Read Kapampangan 2 Maccabees 4 Bible Online

2 Maccabees 4 - Kapampangan bible

2 Maccabees 4

¹I Simon a mebanggit na, itang taung migsalita laban king bansa na tungkul king salapi, migsalita ya namang kalaraman tungkul kang Onias. Sasabian na king i Onias ya ing menampalasan kang Heliodoro at ya ing penibatan na ning sablang kaguluan.

²E ya tatakut tulduan ne i Onias anting magtangkang laban king gobiernuiting Onias a e mu ing minie yang saup king Jerusalem at dipensa ne ing Templo, nune pignasan na pa ing mipamintuan la sana deng kautusan.

³Ing pamipate meging matindi angga king ing metung karing talatuki nang Simon a pagkatiwalan na, mekamate yang tau.

⁴Inyang akilala nang Onias king ing pamipate dang Simon mapanganib na at king i Apolonio a anak nang Menesteo, ing gobernador ning Cele-siria at Fenicia, susubung ne pa i Simon king dapat nang e mayap,

⁵minta yang dinalo king ari. E ya dinatang ban sangkanan na la ding kabalen na, nune anting taung maki malasakit king kapakanan da ring sablang Judio, bilang metung a makabansa at memalen.

⁶Ikit na king nung e ya mamilatan ing ari e mika kapayapan at e na tuknangan Simon ing kamulangan na.

⁷Kaybat na nita, inyang mete ne i Aring Seleuco, meging ari ya i Antiocus a kakilala da king lagyung Epifanes, i Jason a kapatad nang Onias ya ing meging Pekapun ding Pari king kapamilatan na ning e ustung paralan.

⁸Pintalan ne ing ari at kaybat pengakuanan neng dinan aduang pulu at pitung libung librang pilak at kaybat anam pang libu a ibat king paintungulan a buis.

⁹Pengaku na namang Jason ing karagdagan pang labing metung a libu aduang dalan limang pulung librang pilak para mika kapaintulutan yang patalakad metung a pipamialungan, nung nukarin malyari lang magsane ding kayanakan a lalaki, at buri na la namang mayaus memalen na ning Antiokia ding tau Jerusalem.

¹⁰Dininan neng kapaintulutan ning ari, at kabud ikua ne ing katungkulan Pekapun ding Pari, inutus na ing tukian da ring Judio ing ugali da ring Griego king karelang pamibiebie.

¹¹Leko na la ding pribilegio a ikua nang Juan para karing Judio ibat karing minunang ari ning Siria. (I Juan ya i tata nang Eupolemus a kaybat minta Roma ban gawang pamakikaluguran at pamikampi.) Leko na la naman ding ugaling Judio at inalilan na karing bayung ugali a labag king Kautusan.

¹²E meluat pepatalakad ne ing metung a pipamialungan king kabitisan na ning bunduk-bundukan na ning Templo at tinaid na la ding mayap dili karing kayanakan a lalaki ban tukian ing ugali da ring Griegong makiabe karing miyayaliwang pialung.

¹³Uli na ning alang kalupa ing e mayap nang dapat Jason, itang alang Dios at meging Pekapun ding Pari king e ustung paralan, miras ing kasusukdulan ning pamanuki ra king pamibiebie ra at panugali da ring Griego

¹⁴angga na king pati ding pari pepaburen da ing katungkulan da. Milako la interes karing kasuyuan king Templo at pepaburen da na ing pamanain. Matula lang sinaup king gastus na ning eskwela ning batbatan at kabud miyabie ya ing kapabaluan mabilis lang pupunta ban makiabe karing pialung a labag karing kekaming Kautusan.

¹⁵E ra na dininan pansin itang lalawan dang maulaga ding makatua da bagkus ing pigmalasakitan da ila ding parangal da ring Griego.

¹⁶Inya digpa karela ing mangabayat a kasakitan, uling ding mismung taung ing pamibiebie ra at panugali ya ing buri dang apusan ila na pin man ding meging mabagsik dang kalaban.

