Read Kapampangan Ephesians 4 Bible Online

Ephesians 4 - Kapampangan bible

Ephesians 4

¹Inya aku a makasukul king uli na ning Ginu, makisabi kung mayap kekayu king mibiebie kayu sana agpang king kailangan dang daptan ding inaus ning Dios.

²Magpakumbaba kayu sa, maganaka, mapibabata, at misaupsaup kitmuan lugud king metung at metung.

³Pagkapilitan yung papanatilian ing pangametung a ibat king Espiritu king kapamilatan na ning kapayapan a bubuklud kekayu.

⁴Metung ya mu ing katawan at metung ya munaman ing Espiritu; antimo nung makananung metung ya mu ing kapanayan a kekayung keyaus.

⁵Atin mung metung a Ginu, metung a kasalpantayanan at metung a binyag;

⁶metung ya ing Dios at Ibpa ta ya ngan; ya ing makiupaya, darapat king kapamilatan da ring sabla at manatili karing sabla.

⁷Midinan yang makabukud a kagiwan ing balang metung kekatamu, agpang king sukad a babie nang Cristo.

⁸Inya masasabi king kasulatan ing anti kaniti: Inyang pepaitas ya king matas a matas, migdala yang dakal a bihag a kayabe na; minie yang regalu karing tau.

⁹Nanu ngeni ing buri nang sabian ning pepaitas ya? Ing buri nang sabian niti tinipa ya pa mu keti king yatu.

¹⁰Itang tinipa ya naman kabud ing pepaitas king kakataskatasan, king babo banua at lagpus pa babo banua ban katmuan na ing sabla-sablang bage king panga-atyu na.

¹¹Ya ing minie regalu karing tau; binie na karing aliwa ing maging apostol la, karing aliwa naman ing maging propeta la, ding aliwa naman ing maging talapanaral la, pastor at talaturu.

¹²Depat na iti ban isadia na la ding sablang mepili king kasuyuan at king ikasulung ning iglesia na.

¹³Ban kanita itamung sabla misasanmetung tamu king pamanialpantaya, at pamangilala king Anak ning Dios, at maging ganap ing kekatamung pangatau agpang king pamakilupa tamu king genapan nang Cristo.

¹⁴E ta na kanita anak a mangalati a balamu bangkang sapul-sapulan na ning angin, at pitange-tange ning alun ampon ning maling turu da ring taung mapaglinlang. E ta na mapirait karing taung ating kapagnasan a inabu da katamu king e ustu.

¹⁵Nune king kapamilatan na ning pamagsalita tamu king katutuan at ning diwa ning lugud, dagul tamung ganap king pangayabe tamu kang Cristo, ing buntuk.

¹⁶King kapamilatan na migaganap ya ing katawan manibat karing miyayaliwang dake na at nung ing balang dake gagampanan na ing katungkulan na, dagul ya at sikan ing mabilug a katawan king kapamilatan na ning lugud.

¹⁷King lagyu na ning Ginu, sasabian kung matimid iti: e yu na la apusan a pamibiebie ding paganu. Alang ulaga ing karelang isipan

¹⁸at e la makaintindi. Uli na ning karelang kamangmangan at kesiasan buntuk, ala lang dake king bie a babie na ning Dios.

¹⁹E la biasang dirine at mabisyu la; pawang makasumami ing balu rang gawan.

²⁰E makanyan ing abalu yu tungkul kang Cristo,

²¹nung tune yung pekiramdaman ing tiru da tungkul keya at nung mituruanan kayu king katutuan a atyu kang Jesus.

²²Lakuan yu na ing milabas yung marawak a pamibiebie. Lakuan yu na ing sadia yung pangatau a mipapahamak uli na ning marawak nang pamitan.

²³Ibayu yu na la ding pusu yu at kaisipan,

²⁴at isulud ye ing bayung pangatau a melalang agpang king wangis ning Dios a mipatutuan agpang king katuliran na at kabanalan.

²⁵Uli na niti, e na kayu maglaram! Kailangan yang magsalitang katutuan ing balang metung king kalupa nang talasalpantaya, uling itamu ngan dake na katamu ning metung mung katawan, ing Cristo.

²⁶Nung sakaling mimua kayu, pangilagan yu ing e kayu mikasala at e yu paintulutan manatiling patingapun ing mua yu.

²⁷E ye dirinan dalan ing diablo king bie yu.

²⁸E ne kailangan manako ing mapanako, nune magobra ya at gamitan na la ding gamat na king marangal a kapanintunan ban asaupan na la ding mangailangan.

²⁹E kayu magsalitang marawak a amanu; pagkapilitan yung parati ing magsalita ketang makakayap at makapasikan lub a malyari dang pakinabangan ding makaramdam.

³⁰At e ye sa palungkutan ing Banal a Espiritu uling ya ing tatak na ning Dios kekayu, ya ing katibayan na ning kekayung pangayatbus potang datang ne ing Aldo mituldu.

³¹Ilako yu na ing nanumang mapait king lub yu, mua, at kasbu; tuknang na kayung mamulyo, maninsultu at magsalitang e mayap.

³²Nune, maging maganaka kayu sana at mapaglunus king metung at metung, at mipapamatawad kayu antimo ing pamamatawad na kekayu ning Dios king kapamilatan nang Cristo.