Read Kapampangan 1 Maccabees 15 Bible Online

1 Maccabees 15 - Kapampangan bible

1 Maccabees 15

¹Ibat king kasumangid ning dagat peparalan neng sulat Antiocus a anak nang Aring Demetrio i Simon, ing Pekapun ding Pari at gobernador da ring Judio at ing kabilugan a bansa. Ngana ning sulat:

²Ibat ya iting sulat kang Aring Antiocus. Miparala ya kang Simon, ing Pekapun ding Pari at gobernador, at king bansa da ring Judio. Kukomustan da kayu.

³Antimo ing balu yu, simsam de ring taksil ing kayarian da ring makatua ku. Inari ku king lub ku ing tagalan ku ing matulid ku at ibalik ke king sadia nang kabilian. Mekatipun kung dakal a sundalung upahan at migsadia kung barkung panggera.

⁴Pagnasan ku ing miras ku king bansa ku at lusuban ku la detang miglasak king kayarian ku at miglasak karing dakal nang siudad.

⁵Uli na niti, patunayan ku ing pangapatawaran da ring sablang buis a pepatawad da kekayu ding aring tikian ku at pati na ding sablang aliwang babayaran a pepatawad da kekayu.

⁶Paintulutan da kayung gawang sarili yung salapi a gamitan king sarili yung bansa.

⁷Mipasubali ya king buis ing Jerusalem at ing Templo. Ding sablang armas a sidia yu, at manatili lang kekayu ding kuta a telakad yu a ngeni sakup yu.

⁸Ing sablang utang yu ngeni king pondu ning ari at ing paintungulan pang sukat yung bayaran makalis na la manibat ngeni at angga na king kapilan pa man.

⁹Kabud atalakad mi neng pasibayu ing kekaming kayarian, ibie mi la kekayu, king bansa yu, at king Templo ding matas diling parangal ban makilala ing kekong dangalan king mabilug a yatu.

¹⁰King banuang dinalan pitung pulu at apat lisuban neng Antiocus ing bansa ding makatua na. Linipat la kang Antiocus ding sablang sundalus, inya ditak na la mu ding melakuan kang Trifo.

¹¹Tegal neng Antiocus i Trifo a tinakas at minta ya king siudad ning Dor a atyu lele ning dagat.

¹²Balu na king mapanganib na ing kabilian na uling tekasan de ring sundalus na.

¹³Kibkuban neng Antiocus ing Dor; kayabe na lang linusub ding dinalan aduang pulung libung sundalus a masibukan at walung libung sundalung pakakabayu.

¹⁴Pepadurutnan de ing balen at sebat de ring barku na ing dagat. Makanyan ya kaigpit ing pangakubkub na manibat king mamala at danuman, inya alang milual o milub king siudad.

¹⁵Samantala, dinatang ya Jerusalem ibat king Roma i Numenius at ding kayabe na. Atin lang daralang sulat para karing miyayaliwang ari at bansa. Ngana ning mababasa:

¹⁶Ibat ya iting sulat kang Lucio, ing pekakatawan ding Romano. Miparala ya kang Aring Tolomeo. Kukomustan da kayu.

¹⁷Dinatang ya kekami ing metung a grupu a tubud ibat karing kakaluguran mi at kakamping Judio a tinubud nang Simon, ing Pekapun ding Pari, at ding memalen ning Judio, ban ibayu re ing minuna rang kasunduan a pamikaluguran at pamikampi.

¹⁸Migdala lang gintung kalasag anting regalu a titimbang kapitnang tonelada.

¹⁹Uli na niti, pikayari mi ing sulatanan la ding miyayaliwang ari at bansa at aduan mi karela ing e da la sana tataginan ding Judio, ding siudad da o ing bansa ra king makananu pa mang paralan. King e da la gegerahan ding Judio o makikampi karing aliwang makigera karela.

²⁰Pikayari mi munaman ing tanggapan mi ya ing kalasag.

²¹Nung sakaling ating taksil karing Judio a tinakas king bansa ra a dinatang kekayu, ibalik yu la kang Simon, ing Pekapun ding Pari, ban parusan na la agpang king kautusan da ring Judio.