¹⁷E mayan a bage ing labagan la ding Kautusan ning Dios, antimo ing mayakit karing panaun a datang.

¹⁸Misan inyang tegunan na la ning ari ding pialung a mararapat Tiro balang kalimang banua,

¹⁹ing alang atdung i Jason, mitubud yang lalaking ibat Jerusalem a mibibilang memalen ning Antiokia ban magdalang aduang pulu't aduang libu at limang dalan a librang pilak ban pamayad king metung a ain-sakripisyu king kikilalanan dang dios a i Hercules. Agyang deting lalaki e ra isipan ing karapatdapat ing gamitan ing anti kaniting maragul a alaga para king ain-sakripisyu, inya

²⁰ding alagang makatalaga king ain-sakripisyu kang Hercules ginamit da la para king pamipagawang barkung panggera.

²¹Inyang i Apolonio a anak nang Menesteo mituburan yang munta Ehipto ban tumagun king pangakorona nang Filometor bilang ari, abalitan nang Antiocus ing laban ya i Filometor karing palakad na. Migaganaka ya i Antiocus king kapanatagan na ning sarili nang kayarian, inya minta ya Jopa at kaybat tinaglus ya Jerusalem.

²²Tinggap neng Jason at ning siudad king labis-labis a parangal a maki sulung pakasindi kareng tukil at king maragul a tula. Manibat Jerusalem penimunan na lang Antiocus ding sundalus nang papunta Fenicia.

²³Kaybat ning atlung banua, tinubud neng Jason i Menelao (kapatad neng Simon a minunang mebanggit na) ban magdalang salapi king ari, at ban aduan na ing pasya na karing dakal a maulagang bage.

²⁴Inyang talakad ne arap ning ari, ikua na ing mayap nang pilubluban ning ari king kapamilatan na ning pepakit nang kayupayan, at minie yang labis aduang pulu't aduang libu at limang dalan a librang pilak kesa karing binie nang Jason. Ikua na ing panga Pekapun ding Pari.

²⁵Inya migdala yang papelis a ibat king ari i Menelao a patutu king ya ing Pekapun ding Pari. Oneng ala neng aliwa pang kayapan ban maging karapatdapat ya bilang Pekapun ding Pari. Atyu kang Menelao ing ugali na ning taksil at mabangis yang anti ing malyap a animal ning gubat.

²⁶Inya i Jason a memirait king sarili nang kapatad ban milako ya king panga Pekapun ding Pari mepilitan yang tumakas king bansang Ammon.

²⁷Menatili yang Pekapun ding Pari i Menelao, oneng e na tiparan ing pangaku nang munie salapi king ari.

²⁸Makanyan man i Sostratus, ing pekapun ning kuta ning Jerusalem, uling katungkulan na ing singilan na la, ala yang patugut sisingil karing salapi. Inya king katataulian, deting adua meyaus la ban marap king ari tungkul keting bage.

²⁹Likuan neng Menelao ing kapatad nang i Lisimaco bilang pansamantalang Pekapun ding Pari, at i Sostratus naman likuan ne ing kuta lalam nang pamamahalang Crates, ing pekapun da ring upahan a sundalung ibat Cyprus.

³⁰Samantala, mig-rebeldi la ding memalen da ring siudad ning Tarsus at Malus karin Cilicia uling binie na la ning ari deting siudad bilang regalu king babaing kasese na a i Antiokis.

³¹Inya likuan ne ning ari bilang manimuna i Andronico, ing metung karing matas nang opisyal, at memirapal yang minta Cilicia ban ibalik na ing kaayusan.

³²Semantalanan nang Menelao iting oportunidad at dininan ne i Andronico karing mapilan a gintung pinggan a kasangkapan ning Templo a kinua na. Mekapisali neng mapilan kareti king Tiro at karing aliwa pang kasiping a siudad.

³³Inyang abalitan na iting Onias, tinakas ya at sinalikut king metung a templo king Dafne a malapit king siudad ning Antiokia at karin na bilalag ing depat nang Menelao.

