Read Kapampangan 2 Maccabees 6 Bible Online

2 Maccabees 6 - Kapampangan bible

2 Maccabees 6

¹E melambat kanita, tinubud ne ning Aring Antiocus ing metung a taung maki idad na a tau Atenas ban pilitan na lang gumulut ding Judio king karelang relihiun at king panugali da ring makatua da.

²Dinatan nia naman ing Templo kapamilatan na ning pamitalaga na kang Zeus, ing kikilalanan dang dios ning Olimpia, at italaga ing templo king Bunduk ning Gerizim kang Zeus, ing dios a mapagmalasakit karing dayuan, antimo ing kaugalian da ring taung manuknangan karin.

³Sobra na at e ra na apibata ing pangalupig a daralanan da.

⁴Ginamit de ring paganu ing kilub ning Templo anting karelang piinuman alak at king miyayaliwang manong a dapat. Migkusuelu la karing babaing magtinda king karelang katawan at sipingnan da la keting banal a lugal. Linub da la naman ding bage makabawal,

⁵at inain da karing altar ing bage babawal na ning Kautusan.

⁶Mibawal munaman ing pamanggalang king Aldo ning Sabbath o pagselebran ding karelang piesta o tanggapan king sarili da ing ila Judio la.

⁷Karing bulan a pagselebran da ing kebaitan ning ari, pemuersa da la ring Judio ban kanan da ing bituka da ring animal a yayain da; at king aldo na ning kikilalanan dang dios ning alak, i Dionisio, sapilitan lang magkoronang yedra at tuki king prusisyun.

⁸Uli na ning kausukan da ring tau Tolemaida mika kautusan karing makasiping a siudad da ring Griego king pilitan da lang ipakan karing Judio ding bituka da ring misakripisyu

⁹at paten la ding e bisang tuki king pamibiebie da ring Griego. Mayan mung akikilala king mabayat la ding aldo daratang a arapan da.

¹⁰Alimbawa, adua lang babai ding delum da uling pepasirkunsisyun da la ring anak da. Binitin da la ring anak da king salu ra at pirusisyun da la, at kaybat bildug da lang ibat king pader ning siudad.

¹¹King aliwa namang pamikatagun sinabi ra kang Felipe king ating Judio a mitipun karing kueba a malapit Jerusalem ban pagselebran de ing Aldo ning Sabbath. Lisuban na lang Felipe at silaban no ngang mabie. Uli na ning maragul dang kagalangan king Aldo ning Sabbath e ra pigdipensa ding Judio ing sarili da.

¹²Aduan ku karing talabasa ing e la sana masisira lub kareting karumaldumal a merapat. Pibulayan yu namu king iti paralan na ning Ginu ban parusan na la ding memalen na, e ban siran.

¹³Ing katutuan, metung yang tanda ning ganaka na ing agad-agad neng parusan ing tau king kasalanan na kesa king manaya ya pang malambat a panaun.

¹⁴Ing pamakiutus na kekatamu ning Ginu e na kalupa ning daraptan na kareng aliwang bansa: mibabata yang manaya angga king mibabad la king pamikasala ra bayu na la parusan,

¹⁵oneng parusan na na katamu bayu ta pa mikasalang dakal.

¹⁶Inya pane yang malulunus kekatamung sarili nang memalen. Agyamang parusan na katamu kapamilatan da ring sakuna, e na katamu mu rin paburen.

¹⁷Binggitan ku la mu deting mapilan a bage bilang pamigaganaka. Isundu ku ne ing kanakung istoria.

¹⁸Ating metung a lalaking maki idad na a bina rang gagalangan bilang talaturu ning Kautusan; Eleazar ing lagyu na. Pipilitan deng ibuklat ne ing asbuk na ban mangan karning babi.

¹⁹Uli na ning pinili na ing mate yang maki dangalan kesa king bie maki dinat, inapsa na at kusang lub yang pepabarug

²⁰antimo ing sukat dang daptan ding maki tetagan; tanggian da ing mangan la king babawal ning Kautusan agyamang nu anti ing lugud da king bie ra.

²¹Alang-alang mu man king malambat da nang pamikaluguran pekisabian deng lihim ding opisyal a mamahala kaniting ain-sakripisyu king magdala yang karni ketang e makabawal kanan a ya mismu ing misadia. Sinabi ra kang Eleazar king kunwari kanan ne ing karning miyain antimo ing inutus ning ari.

²²King makanyan a paralan na aligtasan ing kamatayan: tanggapan na ing aluk dang ganaka a binunga ning malambat da nang pamikaluguran.

²³Oneng i Eleazar ginawa yang marangal a pasya a karapatdapat ketang puti na na ning buak na at ketuan ning bie na. King kabilugan ning bie na mebie ya king ganap a kapamintuan karing banal nang Kautusan ning Dios. Inya nganang mekibat, Paten yu na ku keti at ngeni na.

²⁴E karapatdapat kening idad ku ing makanyan a pamaglinlang. Dakal la karing kayanakan ding misip king aku, king idad kung siam apulung banua, lingad ku ing kasalpantayanan ku.

²⁵Nung magkunwari kung kanan ku ining karni ba ku mung kumaba bie, magdala iting kamarinayan kanaku at maging kasangkapan ku king pangalili da ring kayanakan.

²⁶Malyari king panaun ngeni ing apangilagan ku ing parusa ning tau, oneng mabie ku man o mete, e ku makatakas king gamat ning Mayupayang Dios.

²⁷Inya nung masikan ku lub tanggapan ing kamatayan ngeni, apakilala ku ing pengaintuliran ku ing makabang bie.

²⁸Lakuanan ku lang mayap a alimbawa ding kayanakan ban aturu ku la king maligaya at marangal a pamananggap king kamatayan alang-alang karing gagalangan tamu at banal a Kautusan. Kaybat na lang asabi deting bage, dela ra ne ban parusan.

²⁹Detang king milabas pang penandit a pepakit kayapan, ngeni meging kalaban na la uling para karela migsalita yang anting metung a taung e ustu pamisip.

³⁰Inyang malapit nia mung mate king barug a tinggap na, mengisnawa yang malalam i Eleazar at ngana, Atyu king Dios ing heganaganang banal a beluan. Balu na king malyari kung apangilagan ing makatakut a kasakitan at kamatayan, oneng balu na naman king masaya ku lang pibata ding bage uli na ning gagalangan ke.

³¹Mete ya i Eleazar, oneng ing tetagan na arap ning kamatayan e makalinguan anting mayap a alimbawa, e mu karing kayanakan, nune king mabilug a bansa munaman.