Read Kapampangan 1 Maccabees 6 Bible Online

1 Maccabees 6 - Kapampangan bible

1 Maccabees 6

¹Kabang dadalan ya Mesopotamia i Aring Antiocus a Kapat, abalitan ne ing metung a siudad ning Persia a ausan dang Elymais a pikabaluan king mabilug a yatu uli na ning mabandi ya king pilak at gintu.

²Mabandi ya ing templo na; dakal ya gintung baluti, kalasag, at armas a likuan na karin Alexander a anak nang Aring Felipe ning Macedonia, ing minunang diling ari ning Grecia.

³Dinatang ya at pigkapilitan neng sakupan ing siudad at kuanan a pibandian, oneng e na arapat iti uling abalitan da ring tau ning siudad ing kapagnasan na.

⁴Lebanan de at apaurungan de, inya king maragul a kalungkutan migbalik ya Babilonia.

⁵Kabang atyu Persia, dinatang ya ing metung a tubud a magdala king balita king mesambut la ding sundalus a tinubud na Judea.

⁶Masikan ya ing grupung sundalus a tiki nang Lisias inyang sinugud ya, oneng mepilit yang urungnan na la ding kalaban. Mesikan la ding Judio uli da ring asamsam dang armas, gamit, at dakal a aliwa pang bage karing sundalus a simbut da na.

⁷Lesak dia naman itang karumaldumal a telakad nang Antiocus babo ning altar ning Jerusalem at pepadurutnan deng mangatas a pader ing Templo da at antimu rin ing Betzur, ing siudad ning ari.

⁸Melungkut ya at penamdaman nang bina ning ari inyang dimdam na iting balita, at mirate ya uli na ning mebigu ing planu na.

⁹Mikera ya king makabang panaun kabang balik-balikan ne ning matinding kalungkutan angga king akilala na ing malapit niang mate.

¹⁰Inya pepayaus na la ding sablang Kakaluguran na at ngana karela, E ku mipatudtud, masaspak ya ing pusu ku king kalungkutan at pamigaganaka.

¹¹Kukutnan ke ing sarili ku ot tuki-tuki ing kaguluan a daratang kanaku samantalang maganaka na ku man at buri da ring tau ing kanakung pamag-ari.

¹²Oneng ngeni ku la aganaka ding e ustung gewa ku Jerusalem inyang kuanan ku la ding sablang pilak at gintung kasangkapan na king Templo at inyang pekikuanan ku ing e makatuliran a pamakamate karing sablang manuknangan king Judea.

¹³Balu ku king iti ya ing sangkan nung inya malilyari ngeni kanaku iting sablang kadamalasan at ngeni malapit na ku mung mate kening aliwang bansa.

¹⁴Kaybat pepayaus ne i Felipe, ing metung karing paniwalan nang tagapayu, at penibala ne ing mabilug nang kayarian.

¹⁵Binie ne ing korona na, ing balabal, ing singsing nang panatak bilang ari, at ing upayang antabayanan neng ituru king pamag-ari ing anak nang i Antiocus a Kalima.

¹⁶Mete ya ing Aring Antiocus karin king banuang dinalan apat apulu't siam.

¹⁷Inyang abalitan nang Lisias king mete ne ing ari, gewa neng ari ing anak a Antiocus bilang kayalili nang tata na. Ya ing peparagul kang Antiocus at binie ne keting anak ing lagyung Eupator.

¹⁸Samantala, ding kalaban dang atyu king kuta ning Jerusalem sasabatan da no man ding memalen na ning Israel king lugal a makapadurut king Templo. Liligaligan da lang alang tuknang at sasaupan ding paganu.

¹⁹Inya inari na king lub nang Judas ing sukat la ngang magisan mate. Tinipun na la ding sablang memalen ba da lang kubkuban ding atyu king kuta.

²⁰Mitipun la ding memalen at kibkuban de ing kuta king banuang dinalan at limang pulu. Ginawa lang kasangkapan a pangubkub at pamusbus pader.

