Read Kapampangan 1 Maccabees 7 Bible Online

1 Maccabees 7 - Kapampangan bible

1 Maccabees 7

¹Inyang banuang dinalan limang pulu at metung, meko ya Roma i Demetrio a anak nang Seleuco a kayabe ding mapilan a lalaki, at sinadsad la king metung a balen lele ning Mediteraneo, at telaga na ing sarili na bilang ari.

²Kabang palub ya king palasyu na ning makatua na, dekap de ring sundalus i Antiocus a Kalima at i Lisias, at nasa ra ing idala da la kang Aring Demetrio.

³Ngana ning ari inyang ipabalu ra iti, E ku la buring akit.

⁴Inya ding sundalus pete da la at i Demetrio ya ing linukluk king tronu.

⁵Kanita ding sablang Judiong ginulut king Kautusan at king Dios a panimunan nang Alcimus a bisang maging Pekapun ding Pari, minta la kang Aring Demetrio.

⁶Dela re iting bintang laban karing aliwang Judio at ngara, Pete na lang Judas at ding kapatad na detang atyu kagulutan yu, at tinabi da kami king kekaming bansa.

⁷Mitubud kayung taung apaniwalan yu; paburen yung munta ya at lawan na ing sablang kasiran a depat nang Judas kekami at king bansa ning ari, at parusan yu la at ding sablang sinaup karela.

⁸Pinili ne ning ari i Bakides, ing metung karing tagapayu na, ing gobernador ning probinsiang Kangatba ning Ilug ning Eufrates. Metung yang marangal a tau king kayarian at tapat king ari.

⁹Tinubud neng kayabe na i Alcimus, ing alang Dios a tilduan nang maging Pekapun ding Pari, at inutus na ing mablas ya karing Judio.

¹⁰Menulakan la Antiokia at linub la Judea a kayabe ning maragul a grupu ding sundalus. Peparala yang tubud kang Judas at karing kapatad na a balamu mo managkat pamakipagkaluguran.

¹¹Oneng inyang ikit neng Judas at ding kapatad na nung nu la anti karakal ding sundalus a darala na, e la meniwala king tubud.

¹²Ating metung a grupung talaturu ning Kautusan a minta kang Alcimus at Bakides a maniawad hustisia.

¹³Deting Hasideano ila ding mumuna karing Judio a ginawang takbang ban makipagpayapa la karela.

¹⁴Atin lang tiwala kang Alcimus uling pari yang ibat king lahi nang Aaron, at inisip da ing e na la ipahamak.

¹⁵Mapayapa lang amanu ding meramdam kang Alcimus at ngana pang sinumpa karela, E mi pagnasan ing manasakit kayu o ding kakaluguran yu.

¹⁶Inyang ikua na ing tiwala ra, peparakap na la ding anam apulu karela at pete na la kilub ning patingapun, antimo ing sasabian na ning Kasulatan,

¹⁷Dumanak ing daya da ring tapat keka, mengakalat la ding bangke ra king kabilugan ning Jerusalem, at alang mitagan metung man ban mangutkut karela.

¹⁸Mitakutan la ding sablang memalen kang Alcimus at Bakides at ngara, E ra balu ing buri nang sabian ning hustisia at ning katutuan. Binie ra ing amanu ra at kaybat lebagan da!

¹⁹Meko ya Jerusalem i Bakides at migkampu ya Bet Zait. Peparakap na la ding mapilan karing tapat a Judio at pati na ding Judiong migkusang migpanig kang Bakides; pepate na la at pepabaldug king malalam a kulkul.

²⁰Binili ne lalam nang pamamahalang Alcimus ing mabilug a bansa, likuananan neng sundalus ban sumaup, at mibalik ya king ari.

²¹Megumpisa na kanita ing pamagkapilit nang maging Pekapun ding Pari.

²²Mekiabe la kang Alcimus ding sablang gagawang gulu king bansa. Ikua reng asupil ing Judea at minie lang maragul a kasakitan karing Judio.

²³Ikit nang Judas king mas grabi ing kaguluan a depat nang Alcimus at ding tauan na kesa king kasiran a gewa da ring paganu.

²⁴Uli na niti, libutan ne ing mabilug a Judea at perusan na la ding sablang lalaking mekiabe kang Alcimus, at pinigil na la detang atyu karing balen ban e la makapunta karing probinsia.

²⁵Inyang ikit nang Alcimus king i Judas at ding kayabe na mesikan la at akilala na ing e na la alabanan, mibalik ya king ari at simbung na lang darapat e mayap.

