Read Kapampangan 1 Maccabees 16 Bible Online

1 Maccabees 16 - Kapampangan bible

1 Maccabees 16

¹Likuan neng Juan a anak nang Simon ing Gezer at pepabalu na kang tata na ing sablang gewa nang Cendebeus.

²Inaus na lang Simon di Juan at Judas, ding adua nang pekamatuang anak. At ngana karela, Ding kapatad ku at aku at ing pamilya nang tata ku pekilaban mi ing labanan ning Israel manibat na inyang kayanakan mi angga na king aldong iti, at karing dakal a oportunidad migtagumpe kaming aliligtas mi ya ing Israel.

³Matua na ku ngeni, oneng ikayu, salamat king Dios, atyu kayu king pangakayanakan yu. Kuanan yu na ing lugal ku at ding king kapatad ku; lage kayu at pakilaban ye ing bansa tamu. Antabayanan na kayu sana ning Dios.

⁴Mekatatag yang aduang pulung libung masibukan a sundalung e pakakabayu at pakakabayu i Juan at linual la ban arapan i Cendebeus.

⁵Kebukas la Modein at maranun lang menulakan para king kapatagan. Karin ding dakal a sundalung e pakakabayu at pakakabayu makasadia lang arapan da la, oneng ating mamilatan karelang metung a ilug.

⁶Migpuestu la ding sundalus nang Juan ban arapan ding kalaban. Apansingan nang Juan king tatakut lang dalakit ding sundalus na king ilug, inya menimuna yang dinalakit. Ikit de ring sundalus na at tikian de.

⁷Pinitna na lang Juan ding sundalus na at uling dakal ya sundalung pakakabayu ing kalaban pinuestu na la ding sundalus nang pakakabayu king libutad.

⁸Tiniup da la ring trumpeta at mesambut ya i Cendebeus at ding sundalus na; dakal la karing sundalus na ding mete. Memulayi la ding mitagan at mibalik king kuta king Kidron.

⁹Mesugat ya king labanan i Judas oneng sindu nang Juan a kapatad na ing pamanagal karing kalaban angga king Kidron a telakad nang pasibayung Cendebeus.

¹⁰Ding pasitakas a kalaban a sundalus memulayi la karing tore da ring marangle ning Asdod. Silaban neng Juan ing siudad. Mete la king aldong ita ding aduang libung kalaban a sundalus. Mibalik yang e ninanu balang king Judea i Juan.

¹¹Tilduan neng Simon a Pekapun ding Pari i Tolomeo a anak nang Abubus ban maging pekapun da ring sundalus para king Kapatagan ning Jerico. Mabandi ya i Tolomeo

¹²uling manuyang neng Simon.

¹³Oneng milalu ing kapagnasan na at buri ne pang sakupan ing mabilug a bansa, at minisip yang paralan ban mate ya i Simon at ding anak na.

¹⁴Migbisita ya i Simon kayabe ding anak nang i Matatias at i Judas karing miyayaliwang balen king metung a lugal ban siasatan da ing pamangailangan da. Miras la Jerico king bulan ning Sebat, ing kalabing metung a bulan king banuang dinalan at pitung pulu at pitu.

¹⁵I Tolomeo a magsadia ban paten ne i Simon at ding adua nang anak tinggap na la ketang malating kuta a ausan dang Dok a pepatalakad na. Dininan na lang maragul a bangketi oneng atin yang tauan a pakasalikut kilub ning kuta.

¹⁶Inyang malasing ne i Simon at ding anak na, linual ya i Tolomeo at ding tauan na king pangasalikut da at pakaespada lang linub king pipanganan nung nu re pete i Simon, ding adua nang anak, at ding mapilan karing utusan na.

¹⁷Metung ya iting karumaldumal a kataksilan; inablasan nang e mayap Tolomeo ing kayapan.

¹⁸Kaybat sinulat ya i Tolomeo king ari at sinabi na ing gewa na. Keting sulat mekisabi yang paralan ne sanang sundalus ban sumaup at king ipailalam ne sa king pamamahala na ing bansa at ding siudad na.

¹⁹Peparalan na lang sulat ding opisyal da ring sundalus ban agkatan na lang makiabe king kayarian a at pengakuanan na lang dinan pilak, gintu, at regalu. Kaybat peparala yang tauan na Gezer ban paten de i Juan,

²⁰at ding aliwa pa ban ipailalam de king upaya ra ing Jerusalem at ing bunduk-bundukan ning Templo.

²¹Oneng ating memulaying minta king Gezer; minuna ya karing tauan nang Tolomeo at belita ra kang Juan king i tata na at ding kapatad na pete da la at king tutubud na lang Tolomeo ding sundalus na ban paten de.

²²Mengapamulala ya i Juan keting balita at uling midinan neng makaunang babala, peparakap na la at pepate ding lalaking tiburan dang paten ya.

²³Ing aliwa na pang depat Juan manibat na kanitang selisian ne i tata na: ding pamakilaban na, ding dapat na a mitmu king tepangan, ing pader a pepalarin na, at ing aliwa na pang arapat na,

²⁴makasulat ngan king istoria na ning pamanungkulan na bilang Pekapun ding Pari.