²¹Oneng ating mapilan a lalaki karing kukubkuban da a mekatakas a kayabe da ring Israelitang ginulut king kautusan da. Minta la king ari at ngara,

²²Angga pa kapilan kayu manaya bayu kayu mablas king milyari karing kabalen mi?

²³Makasadia kaming sumuyu kang tata yu at tukian ding panabilin na ampon pamintuan ding kautusan na.

²⁴Oneng nanung kayapan ing tinggap mi? Ngeni ding kabalen mi ilang meging kalaban mi. Ing katutuan, pete da la ring sablang malyari dang arakap kekami at penako da ing sablang bandi mi.

²⁵Oneng aliwa mu ikami ding migdusa karela; lulusuban da la ngan ding kasiping dang bansa.

²⁶At ngeni, kukubkuban de ing kuta ning Jerusalem at nasa ra ing sakupan de. Pepadurutnan deng kuta ing Templo at ing Betzur.

²⁷Subali mu nung agad kayung kimut, mas dakal pa ing gawan da, at e yu na la apigil pa.

²⁸Mimua ya ing ari inyang damdaman na iti. Tinipun na la ding sablang pekapun da ring sundalus na, ding opisyal da ring sundalus a pakakabayu, at ding paniwalan na karing tagapayu na.

²⁹Kinangwa ya naman karing sundalus a makiupa karing aliwang bansa at karing pulu ning Grecia.

³⁰Ing bilang: dinalan a libung sundalus a e pakakabayu, aduang pulung libung sundalus a pakakabayu, at atlung pulu't aduang elepanting sinane ra king gera.

³¹Dinalan la Idumea at kibkuban de ing Betzur nung nu melambat ing labanan. Ginawa lang kasangkapan a pangubkub, oneng linage la ding Judio; penyilab da la reti at linaban king mitmung tapang.

³²Kaybat inurung na lang Judas ding sundalus na manibat king kuta ning Jerusalem at migkampu la Bet Zacarias, king sumangid ning kampu ning ari.

³³Itang abak a maranun, memalagua lang linakad ding sundalus ning ari king dalan papunta Bet Zacarias, nung nukarin la migpuestu ban makilaban, at tiniupan da la ring trumpeta.

³⁴Sidia da la ring elepante para king labanan king kapamilatan na ning pamipakit da karela king katas a meyakua karing ubas at mulberri.

³⁵Kinalat da la ring elepante karing miyayaliwang grupu da ring sundalus a e pakakabayu. Libu la kataung pakasulud baluti at tangsung helmet ampon limang dalan a piling sundalus a pakakabayu ding kayabe ning balang elepante.

³⁶E de bitasang kakawanian ing elepante nu ya man munta.

³⁷Makabili ya king gulut ning balang elepante ing metung a matibe platapormang dutung a maki paniagka. Atlu la ding sundalus a pakasake karing balang elepante subali pa king magmanehu.

³⁸Makabili la misusumangid da ring sundalus a pakakabayu nung nu la ating paniagka karing sundalus a e pakakabayu kabang papagalan da la ring kalaban.

³⁹Sinlag ya ing kabundukan at kikislap ya anting mitataung api inyang mitangad ya ing sala ning aldo karing tangsu at gintung kalasag.

⁴⁰Ating dake ding dakal a sundalus na ning ari a makakalat king makatas nang dake ning gilid ning bunduk at ating dake a atyu king makababa, oneng banayad la deti at makaayus lang susulung.

⁴¹Mitakutan la ding sablang tau inyang dimdam da ing kalaksing da ring armas da at ing inge a bunga na ning pamanyulung da ring dakal at mayupayang sundalus.

⁴²Sinulung ya king labanan i Judas at ding sundalus na, at agad-agad da lang apate ding anam a ralan karing sundalus ning ari.

⁴³Inyang ikit neng Eleazar Avaran king ing metung karing elepante mas maragul ya karing aliwa at makatakap ya king baluti na ning metung ari, inisip na ing karin ya makasake ing ari.

