Read Kapampangan Deuteronomy 33 Bible Online

Deuteronomy 33 - Kapampangan bible

Deuteronomy 33

¹Oreni ding bendisyun a sinabi nang Moises, ing talasuyu na ning Dios, karing memalen ning Israel bayu ya mete:

²Pepakit ya ing Ginu karin king Bunduk ning Sinai, at dinatang ya kekatamu king Seir; pepakit na ing sarili na karin king Bunduk ning Paran, kayabe na la ding libu-libung anghel, at aping milalablab king wanan nang gamat.

³Wa, kaluguran na la ding taung pinili na, at bibendisyunan detang tapat; makatipun la king arapan na, kautusan na makasadia da lang tuparan.

⁴Ding Kautusan a miyabie king kapamilatan nang Moises, kekami lang pemintuan; ila ding peka mal nang pibandian ning bansang Israel.

⁵Ing Ginu ya ing meging ari ning Israel inyang ding tribu at ding manimuna da mitipun la.

⁶Nganang Moises king tribu nang Ruben: Mananu na sanang mie ya i Ruben at e mate kapilan man, oneng e ya dakal king bilang.

⁷King tribu nang Juda sinabi na: Ginu, pakiramdaman mu sana ing panigapu nang Juda, at iyabe meng pasibayu karing kapatad nang tribu. Ingatan me karing gamat mu at saupan lumaban karing kalaban na.

⁸King tribu nang Levi sinabi na: Ginu, ibie mu la kang Levi ding kekang Tumim at Urim ban abalu na ing kekang kaburian. Ding tapat mung talasuyu ila ding Levita, sibukan mu la karin king Massa, at meyakit lang tapat karin king danuman ning Meriba.

⁹Mas kaluguran na ka kesa karing pengari na, kapatad at anak na, uling pamintuan na la ding kekang kautusan, at tapat king kekang kasunduan.

¹⁰Ding Kautusan mu at tuntunan karing memalen ning Israel tuturu na la ngan. Mibili yang insenso king kekang altar, at babie ain king kekang arapan.

¹¹Ginu, bendisyunan me't parakalan ing tribu na, sabla nang daraptan keka sanang tanggapan. Lupigan mu lang kalaban na, at e na la sana talakad pa.

¹²King tribu nang Benjamin sinabi na: Pakamalan ne at ingatan ning Ginu; ingatan ne aldo o bengi man at manatili ya king libutad na.

¹³King tribu nang Jose sinabi na: Bendisyunan na sana ning Ginu ing gabun na, at parating madidilig king danum a manibat banua, at karing sibul lalam ning gabun.

¹⁴Parakalan ne sana karing piling prutas a melulut king pun, at balang bulan ya ing mamupul.

¹⁵Karing maniaman diling bunga da ring tanaman mitakpan la sana ding matuang bunduk na.

¹⁶Mikatmuan ya sana ing gabun na king sablang mangayap a bunga a babie na nitang manuknangan libutad ning milalablab a tanaman. Paburen kang Jose datang iting sablang bendisyun uling karing kapatad na ya ing memuntukan.

¹⁷Ing pangane toro na maging mayupaya ya, ding sagu na anti la king malyap a baka. Ding sagu na ila ding libu-libung tauan nang Manase, at laksa-laksang tauan nang Efraim. Ila deti ring sagupa karing bansa, at itulak da angga karing wakas ning yatu.

¹⁸King tribu nang Zebulun at Isacar sinabi na: Mibendisyunan ya sana i Zebulun king pamaglayag na king dagat, at i Isacar king kapanintunan a tinatag na king tuknangan na.

¹⁹Agkatan da lang dayuan a bansa munta king bunduk da, at mampang karapatdapat a ain. Manibatan king dagat ing karelang pibandian, at king balas ning pampang.

²⁰King tribu nang Gad sinabi na: Purian ya ing Dios a peparagul king gabun a sakup na. I Gad anti ya ing leon a manenaya ban maglapak gamat at buntuk ning biktima na.

²¹Ing pekamasanting a gabun kinua na, uling manimuna ya at katuliran na. Kayabe ning mabilug a Israel tutupad ya, at tutuntun king utus ning Ginu.

²²King tribu nang Dan sinabi na: Mengari yang malating leon i Dan; lundag-lundag yang ibat king Bashan.

²³Kang Neftali sinabi na: Tune mibendisyunan ya i Neftali; labis-labis ing pibandian a tinggap na king Ginu. Ing gabun a sakup na magumpisa king mauli angga king dagat-dagatan ning Galilea.

²⁴Kang Aser sinabi na: Mas misaplala ya i Aser kesa karing kapatad nang tribu; maging malapit la kang Aser ding kapatad na; dakal ing larung olibo king gabun a tutukluan na.

²⁵Ding pasbul ding pader ning balen na bakal la at tangsu; manatili ing sikanan na kabang mabie ya.

²⁶Ala yang kalupa ing Dios, O Israel, saken neng mitmung dangal ing banua at ing biga ban saupan na ka.

²⁷Ing alang anggang Dios ya ing kekang santungan; ding mayupaya nang gamat ilang keka mingat. Ya ing mitabi karing kalaban a atyu king kekang arapan, at keka nganang gingkas, Gisanan mo ngan.

²⁸Inya payapa yang mibiebie ing Israel karin king gabun a mitmung trigu at katas ubas; king gabun a didiligan na ning ambun.

²⁹Kapalad mo, O Israel, ala kang kalupa! Bansa kang ing Ginu ya ing migligtas keka; ya ing kekang kalasag at sandata ban king labanan maniambut ka. Lumapit la keka ding kalaban ban sumuku, at keka lang pandamusakan.