Read Kapampangan Luke 8 Bible Online

Luke 8 - Kapampangan bible

Luke 8

¹Kaybat na nita, minta ya i Jesus karing balen at karing baryu. Panaral na ing Mayap a Balita tungkul king Kayarian ning Dios. Kayabe na la ding labing adua,

²at ding mapilan a babaing likuan da ring espiritung marawak at meulu king sakit a miyayaliwa: i Maria (a mayayaus Magdalena) nung kenu na la pepalualan ding pitung demonyu;

³i Juana a asawa nang Cuza a katiwala nang Herodes; i Susana at ding aliwa pang babai. Gagamitan da reti ing sarili dang pibandian king pamaniaup da kang Jesus at karing alagad na.

⁴Daratang lang alang patugut kang Jesus ding taung manibatan karing miyayaliwang balen. Inyang metipun la selita neng Jesus karela iting talimhaga. Ngana,

⁵Linual ya ing metung a ortelanu ban salbag bini. King pamanialbag na, ating bining digpa king dalan-dalanan at medamusak, at pengan da ring ayup.

⁶Ating digpa king mabatu at melangi inyang tinubu uling malangi ing gabun.

⁷Digpa ing aliwa king libutad ning dikut a masuksuk. Ing bini at ing dikut a masuksuk miyagnan meragul, at piputan na ning suksuk ing bining tutubu.

⁸Digpa ing aliwa namang bini king gabun a mataba, meragul at memungang tiadinalan a binutil balang metung. At nganang tinuglung Jesus, Makiramdam kayu, nung atin kayung balugbug!

⁹Kitang da ring alagad nang Jesus nung nanu ing kabaldugan na niting talimhaga.

¹⁰Nganang mekibat Jesus, Miyabie kekayu ing beluan tungkul karing lihim ning Kayarian ning Dios, oneng miyabie karing aliwa king kapamilatan da ring talimhaga ban kanita lumawe la man e la manakit, at makiramdam la man oneng e la makaintindi.

¹¹Iti ya ing kabaldugan na ning talimhaga: ing bini ya ing amanu na ning Dios.

¹²Ding bining digpa king dalan-dalanan ila ding mekaramdam king amanu, oneng daratang ya ing diablo at sasamsaman na ing amanu karing pusu da ban e la maniwala at e la miligtas.

¹³Ding bining digpa king gabun a mabatu ila naman detang dinamdam king amanu at tinggap dang matula. Oneng e tinaglus king pusu ra. Meniwala la sinaguli, oneng painggulut la potang daratang ing kapagsubukan.

¹⁴Ing bining digpa libutad ning dikut a masuksuk kalupa da la detang makiramdam king amanu, oneng ing karelang kalingasngasan, ing pibandian at ing pamagsaya king bie ya ing makisiksikan king amanu at pupuputan da. Inya e na akuang lululut ning karelang bunga.

¹⁵Ing bining digpa king gabun a mataba mangaintulid ya karetang dinamdam king amanu at sininup da iti kilub ning pusung mayap at mapamintu; iti menatili angga na inyang mika bunga.

¹⁶Alang taung manyinding sulu at kaybat takpan ne king metung a palanggana o ibili ne lalam ning pagkeran. Nune, tutumpak ne king pibibilianan sulu ban kanita ding taung lulub bale akit da ing sala.

¹⁷Ing nanumang bage makasalikut, mibulalag, at ing nanumang makatakap, mayakit at milantad king masala.

¹⁸Uli na niti, mingat kayu king kekayung pamakiramdam; uling itang atin na miragdagan pa itang atyu na keya, at itang ala nanuman, milako pa itang ditak a isipan nang atyu na keya.

¹⁹Dinatang ya i ima nang Jesus at ding kapatad nang lalaki, oneng e la milapit kang Jesus uli da ring dakal a tau.

²⁰Ating metung a sinabi kang Jesus, I ima yu pu ampon ding kapatad yung lalaki atyu la king lual at buri da kayung akit.

²¹Oneng sinabi nang Jesus karela ngan, I ima ku at ding kapatad ku ila detang makiramdam at mamintu king amanu na ning Dios.

²²Misan a aldo sinake ya i Jesus king bangka; kayabe na la ding alagad na. Ngana karela, Tara, dalakit tamu kasumangid na ning dagat-dagatan. At megumpisa lang dinalakit.

²³Metudtud ya i Jesus kabang maglayag la. Tiniup ing masikan a angin king dagat-dagatan at lulub ing danum king bangka. Mibili la king maragul a panganib.

²⁴Lepitan de ring alagad i Jesus at ginising de. Ngara, Maestro, Maestro! Malapit ta na mung mangamate! Mibangun ya i Jesus at sebianan ne ing angin at ing mangaragul a alun. Tinuknang at mesalese ing panaun.

²⁵Kaybat na nita, ngana karing alagad na, Nukarin ing kekayung kasalpantayanan? Oneng mipamulala la at mitakutan. Ngara king metung at metung, Ninu kaya yan? Apapamintuan na pati na ing angin at ing alun!

²⁶Sinadsad la king lugal da ring tau Gerasa, king kasumangid ning dagat-dagatan ning Galilea.