⁴⁴Dinaun neng Eleazar ing bie na ban sagipan na la ding kabalen na at ban kamtan na ing alang anggang kabantugan.

⁴⁵Matapang yang memulayi papunta king elepanting makalibutad karing metung a batalyun a sundalus a maglakad at siguran na lang pete kayli't wanan ding kalaban, nung inya minurung la ding sundalus a kalaban misusumangid.

⁴⁶Ikua nang mekasulud lalam ning elepante at siksak ne at apate ne. Mipatanan ya i Eleazar king mibulang a mete elepante at mete ya naman.

⁴⁷Oneng minurung la ding Judio inyang ikit da nung nu la anti kasikan ding sundalus ning ari at makasadiang lumaban.

⁴⁸Sinulung ya ing ari at ding dakal nang sundalus ban labanan ding Judio karin Jerusalem, at kibkuban ne ing mabilug a Judea at Jerusalem.

⁴⁹Mekipagkasundu ya karing Judiong manuknangan Betzur a meko na king balen da. Uling kulang ing pamangan karin at e la malyaring mibata king pangakubkub da uling banua ne ning Sabbath at e la menanaman.

⁵⁰Sekupan ne ning ari ing Betzur at milakuan yang metung a grupung sundalus ban banten de.

⁵¹Kanita pepadurutnan de ing Templo at malambat deng kukubkuban. Pepatalakad yang kasangkapan a pangubkub, kasangkapan a pamusbus pader, kasangkapan a panatsang api at batu ampon tandus.

⁵²Ginawa la namang kasangkapan a ipanlaban da karing kasangkapan ding kalaban, uli na niti melambat ing labanan.

⁵³Oneng ala nang pamangan karing bangan da ring Templo uling banua ne ning Sabbath; pengan da ring taung tinakas karing paganung sinalikut Judea ing pamangan a makatambak karin.

⁵⁴Uli na ning maragul a danup misalbag la ding memalen karing karelang bale. Ditak na la mu ding mitagan king Templo.

⁵⁵Abalitan nang Lisias king i Felipe, ing tilduan nang Aring Antiocus bayu ya mete ban turu king anak na king pamagsane bilang ari,

⁵⁶mibalik yang ibat Persia at Media. Mibalik yang kayabe ding dakal nang sundalus ning ari at pakikuanan neng samsaman ing kapamahalan.

⁵⁷Inya agad-agad yang minutus king magsadia na lang mako. Ngana king kayanakan a ari, karing opisyal na, at karing tauan na, Mimina tamu aldo-aldo, magkulang tamu king pamangan, at masikan ya iting lugal a kukubkuban tamu. Subali pa kaniti ating masipit a bage a kailangan lingunan king kapamahalan.

⁵⁸Inya ngeni gawa tamung pamakipagkasundu karing Judio at king mabilug dang bansa.

⁵⁹Paintulutan ta lang tukian da la ring sarili dang kautusan at kaugalian antimo ing sadia rang gagawan. Megumpisa ing heganaganang kaguluan uling mimua la inyang leko ta la ding karelang kautusan at kaugalian.

⁶⁰Masalese neng tinggap ning ari at ding opisyal iting mungkahi inya inalukan na lang pamikasundu ding Judio, at tinggap da ne man.

⁶¹Linual la king kuta da ring Judio inyang ing ari at ding opisyal na tenguanan da ing tukian da la ring aduan na ning pamikasundu.

⁶²Oneng inyang lungub ya ing ari king Bunduk ning Zion at ikit na ing matibe ya ing kuta a lugal ning Templo sinira na ing amanu na at inutus na ing lasakan ya ing pader a makapadurut king Templo.

⁶³Kaybat memalagua yang meko at mibalik king Antiokia nung nu na disnan ing atyu ne king gamat nang Felipe ing kapamahalan ning siudad. Lebanan ne i Felipe at simbut ne king labanan ing siudad.