Read Kapampangan 1 Maccabees 4 Bible Online

1 Maccabees 4 - Kapampangan bible

1 Maccabees 4

¹Mituki yang limang libung sundalus a e pakakabayu at libung piling sundalus a pakakabayu i Gorgias, at likuan de ing kampu itang kabengian.

²Kayabe na la ding lalaking ibat king kuta ning Jerusalem ban mituru karela king dalanan da. Ing planu na ya ing lusuban lang alang kapiadian ding Judio.

³Oneng abalu nang Judas ing planu ra at ya at ding tauan na linual la ban lusuban da la ring sundalus ning ari karin king Emmaus

⁴kabang pakasalbag la pa ding puersa na.

⁵Itang benging ita, inyang luban neng Gorgias at ding sundalus na ing kampu nang Judas, ala lang ikit metung man. Inisip da ing bisa lang tumakas, inya pegumpisan na lang penintun karing bunduk-bundukan.

⁶Inyang saslag ne ing aldo atyu ne i Judas king kapatagan at kayabe na la ding atlung libung tauan na, agyamang e la ngan pakakalasag at pakaespada antimo ing buri da.

⁷Ikit da la ring dakal a sundalus da ring paganu a maki sibukan na king pamakilaban; pakasulud lang baluti at makapadurut la karing sundalung pakakabayu.

⁸Oneng nganang Judas karing tauan na, E yu pitatakutan ing degulan ning karelang bilang ni tatakut kabud sinugud la.

⁹Ganakan yu nung makananu lang miligtas ding makatua tamu king Dagat a Malutu inyang penagal na la ning ari ning Ehipto at ding sundalus na.

¹⁰Ngeni aduan tamu king Ginu ing lunus na. Manalangin tamu ban ganakan ne ing kasunduan na karing makatua tamu at pasambut na la deting dakal a kalaban a atyu king arap tamu ngeni.

¹¹Kanita ra abalu ding sablang paganu king atin yang Dios ing Israel a talapagligtas na.

¹²Inyang ding paganu ikit deng magsadiang makilaban karela i Judas at ding tauan na

¹³linual la king kampu ra ban makilaban. Tiniup da la ring trumpeta da ring tauan nang Judas

¹⁴at mikaras la king labanan. Mesambut la ding paganu at tinakas la king kapatagan

¹⁵at pete da la ring atagal da. Penalukian da la angga Gezer, at king kapatagan ning Idumea, at angga na king Asdod at Jamnia. Ating atlung libu karing pete rang kalaban.

¹⁶Inyang magbalik la di Judas king pamanagal da,

¹⁷ngana karing memalen, E kayu sana matako king pibandian a meyakua karing kalaban; atin pang makapanayang labanan kekatamu;

¹⁸atyu ya kareng makalapit a bunduk-bundukan i Gorgias at ding sundalus na. Talakad tamung matatag at lumaban. Kaybat na nita, malyari yu nang kuanan itang buri yu.

¹⁹Bayu ya meyari king pamagsalita nang Judas dinatang la ding mapilan a kalaban a sundalus a magmanman ibat karing bunduk-bundukan.

²⁰Ikit da reti king mamanakas la ding kayabe rang sundalus at king kapamilatan na ning asuk balu ra king sisilaban de ing kampu ra.

²¹Inyang ikit da ngan iti, mitakutan la at kabud ikit de king kapatagan i Judas at ding sundalus na a makasadia king labanan,

²²tinakas la ngan papunta Filistia.

²³Kanita mibalik ya i Judas ban kuanan na ing pibandian king kampu ding kalaban; menikua yang dakal a gintu, pilak, at asul at muradung tela at aliwa pang mangamal a bage.

²⁴King pamagbalik ding Judio magkanta lang kapasalamatan at kapurian. Ngara: Karapatdapat yang purian ing Ginu uling ing lunus na manatili kapilan man.

²⁵Minie yang maragul a tagumpe karing memalen na ning Israel ing aldong ita.

²⁶Minta la kang Lisias ding mekatakas a sundalung paganu at belita ra ing sablang milyari.

²⁷Mebigla ya at mesira lub i Lisias king abalitan nang mesambut la king labanan ding sundalus na at e re simbut ing Israel antimo ing asahan na at inutus ning ari.

²⁸King tinuking banua tinipun na lang Lisias ding piniling anam apulung libung sundalung e pakakabayu at limang libung sundalus a pakakabayu ban makilaban karing Judio.

²⁹Minta la Idumea at migkampu la Betzur. Pekitagpuan na lang Judas at ding apulung libung lalaki.

³⁰Menalangin ya i Judas inyang ikit na ing sikanan da ring kalaban da. Ngana, Pupurian da ka, O Talapagligtas ning Israel, sigka mu ing pamanialake na ning masikan a higanti king gamat ning talasuyu mung i David, at peintulut mung i Jonatan a anak nang Saul at ing kayanakan a lalaking talapagdala karing armas na ing sambutan da la ring sundalung Filisteo.

³¹King makanyan munamang paralan paintulut mung ing memalen mung Israel sambutan na la ding kalaban na. Ibili mu la ding kalaban king kamarinayan lipat ning sabla rang kapanaligan karing sundalus dang e pakakabayu at pakakabayu.

