Read Kapampangan 2 Maccabees 8 Bible Online

2 Maccabees 8 - Kapampangan bible

2 Maccabees 8

¹Lihim yang minta kareng baryu i Judas Macabeo at ding kayabe na. Inaus da la ring kamaganak da at menagkat la pa karing aliwang menatiling tapat king Judaismo angga king mekatipun lang anam a libu katau.

²Inawad da king Ginu king saupan na la ding memalen na a ngeni lulupigan da ring heganaganang bansa, king malunus ya sa king Templong dinatan da ring taung alang Dios a katawan,

³at malunus ya sana king Jerusalem a ngeni lasak na at malapit nang mipatag king gabun.

⁴Penalangin da naman ing ipakit na ing kasaman na ing e mayap kapamilatan na ning pamagbengansa na karetang makamate karing memalen na, ing alang lunus dang pamakamate karing anak a alang kasalanan, at pamagsalita rang e mayap laban king Ginu.

⁵Kabud atalakad neng Judas ing grupu na, e ra ne simbut ding paganu uling ing mua ning Ginu laban king Israel miyalilan lunus.

⁶Bigla na lang lisuban Judas ding balen at baryu at silaban na la. Abihag na la ding piling puestu at mebigla la king pangasambut da ring kalaban na.

⁷Ikit na king lalu yang matagumpe neng bengi. Pisasabian da nu man karin ing tepangan na.

⁸Inyang akilala nang Felipe king ding lati-lati nang tagumpe Judas bibilis la datang, silatanan ne i Tolomeo, ing Gobernador ning Cele-siria at Fenicia; maniawad yang saup ban idipensa na ing kapakanan na ning kayarian.

⁹Agad neng tilduan Tolomeo i Nicanor, ing anak nang Patroclus, kayabe ya karing piling grupung makayangat karing Kakaluguran ning Ari, at tinubud neng pamuntuk da ring ating aduang pulung libung sundalus a ibat karing miyayaliwang bansa ban paten ya ing mabilug a lahing Judio. Tilduan nia namang Tolomeo i Gorgias, ing metung a heneral da ring sundalus a dakal na sibukan king labanan.

¹⁰Planu nang Nicanor ing bayaran na la ding dinalan limang pulung libung librang pilak a utang nang buis ning Aring Antiocus king Roma kapamilatan da ring abli na karing Judiong bihag a pisali da anting ipus.

¹¹Inya agad neng pepadalang amanu karing balen lele ning dagat; babalita na karela king mamisali yang Judio a kulang pa king metung a librang pilak ing bayad king balang metung. Oneng e na balu ing kayatulan a ipagpa na ning Dios a Mayupaya king pangatau na.

¹²Abalitan nang Judas king daratang ne i Nicanor; belita na karing tauan na king atyu ne ing kalaban.

¹³Kinawani la at tinakas ding mataloti a e maniwala king hustisia na ning Dios.

¹⁴Pisali da ring aliwa ing makatagan dang pibandian, at abe-abe lang menalangin king Ginu king iligtas na la sana kang Nicanor a alang Dios a katawan, at memisali na karela anting ipus bayu la pa miyarapan king labanan.

¹⁵Penalangin da king nung ing Dios e na buring daptan iti alang-alang karela, marahil mabisa yang iligtas na la alang-alang king kasunduan a gewa na karing makatua da, at uli na ning ya ing mayupaya at makapagmulalang Dios a minaus karela ban maging memalen na.

¹⁶Tinipun na lang Judas ding talatuki nang anam a libu king kabilangan. Pepasiknangan na la lub king e la sa matatarantang tatakas arap da ring kalaban o mitatakutan karing dakal a sundalus a lulusub karela a ala namang matulid a sangkan. Bagkus lumaban la king mitmung tepangan,

¹⁷at e ra kakalinguan ing e ustung depat ding paganu laban king Templo, at nung makananu reng masolung pepasakitan ing Jerusalem subali pa king piglako da ing sadia rang kaugalian ding Judio.

¹⁸Nganang Judas, Manalig la karing karelang armas at king sikanan dang lub, oneng itamu, manalig tamu king Dios a Mayupaya a makapate e mu karing sundalus nune king mabilug a yatu king metung nang tangu ning buntuk na.

