Read Kapampangan 1 Maccabees 14 Bible Online

1 Maccabees 14 - Kapampangan bible

1 Maccabees 14

¹King banuang dinalan pitung pulu at adua tinipun na lang Aring Demetrio a Kadua ding sundalus na at minta ya Media ban kumang karagdagan a sundalus para king pamakilaban na kang Trifo.

²Inyang ing Aring Arsaces a Kanam ning Persia at Media abalitan na king linub ya i Demetrio king sakup na, tinubud ne ing metung karing pekapun na ban dakpan deng mabie.

³Lisuban ne ning pekapun at simbut ne i Demetrio. Arakap neng mabie at dela ne kang Arsaces at iti pepasukul ne.

⁴Payapa ya ing bansa ning Judea kabang mabie ya i Simon. King kekaban na ning pamanungkulan na, ginamit na ing upayang miyabie ban gawan na ing sablang mayap para karing memalen a sakup na, at metula la kang Simon bilang karelang pamuntuk.

⁵Kabilang karing tagumpe na ya pin ing simbut ne ing Jopa at gewa neng sadsaran papunta karing pulu da ring Griego sumangid ning dagat.

⁶Degul ne ing sakup ning bansa na at pemahalan neng mitmung kayupayan.

⁷Inuli na la ding dakal a bihag king labanan at simbut ne ing Gezer, Betzur, at ing kuta ning Jerusalem at leko na ing sablang makarinat. Ala metung man ing linaban kang Simon.

⁸Menasik la ding Judio libutad ning kapayapan at mika maragul la pupul at mamunga la ding tanaman.

⁹Pakalukluk la karing dalan ding makatua at pisasabian da ing pagmumulalan a bage a milyari karela, at pakapiblas lang sundalus ding kayanakan a lalaki.

¹⁰Dakal a pagkabie ing peparala nang Simon karing siudad at dininan na lang armas para idipensa ra ing sarili da. Meging pikabaluan ya angga na king wakas ning yatu.

¹¹Binalik na ing kapayapan king bansa at mika maragul a tula king mabilug a Israel.

¹²Mibiebie la king kapayapan libutad da ring karelang ubasan at tanaman a higera at alang makapamatakut karela.

¹³Ila deta ring panaun inyang mewala la ding sablang kalaban king mabilug a bansa, at mesupil ya ing balang aring kalaban.

¹⁴Liningap na la ding kalulu; iningat na ing pangatupad ning Kautusan nang Moises at leko na la ding sablang e tutuntun karing kautusan at ding e mayap.

¹⁵Dininan neng bayung leguan ing Templo at digdag na la ding dakal a kasangkapan para king pamanyamba.

¹⁶Inyang miras king Roma at Esparta ing balita king pangamate nang Jonatan, dinatang karela ing maragul a lungkut.

¹⁷Oneng inyang abalitan da king i Simon a kapatad na ya ing meging kayalili na bilang Pekapun ding Pari at matatag ing pamamahala na king bansa,

¹⁸tetak da karing tinabas a tangsu ing pamibayu na ning pamikaluguran da at pamikampi a tinatag da kanita karing kapatad nang i Judas at i Jonatan.

¹⁹Mebasa ya iti arap ning kapulungan karin Jerusalem.

²⁰Ing makatuki kopia ne ning sulat a peparala da ring tau Esparta: Ibat ya iting sulat karing pamuntuk at king siudad ning Esparta para king Pekapun ding Pari, i Simon, karing manimuna, karing pari, at karing sablang memalen a Judio. Kukomustan da kayu.

²¹Belita da kekami ding tinubud yu karing kekaming kabalen nung makananu da kang gagalangan at kikilalanan ding sabla. Minie maragul a tula kekami ing karelang pamandalo.

²²Misulat ing mensahi ra karing libru da ring kapulungan pangmalda anti ing makatuki: Ding tubud da ring Judio, i Numenius a anak nang Antiocus, at i Antipater a anak nang Jason, delawan da kami ban ibayu ra ing kasunduan ning pamikaluguran da kekami.

²³Apikayari na ning kapulungan malda ing tanggapan la deting tau king dangalan at mibili ya ing kopia ning mensahi ra karing pisisinupan kasulatan ning balen, ban mika permanenti lang piakitan ding tau Esparta. Miyabie ya ing kopia na niting dokumento kang Simon, ing Pekapun ding Pari.

²⁴Kaybat na nita, tinubud neng Simon i Numenius king Roma a ating metung a regalung maragul a gintung kalasag a titimbang kapitnang tonelada bilang patutu king pamakimetung ding Judio karing tau Roma.

²⁵Inyang abalitan da ring memalen na ning Israel ing sablang milyari ngarang kukutang king sarili ra, Makananu tamung ipakilala ing utang tamung lub kang Simon at karing anak na?

²⁶Uling ya, ding kapatad na, at ing pamilya nang tata na menalakaran lang matatag, at lebanan da la ring kalaban ning Israel at pepanatilian da ing kalayaan ning bansa.

