

⁴⁶Meniwala ya i Jonatan king sablang sinabi na at depat na antimo ing sinabi na. Pepaulian na la king Judea ding sundalus na.

⁴⁷Milakuan yang atlung libu katau at likuan na la Galilea ding aduang libu karela at libu la mu ding tiki na.

⁴⁸Oneng inyang lungub ne Tolemaida, sera da la ring memalen ding pasbul dalan, dekap de, at pete da la detang sablang kayabe nang linub.

⁴⁹Peparala neng Trifo ing metung a grupung sundalung e pakakabayu at sundalung pakakabayu king malualas nang kapatagan ning Galilea ban paten ding tauan nang Jonatan.

⁵⁰Inisip da ring sundalung Judio king arakap da ne at pete i Jonatan a kayabe da ring sundalus na, inya pepasikan de lub ing metung at metung karela at linakad lang makasadia king labanan.

⁵¹Migbalik la inyang akilala da ring tatagal king makasadia lang lumaban angga king kamatayan.

⁵²Makanyan lang payapang mekauli king Judea oneng pigkalungkutan da la ri Jonatan at ding talatuki na, at mitmu la king kapigaganakan. Miras king Israel ing maragul a kalungkutan.

⁵³Ding makapadurut a paganu makasadia lang gisanan paten ding Judio manibat king yamut angga karing sanga. Ngarang sasabi king sarili ra, Ala na lang manimuna o kakampi inya iti ya na ing panaun para lusuban la at ilako karing tau ing nanumang katandanan tungkul karela.