Read Kapampangan 2 Maccabees 9 Bible Online

2 Maccabees 9 - Kapampangan bible

2 Maccabees 9

¹King panaun a ita, magulu ing pamanatras nang Antiocus manibat king Persia.

²Liban ne ing siudad ning Persepolis at pekikuanan neng panakawanan ing templo at sakupan ing siudad. Kinangwa lang armas ding memalen at lebanan de, at mepilit lang minurung king kamarinayan ding sundalus na.

³Inyang miras ya Ekbatana, belita ra kang Antiocus ing milyari karing sundalus nang Nicanor at Timoteo.

⁴Mikalabkab ing mua na at inari na king lub na ing papamayaran na la ding Judio king pangasambut na. Inya inutus na king magmanehu king karu na ing e ya tutuknang anggang e ya miras Jerusalem. E na balu king ing kayabe na king lakad na ya ing pamanatul ning Mayupaya. King ketasan nang Antiocus ngana, Karas ku Jerusalem, gawan ke iting metung a maragul a kutkutan para kareng Judio.

⁵Oneng ing Ginu a manakit king sabla, ing Dios ning Israel, pepagpa ne ing metung a e mu akakit a barug a makamate. Kabud asabi na la deting amanu, digpa ya ing mataram a sakit king bituka na a alang pangapaldan

⁶metung a parusang karapatdapat king metung a taung memarusa king makatakut a paralan karing aliwa.

⁷Makanyan man, e mebawas ing kesiasan nang buntuk; ing ketasan na anting aping lulual king asbuk na laban karing Judio. Kaybat nang binie ing utus a bilisan pa ing salusu ning karu kanita ne man mebaldug, at king pangabagsak nang masikan mengalisia-lisia la ding sablang pikalukaluan ding butul na.

⁸King pamaniwala na king maygit ya king kaninu pa man isipan na pa ing autusan na ing alun ning dagat at atimbang na la ding matas a bunduk. Ngeni kailangan ing ibuat de king metung a pagkeran. Makanyan mipakilala ing upaya na ning Dios karing sabla.

⁹Maging ding mata na niting taung alang Dios a katawan kukulam la karing ulad, at kabang mabie ya pa at magkakasakit, mabuluk na ing laman na, inya kebulukan la ding sablang sundalus na.

¹⁰Ala metung mang makalapit ban ibuat de. Kapilan pa mu bala na atalan na la ding batuin.

¹¹Maragul a kalungkutan ing digpa kang Antiocus at alang tuknang ing sakit a panamdaman na a pepagpa na ning Dios king katawan na. Inya mekapibalak ya at mebawas ing ketasan na.

¹²Inyang ya mismu e na na apibata ing buluk na ngana, Matulid king pailalam na ing sarili na ning balang tau king Dios, at e na isipan ing makipante ya king Dios.

¹³Miyangganan na kanita ing lunus na ning Ginu kang Antiocus, inyang iting alang silbing tau ginawa yang pangaku king Ginu. Ngana,

¹⁴Tingka ku ketang misan ing ipatag ke king gabun ing Jerusalem at gawan a kutkutan a mitmung Judio ing banal a siudad a ita, oneng ngeni dedeklara keng siudad a malaya.

¹⁵Binalak ku ing iyatsa la ding bangke da ring Judio at ding anak da anting pamangan para karing ayup at animal uling e ku man inisip ing karapatdapat lang ikutkut, oneng ngeni nasa ku ing dinan lang pamikatagun kalupa da ring tatamasan ding memalen ning Atena.

¹⁶Ing banal a Templo a penakawanan ku karing sagradu nang kasangkapan, palamutian ke karing masanting a regalu at alilan ku la ding banal a kasangkapan karing mas masanting pa. Akung mamayad king gastus na ning pamanain.

¹⁷Subali pa kareti, maging Judio ku at puntalan ku la ding sablang lugal a ating manuknangan ban ibalita ku ing upaya na ning Dios.

¹⁸Inyang e tutuknang ing panamdaman nang sakit uling perusan ne ning Dios king parusang tinggap na, melungkut ya at sinulat ne ing makatuking sulat para karing Judio:

¹⁹Ibat ya iting sulat kang Aring Antiocus at para karing Judio ya a gagalangan kung sasakupan. Tanggapan yu ing mapali kung atu at mayap a kapagnasan para king masanting yung kapanamdaman at mayap a kabilian.

²⁰Pagnasan ku king ikayu at ding pamilya yu ing atyu kayu king masanting a kabilian at masalese ing sabla. Ing kapanayan ku atyu king Dios,

²¹at matula kung agaganaka ing kagalangan yu at ing ganaka a pepakit yu kanaku. King pamanuli kung ibat Persia, digpa kanaku ing mabayat a sakit, inya inisip ku ing magumpisa kung gawang paralan para king ikakayap yu ngan.

²²E naman uli na ning ala na kung kapanayan kumayap bagkus maragul ing kapaniwalan kung kumayap ku.

²³Agaganaka ku pa king i tata ku, balang munta yang makigera king dane nang aslagan ning Ilug ning Eufrates, tutulduan ne ing maging kayalili na,

²⁴ban kanita, nung atin mang e asahan a malyari o nung ating mang matsurang balitang datang, e la maligalig ding sasakupan na anti na ning balu ra nung kaninu ya malakuan ing kayarian.

²⁵Subali pa kanita, balu ku king ding pamuntuk a atyu king angganan ning kanakung kayarian pane lang makabante king oportunidad at makapanaya la king nanumang malyari. Uli na niti, tilduan ke ing anak kung i Antiocus ban manalili kanaku bilang ari. Maralas ing pigkatiwala ke at pekisabi king lingap yu neng panaun da ring pamandalo ku karing probinsia dane aslagan ning Eufrates. Tanggap ya naman kopia na niting sulat.

²⁶Ngeni mapilit kung aduan karing balang metung kekayu king e yu la sana kakalinguan detang mayap a bage a gewa ku kekayu, karing balang metung kekayu at para king bansa, at isundu yu ing mayap yung panlalawe kanaku at king anak ku.

²⁷Maragul ku kapaniwalan king tukian na ing palakad kung bana-banayad at ganaka at agpangan na ing kekayung kapagnasan.

²⁸Inya iting makamate tau a misumpa king Dios, pigdusan na la naman detang makatakut a kasakitan a pepagpa na kareng aliwa, at kaybat mete yang makalunus king kabundukan ding bansa da ring dayuan.

²⁹Inuli neng Felipe, ing metung karing malapit nang kakaluguran, ing bangke na; oneng uli na ning tatakut ya king anak nang i Antiocus, linipat ya kang Aring Tolomeo Filometor ning Ehipto.