³²Katmuan mu la king takut; lasawan mu ing sikanan dang lub; pagalgalan mu la king pamigaganaka ra king daratang dang pangasambut.

³³Miragsa la sana ding kalaban king espada ra detang malugud keka, at paintulut mung magkanta lang kapurian keka ding sablang makibalu king lagyu mu.

³⁴Mikaras la king labanan at ating limang libu karing sundalus nang Lisias ding mete.

³⁵Meko neng mibalik Antiokia i Lisias inyang ikit na king masasambut la ding sundalus na at inyang ikit na ing tepangan nang Judas at ding tauan na a makasadiang mate o mie maki dangalan. Karin tinipun yang sundalus a upahan ban ing mas maragul a grupu ding sundalus pasibayu neng luban ing Judea.

³⁶Nganang Judas at ding kapatad na, Ngening simbut ta na la ding kalaban tamu, munta ta na Jerusalem ban linisan ya at italagang pasibayu ing Templo.

³⁷Inya mitipun la ding sablang sundalus at minukiat la king Bunduk ning Zion.

³⁸Tune yang mipaburen ing Templo; melapastangan ya ing altar at mesilab la ding pasbul na. Tinubu ing dakal a dikut at sira-sira la ding kuartu da ring pari.

³⁹Ginabak da ing imalan da at pigkalungkutan dang e mu nanu at biburan da lang abu ding buntuk da.

⁴⁰Migsakab la king gabun at inyang tiniupan da la ring trumpeta menangis la king Ginu.

⁴¹Inutus na kanitang Judas karing mapilan karing sundalus na ing lusuban da la detang makakuta kabang lilinisan na ne man ing Templo.

⁴²Memili ya karetang alang kapintasan karing pari a tapat king Kautusan.

⁴³Pekadalise de ing Templo at leko da la ding batu a dinatan da ring paganu at dela da la king lugal a e malinis.

⁴⁴Pisabi ra nung nanung daptan king altar a pidurulukan ain a lepastangan ding kalaban.

⁴⁵Apikayari da ing lasakan de ban e nia mu magsilbing paganaka karela king kamarinayan a delanan da king gamat da ring paganu. Inya lesakan de ing altar

⁴⁶at linele ding batu king metung a karampatan a lugal ning bunduk-bundukan ning Templo anggang alang datang a propetang sumabi nung nanu ing daptan kareti.

⁴⁷Kaybat, antimo ing aduan na ning Kautusan nang Moises, kinangwa lang batung e metabas at telakad de ing bayung altar a kalupa na ning minuna.

⁴⁸Linarin de lual at kilub ing Templo at telaga da la ding patyu.

⁴⁹Ginawa lang bayung kasangkapan para king pamanyamba at dela de king Templo ing tumpakan-sulu, ing altar para king insenso, at ing lamesa para king tinape ning Templo.

⁵⁰Kaybat dinuluk lang insenso king altar at sinindian da la ring sulu king tumpakan da, at mesala ya ing Templo.

⁵¹Inyang abili da ne ing Tinape ning Panga-atyu Na king lamesa, kebit da la ring tabing; ayari da na ing sabla rang obra.

⁵²Kaybat, itang abak a maranun ning kaduang pulu't limang aldo ning kasiam a bulan, ing bulan ning Kislev, king banuang dinalan apat apulu't walu,

⁵³minie lang ain-sakripisyu a makayagpang king Kautusan king bayung altar ning pidurulukan ain a telakad da.

⁵⁴Iti ya naman ing panaun at aldo inyang lepastangan de ring paganu ing Templo. Telaga de kabang ating magkantang kapasalamatan a babagayan ding alpa at plauta ampon pandereta.

⁵⁵Migsakab la ding sablang tau at simban de at pinuri ing Ginu uli na ning tagumpe a binie na karela.

⁵⁶Walu rang aldo pigselebran ing pasibayung pangatalaga ning altar, king maragul a tula kabang magdala lang ain-a-durulukan at ain-ning-pamisulusulu at ain-a-kapasalamatan.

⁵⁷Geyak de ing arap ning Templo karing gintung korona at mangalating kalasag; binayu da la ring pasbul dalan at ding kuartu da ring pari at dininan da lang pasbul.

⁵⁸Mika maragul a pamagsaya karing memalen uling ikua rang alako ing kamarinayan a pepasari da karela ding paganu.

⁵⁹Pikayari da kanita di Judas at ding kapatad na at ing mabilug a kapulungan ning Israel king balang banua, king panaun a anti kanita, pagselebran de ing pangatalaga na ning altar king mitmung saya at tula kilub ding walung aldo, magumpisa king kadua nang pulu at limang aldo ning bulan ning Kislev.

⁶⁰Kaybat mitalakad lang mangatas a pader at mangatibe tore a makapadurut king Bunduk ning Zion ban kanita ding paganu e la milub at pandamusakan at dinatan antimo ing depat da king milabas.

⁶¹At mibili yang mapilan a sundalus ban guardian de ing Templo. Pepadurutnan neng pader ing balen ning Betzur ban mika kuta la ding memalen na ning Israel a makayarap king Idumea.