²⁶Kanita tinubud ne i Nicanor, ing metung karing marangal nang opisyal at maki maragul a mua karing Judio ban gisanan lang paten.

²⁷Minta ya Jerusalem a kayabe ding dakal nang sundalus. Migkunwari yang makikasundu kang Judas at karing kapatad na king kapamilatan na niting mensahi,

²⁸E sana mikakalabanan keka at kaku; datangan da kang kayabe ding mapilan kung tauan ba katang mapayapang makapipagsalita.

²⁹Inyang mikit lang Judas, magalang lang mipagmananu, oneng makasadia lang dakpan de ring kalaban nang Judas.

³⁰Inyang abalu nang Judas king ing pamandalo nang Nicanor metung yang pamaglinlang, migaganaka ya at e ne bisang mekikit pang pasibayu.

³¹Inyang aintindian nang Nicanor king ing balak na metuklas, likuan ne ing Jerusalem ban mikaras lang Judas king labanan malapit Cafarsalama.

³²Ating limang dalan karing sundalus nang Nicanor ding mete at tinakas la ding mitagan king Siudad nang David.

³³Kaybat ning mapilan a panaun minta ya i Nicanor king Bunduk ning Zion. Likuan de ring pari a kayabe da ring mapilan karing manimuna ra ding memalen ing Templo ban mapayapa reng salubungan, at ban apakit da ing ain-a-durulukan a babie da para king ari.

³⁴Oneng ininsultu na la mung Nicanor at pigsisti at pigluran. Migsalita ya king mitmung kapalaluan

³⁵at nganang muang sinumpa, Subali mu nung i Judas at ding sundalus na agad-agad yu lang isuku kanaku silaban ke iting Templo pamagbalik ku kaybat ning tagumpe ku. At meko yang migagaligit king mua.

³⁶Minta la ding pari king patyu at tinalakad lang makayarap king altar at king Templo. Megumpisa lang menangis at ngarang menalangin,

³⁷Ginu, pinili me iting Templo ban maging tagle ne ing lagyu mu at ban maging bale ne ning panalangin at keti ra ka pakitagpuan ding memalen mu.

³⁸Ngeni iyablas mu kami kening taung ini at karing dakal a sundalus na; paburen mung mate la king labanan. E mu kakalinguan ing kalapastanganan a sinabi ra keka at ala kang paintulutan miligtas karela.

³⁹Likuan neng Nicanor ing Jerusalem at migkampu ya Bet Horon nung nukarin la mekiabe ding dakal a sundalus na a ibat king Siria.

⁴⁰Samantala, migkampu ya Adasa i Judas at ding atlu nang libung sundalus. Karin nganang menalangin Judas,

⁴¹Ginu, sasabian na ning Kasulatan king kanitang ding tubud ning metung a ari minta la keka ban lapastanganan da ka, linage ya ing anghel mu at pete na la ding dinalan walung pulu't limang libu karing sundalus na.

⁴²Makanyan munaman ing gawan mu karening dakal a sundalus a atyu arapan mi at ipabalu mu karing sabla ing parusan me i Nicanor uling lepastangan ne ing banal mung Templo. Parusan me ketang mangaintulid king e ustung depat na.

⁴³Mikaras la king labanan ding aduang puersa king kalabi nang atlu ning bulan ning Adar at maragul ing pangasambut ning puersa nang Nicanor. Ing minunang diling mete king labanan ya mismu i Nicanor.

⁴⁴Inyang ikit deng mete i Nicanor ding sundalus na, binili da la ring armas da at tinakas la.

⁴⁵Pepatingapun da no mang tegalan ding Judio manibat Adasa angga na Gezer. Kabang tutukian da la ring kalaban da alang tuknang ing tiup da ring trumpetang mamaus king labanan.

⁴⁶At linual la ding lalaki ibat karing baryung makapadurut Judea at ibat king misusumangid lisuban da la ring tatakas a kalaban. Mepilitan lang magbalik karing Judio a tatagal karela at mete la ngan king labanan ding kalaban. Alang miligtas metung man.

⁴⁷Kinua da ring Judio ing melakuan a pibandian at tibtab de batal i Nicanor at itang wanan nang gamat a inatiat na king mitmung kapalaluan. Dela re Jerusalem ing buntuk na at ing gamat na ban payalbe karing tau.

⁴⁸Mika maragul lang pamitutula ding Judio. At pigselebran de ing aldo a ita king mitmung saya.

⁴⁹Pikayari da king ing aldong ita mipagselebran ya balang banua, neng kalabi yang atlung aldo ing bulan ning Adar.

⁵⁰Mika kapayapan ya king makuyad a panaun ing bansa ning Juda.