¹⁹Kaybat sindu na lang selese karela ding panaun inyang seupan na la ning Dios ding makatua na: nung makananung kanitang panaun nang Senakerib, dinalan walung pulu at limang libu la ding kalaban a mete,

²⁰at nung makananung ketang misan king Babilonia inyang ding walung libung Judio seupan da la ring apat a libung tau Macedonia, at simbut da la ring dinalan aduang pulung libung tau Galacia, at ikua ra ing dakal a pibandian. Iti milyari ngan uli na ning saup ning Dios.

²¹Mesikan la lub ding tauan nang Judas karing amanu na at makasadia na lang mate para karing kautusan da at para king bansa ra. Kaybat gewa na lang apat a grupu ding sundalus na

²²a maki libu limang dalan a katau ing balang metung, at ing sarili na at ding kapatad na, i Simon, Jose at i Jonatan bilang pamuntuk ning balang metung.

²³Kaybat neng pepabasang masikan ing banal a libru kang Eleazar, binie ne ing senias para makilaban na inyang ikulisak na: Saupan na katamu ning Dios! at ya mismu ing menimuna laban kang Nicanor.

²⁴Kayabe re king labanan ing Dios at pete da la ring maygit siam a libu karing kalaban. Sugatan la at e na la malyari ding mas dakal at tinakas la ngan ding sablang kalaban.

²⁵Kinua da la ring salapi da retang taung dinatang ban saliwan da la anting ipus. Kaybat malambat da la ring penagal ding kalaban angga king kailangan na lang magbalik uling

²⁶malapit na ing oras ning pamagumpisa ning Aldo ning Sabbath.

²⁷Kaybat da lang tinipun ding armas da ring kalaban at kinua ing pibandian da ring mete, pigselebran de ing Aldo ning Sabbath. Minie lang makaba at masikan a pasalamat at kapurian king Ginu uling iningat na la king kapayapan angga ketang aldong ita, ing mumuna nang tanda ning lunus na.

²⁸Kalabas ning Aldo ning Sabbath, pemie ra ing mapilan king ikua rang pibandian karing dinalan pangalupig at karing babaing mebalu at ulila; at pipartian-partian da ing mitagan karing karelang pamilya.

²⁹Kaybat, miyabe-abe lang menalangin king malunusan a Dios; inawad da ing ibie na sa ing ganap dang pangasut ding talasuyu na.

³⁰Kaybat na nita, lebanan da la ring sundalus nang Timoteo at Bakides, at pete da la ring maygit aduang pulung libu karela. Asamsam da la ring mapilan a makamatas a kuta, at dakal a pibandian ing ikua ra at paraparehu dang pipartian-partian karela at karing dinalan pangalupig, ding babaing mebalu, ding ulila, at pati na ding mangatua nang lalaki.

³¹Maingat da lang tinipun ding armas da ring kalaban at selikut da la karing piling lugal; at dela ra Jerusalem ing tagan king ikua ra karing kalaban.

³²Pete de ing pekapun da ring sundalus nang Timoteo, ing taung alang Dios a katawan a dinapat king dakal a kasakitan karing Judio.

³³Kabang pagsayan da ing tagumpe da king karelang kabisera, silaban da lang mabie ding menyilab karing sagradung pasbul dalan, pati na i Calistenes a sinalikut king metung a malating bale. Makanyan nang tinggap ing parusang mangaintulid karing e mayap nang dapat.

³⁴King makanyan a paralan, ing e mayap a i Nicanor a migdalang libung mangalakal ban sali karing Judio,

³⁵mesambut ya uli na ning saup ning Dios karing taung linawe nang mababa uri. Inugse ne ing masanting nang unipormi at antimong takas a ipus magdili-dili yang tinakas. Masuerti ya pin miras ya Antiokia kaybat dang megisan mete ding sundalus na.

³⁶Ing taung mignasang bayaran na ing utang na king Roma kapamilatan na ning pamipisali na karing memalen ning Jerusalem, pepakit na king e la malyaring sambutan ding Judio. Ing Dios ya ing mayupaya dang Talaingat, uling pemintuan da la ring kautusan a binie na karela.