²⁷Uli na niti, mitatak ya king tinabas a tangsu ing metung a kasulatan at binili de king metung a monumento king Bunduk ning Zion. Ngana ning makatatak: King kalabing walung aldo ning bulan ning Elul, king banuang dinalan pitung pulu at adua, king katlung banua na ning katungkulan nang Simon bilang Pekapun ding Pari,

²⁸karin king Asaramel, king metung a maragul a kapulungan da ring pari, ding memalen, ding mamuntukan, at ding makatua ning bansa, ing makatuking bage mipabalu kekami:

²⁹Uli na ning maralas ing labanan keting bansa tamu, i Simon a anak nang Matatias, ing pari king pamilya nang Joarib, at ding kapatad na, sinubu ra ing bie ra king panganib at linaban la karing kalaban na ning karelang bansa ban manatili ya ing Templo at ing Kautusan, at minie lang maragul a ligaya king bansa.

³⁰Pisanmetungan na lang Jonatan ding kabalen tamu at meging Pekapun de ring Pari bayu ya mete.

³¹Tingka da ring kalaban ding Judio ing luban de ing bansa at lusuban ampon dungisan ing Templo.

³²Kanita menimuna ya i Simon at mekilaban ya para king bansa na. Ginastus yang maragul karing sarili nang salapi ban adinan na lang armas at sueldu ding sundalus ning bansa.

³³Gewa na lang kuta ding balen ning Juda, lalu na ing Betzur a atyu king angganan nung nukarin la sadiang makadepositu ding armas ding kalaban. Mibili yang sundalus karin.

³⁴Gewa neng kuta ing Jopa, ing sadsaran lele dagat, at ing siudad ning Gezer king angganan ning Asdod a sadiang sakup ding kalaban a sundalus. Mibili yang Judiong manuknangan karin at dininan na la king sablang kailangan da king pagkabie ra.

³⁵Inyang akilala da ring memalen ing lugud nang Simon king bansa ra at nung makananu neng buring dinan dangalan iti, gewa reng manimuna at Pekapun ding Pari. Gewa ra iti bilang pamangilala king sablang depat na, ing panga makatuliran na, ing katapatan na king bansa na, at uli na ning ala nang kupas a pamamagmalasakit ban sumulung ing dangalan ning bansa na.

³⁶Meging matagumpe ya king pamanimuna na. Mitabi la king bansa da ring paganu, at antimu rin ding sundalus a migkuta Jerusalem king Siudad nang David, nung nu la manibatan magdalang karinatan king Templo.

³⁷Mibili yang Judio king kuta ban karin manuknangan. Pepatibe ne iti para king kapanatagan ning bansa at ning siudad, at pepatas ne pa ing pader ning Jerusalem.

³⁸Uli na niti, inayunan nang Aring Demetrio ing katungkulan na bilang Pekapun ding Pari,

³⁹kilala neng metung karing Kakaluguran na ning Ari at binie na la ding matas a karangalan.

⁴⁰Gewa nang Demetrio iti uling abalitan na king ding Romano ausan da lang kakaluguran, kakampi, at kapatad ding Judio at king tinggap da la at peparangalan ding tubud nang Simon.

⁴¹Uli na nita, pepatibayan da ring Judio at ding pari ing maging manimuna re at Pekapun ding Pari i Simon at ding lahi na, anggang e ya lunto ing metung a tune propeta.

⁴²Ing mamahala king bansa, ing manibala king Templo, at ing pekapun ding sundalus ya i Simon. At bilang karagdagan ya ing manibala king gamit da ring sundalus, king obrang pangbalen, at ing pangatalakad da ring kuta.

⁴³Kailangan lang mamintu kang Simon ding memalen king sablang bage. Marapat ing sablang kasunduan ning kapamahalan king lagyu na. Atyu kang Simon ing katuliran misulud king balabal a purpura da ring ari at king gintung hibilia king pago.

⁴⁴Ala metung man, pari ya man o memalen, ing ating upayang payalan na lang bisa deting mepikayari, ibayu o alilan ing isanu man karing kautusan nang Simon o maus kapulungan king bansa, nung ala yang kapaintulutan o misulud king balabal a purpura da ring ari o ing gintung hibilia king pago.

⁴⁵Miparusan ya ing ninumang salangsang o e munie pansin kareting tuntunan.

⁴⁶Misanmetung la pamalak ding tau king manungkulan ya i Simon agpang karing paralan a mepikayari.

⁴⁷Tinggap nang Simon king ya ing maging Pekapun ding Pari, pamuntuk da ring sundalus, at gobernador da ring Judio at ding pari.

⁴⁸Mepikayari king iting mipasiag mitatak ya king tinabas a tangsu at mibili ya king metung a agad a mayayakit a lugal kilub ning Templo

⁴⁹at mibili la ding kopia king pisisinupan nang pibandian ning Templo lalam nang pamaningat Simon at ding anak na.