³⁴Kanita lepitan neng lihim Menelao i Andronico at inawad na ing paten ne i Onias. Inya minta ya i Andronico kang Onias at alinlang ne kapamilatan na ning malugud nang pamanialubung at pangakung e ya numanu balang. Agyamang atin yang alinlangan i Onias, ikua nia mu ring alinlang Andronico ban mako king templo a pisalikutan na, at agad-agad neng pete alang lunus.

³⁵Dakal lang Judio at paganu ding mimua uling pete re i Onias.

³⁶Inya kabalik na ning ari ibat king sakup ning Cilicia, pintalan de ring Judiong atyu Antiokia at rineklamu ra iting alang matulid a pamakamate. Dakal la naman karing paganu ding makanyan a pamisip tungkul keting mepalyaring pamakamate.

³⁷Maragul nang penamdaman at kelungkut ning Aring Antiocus angga king mipakiak ya inyang aganaka na ing kabiasnan na at ing disiplina na ning meyangu-bie Onias.

³⁸Uli na ning maragul nang mua, ginabak neng Antiocus ing balabal nang purpurang Andronico, linubas ne, at pepalakaran ne king mabilug a siudad angga na ketang lugal nung nune pete i Onias. Karin ne pepapate Antiocus iting makamate tau. Perusan ne ning Ginu i Andronico agpang karing krimen a depat na.

³⁹King pamakisabuatan nang Lisimaco king kapatad nang i Menelao, penakawanan ne ing Templo karing dakal nang kasangkapan a gintu. Inyang miras ing balita karing tau mitipun-tipun la laban kang Lisimaco.

⁴⁰Uli na ning mua da ring memalen at mabayat na ing mapigil la pa, peparala yang atlung libung paka armas a tau i Lisimaco ban lusuban da la. Penimunan na lang Aurano, ing taung kabud na metua a ala namang beluan.

⁴¹Inyang ikit da ring Judiong atyu king patyu ning Templo ing malilyari, memangua lang batu at pirapirasung dutung o kaya kasakmal a abung ibat king altar at pemasibas da iti kang Lisimaco at karing tauan na.

⁴²Dakal la ding mesugat, atin pang mete karing tauan na at misambulat lang tinakas ding aliwa. Ing mapanako karing sagradung kasangkapan, i Lisimaco, pete de siping ning pisisinupan bandi ning Templo.

⁴³Uli na ning mengapalyari misampa lang dalum laban kang Menelao.

⁴⁴Inyang datang ya ing ari king siudad ning Tiro, peparala lang atlu katau ding manungkulan Jerusalem ban misampa lang dalum laban kang Menelao.

⁴⁵Inyang ikit na ing masasambut ya king kasu na, sihulan neng maragul a alaga i Tolomeo a anak nang Dorymenes ban agkatan neng magpanig ya ing ari kang Menelao.

⁴⁶Inagkat neng Tolomeo kanita ing ari ban magpatingangin kilual at karin ne inagkat magbayu isip ing ari.

⁴⁷Inatulan neng alang kasalanan ning ari i Menelao, ing penibatan ning sablang kaguluan, king dalum a simpa ra laban kang Menelao. Oneng ding atlu katau, a agyang ding mabagsik a Esita nung ila ding minatul king kasu, mipayalan la sang kasalanan; ngeni ila ding mesentensiang mate.

⁴⁸Ding atlu katau a menalakaran para king karelang siudad at para karing karelang kabalen, at ding sagradung kasangkapan a mepanako king Templo, ila ding agad at e makatuliran dang pete.

⁴⁹Makanyan man, ba rang apakit ding mapilan a tau Tiro ing e ra tula ing pangapate ra dininan da lang marangal a pangakutkut.

⁵⁰Uli na ning tako da ring atyu king upaya menatili ya king puestu na i Menelao. Lalu yang e meging mayap aldo-aldo at ya ing e mayap diling kalaban ding mismung kabalen na.