²²Peparala ya namang sulat a kalupa na niti i Lucio kang Aring Demetrio, kang Attalus, Ariarates, Arsaces, Sampsames, at karing tau Esparta,

²³at kareting lugal: Delos, Myndos, Sicyon, Caria, Samos, Pamfilia, Licia, Halicarnassus, Rhodes, Faselis, Cos, Side, Aradus, Gortyna, Cnidus, Cyprus, at Cyrene.

²⁴Miparala ya naman ing kopia na niti kang Simon, ing Pekapun ding Pari.

²⁵King kaduang besis kibkuban neng Aring Antiocus ing Dor at tuki-tuking paglusub ing gewa na. Pepagawa yang kasangkapan a pangubkub at sebatan ne i Trifo, inya alang milual o milub karela.

²⁶Peparala yang aduang libung piling tau i Simon ban sumaup kang Antiocus. Magdala lang pilak at gintu at dakal a gamit;

²⁷oneng tinggian nang Antiocus ing aluk. Pepayalan na ngang ulaga ing sadia nang kasunduan kang Simon at meging kalaban ne.

²⁸Tinubud neng Antiocus ing pagkatiwalan nang opisyal a i Atenobius ban makipagsalita kang Simon. Ngana kang Simon, Kasalukuyan meng sasakupan ngeni ing Jopa at Gezer at ing kuta ning Jerusalem, ding siudad a dake na ning kanakung kayarian.

²⁹Lesak mu la ding sakup da at ginawa kang maragul a kasiran king bansa, at gewa yung panginuan ing sarili yu king dakal a lugal ning kakung kayarian.

³⁰Isubli mu la kaku ngeni deting siudad a sekupan mu at isubli mu ing buis a melikum karing lugal a makalagpus king angganan na ning Judea a sekupan mu.

³¹Nung e mu daptan iti, mamayaran kang atlung pulung libung librang pilak king uli ra, at atlung pulung libung libra pang pilak bilang kabayaran ning kasiran a depat mu at para king pangawala ning buis karing siudad. Nung magkulang ka kaniti, datang kaming makigera keka.

³²Inyang datang ne Jerusalem i Atenobius, ing Kakaluguran ning Ari, mengapamulala ya inyang akit na ing kamalan na ning kabilian nang Simon, ding gintu at pilak a kasangkapan na king lulanan da at ing pibandian na. Inabut ne ing mensahi na ning ari

³³at nganang mekibat Simon, Ala kaming sekupan a bansa da ring aliwang tau o kinuang bandi ra nune mu ing mana mi karing makatua mi a simsam dang ala keng matulid ding kalaban karing milabas a panaun.

³⁴Semantalanan mi ing oportunidad at kinua mi ing mangaintulid kekami.

³⁵Tungkul naman king Jopa at Gezer a tatagalan mu, masiadung maragul ing kasiran a gagawan da reting balen karing kekaming memalen at king bansa mi. Dinan da kang anam a libung librang pilak para kareti.

³⁶E ya mekibat kataya mang amanu i Atenobius bagkus meko yang mikakalabkab a mua. Mibalik ya king ari at binie ne ing pakibat nang Simon, at lerawan na ing kamalan nang Simon at ing sablang ikit na. Mikalabkab ya king mua ing ari.

³⁷Samantala, sinake ya king barku i Trifo at ikua nang mekatakas king Ortosia.

³⁸Tilduan ne ning ari i Cendebeus bilang pekapun ding sundalus king lele dagat at dininan neng sundalung e pakakabayu ampon sundalung pakakabayu.

³⁹Penabilin na ing sabatan ne ing Judea, italakad neng pasibayu ing Kidron at gawan matibe ding pasbul nang dalan, at gerahan na la ding kekaming kabalen kabang ya naman isundu na ing pamanagal na kang Trifo.

⁴⁰Dinatang ya Jamnia i Cendebeus at inumpisa na na lang ligaligan ding kekaming kabalen inyang liban ne ing Judea, at inyang dekap na la at pete ding tau.

⁴¹Telakad neng pasibayu ing Kidron at mibili yang sundalung pakakabayu at aliwa pang sundalus ban makagawa lang pamaglusub at pamagpatrolia karing dalan ning Judea, antimo ing penabilin na ning ari.