²⁷Kabud kasaka nang Jesus, selubungan ne ning metung a tau karin. Iti maki demonyu ya. Malambat neng panaun lubas ni e manuknangan karing bale nune mu karing lukib a pipangutkutan.

²⁸Kinulisak yang masikan panakit na kang Jesus; migsakab ya arap na at ngana, Jesus, Anak ning Kakataskatasan a Dios! Nanu ing buri mung daptan kanaku? Pakisabi kung mayap keka ing e mu ku sana panasakitan!

²⁹Sinabi na iti uling inutus nang Jesus king espiritung marawak king lakuan ne. Maralas, nung sumpungan ne, agyang ikulung de o itali re bitis ampon gamat karing tanikala, apapatlud na la deti at darala ne ning demonyu king disyerto.

³⁰Nganang kinutang Jesus, Nanu ka lagyu? Ing lagyu ku Batalyun, nganang mekibat, uling dakal lang demonyu ding linub keya.

³¹Inawad da ring demonyu kang Jesus king e na la sana papuntalan king bangin.

³²Ating maragul a kawan babi malapit karin; manyibsiban la king libis ning bunduk-bundukan. Inawad da ring demonyu kang Jesus king paburen na la sanang lungub karing babi at peintulutan na la.

³³Inya linual la ding demonyu king tau at linub la karing babi. Dinulung ya ing mabilug a kawan babi king saug papunta king dagat-dagatan, at melumud la karin.

³⁴Ikit da ring pastul babi ing milyari. Memulayi lang meko, pemalita da ing balita king balen ampon karing baryung makapatulug.

³⁵Linual la ding tau ban lawan da ing milyari. Disnan de i Jesus at ikit de ing lalaking pilualan da ring demonyu. Makalukluk ya iting lalaki arap nang Jesus, makaimalan ne at masalese ne pamisip at mitakutan la naman.

³⁶Ding menakit king mepalyari pemalita ra karing tau nung makananu yang kinayap itang tau.

³⁷At ding sablang tau king Gerasa inawad da kang Jesus ing mako ya uling tutu lang mitakutan. Inya sinake ya i Jesus king bangka at meko ya.

³⁸Nganang mekisabing mayap kang Jesus ning lalaking pilualan da ring demonyu, Paintulutan yu ku pung tuki kekayu. Oneng nganang Jesus,

³⁹Muli na ka at ipamalita mu nung nanu ing depat na ning Dios para keka. Linibut ya ing lalaki king mabilug a balen, at pemalita na ing depat nang Jesus para keya.

⁴⁰Inyang migbalik ya i Jesus, matula deng selubungan ding tau, uling panenayan de ngan datang.

⁴¹Kanita ya dinatang i Jairo, ing metung a opisyal ning sinagoga karin. Migsakab ya arap nang Jesus at inawad na king tukian ne sana king bale na,

⁴²uling mamamate ya ing kabubugtungan nang anak a babai a labing aduang banua tua. Kabang dalan pilulupungan de ring tau i Jesus.

⁴³Kabilang ya kareti ing metung a babaing labi nang aduang banuang kayayagasan daya; megisan na king pamipaulu karing doktor ing pibandian na, oneng e ya kinayap.

⁴⁴Mekisiksikan ya karing dakal a taung tutuki kagulutan nang Jesus, at tigkilan ne ing punta na ning imalan na. At kanita mu rin tinuknang yang daraya.

⁴⁵Nganang mengutang Jesus, Ninung tinagkil kanaku? Alang minamin king ating tinagkil. At sinabi nang Pedro, Maestro, makapadurut la keka ding dakal a tau at misisiksikan la.

⁴⁶Oneng nganang Jesus, Ating tinagkil kanaku! Dimdam kung ating upayang linual kanaku.

⁴⁷Ikit na ning babai king merakap ya, inya migtapat ya at gagalgal yang migsakab king arap nang Jesus. King arapan da ring sabla pigtapat na nung baket tigkilan ne at nung makananu yang kinayap agad-agad.

⁴⁸Nganang Jesus, Anak, pepakayap na ka ning kasalpantayanan mu. Mako na kang mitmung kapayapan.

⁴⁹Kabang sasabian nang Jesus iti, dinatang ya ing metung a tubud ibat king bale nang Jairo. Mete ne pu ing anak yu, ngana kang Jairo, e yu ne pangabalanan ing Maestro.

⁵⁰Dimdam nang Jesus iti at ngana kang Jairo, E ka tatakut; maniwala ka mu at kumayap ya.

⁵¹Karas na bale Jesus ala yang peintulutan lungub kayabe na subali mu di Pedro, Juan at Santiago ampon ding pengari na ning anak.

⁵²Tatangis la at managulele ding sabla uli na ning milyari king anak. Nganang Jesus, E kayu tatangis, e ya mete ing anak; matudtud ya mu!

⁵³Keylian de ngan uling balu ra king ing anak mete ya.

⁵⁴Telanan neng Jesus king gamat at saka na sinabing masikan, Talakad ka, anak!

⁵⁵Misubli ing bie na at kanita mu rin tinalakad ya. At inutus nang Jesus karela king dinan deng apangan na ing anak.

⁵⁶E ra balu ing piramdaman da ring pengari na. Penabilin nang Jesus karela king e ra paniabian kaninu man ing mepalyari.