Read Kapampangan 2 Timothy 3 Bible Online

2 Timothy 3 - Kapampangan bible

2 Timothy 3

¹Tandanan mu iti: magdala lang kasakitan ding tauling aldo.

²Maging malugud la ding tau king sarili ra at king salapi. Maging palalu la, mayabang, mapaninsultu, mapaglaban karing pengari, ala lang pasalamat, at lapastangan la king Dios.

³Maging maimut la naman, alang lunus, mapanyirang puri, bugasuk, mabagsik, at pikakasaman da ing mayap.

⁴Aliwa mu yan, maging taksil la pa, barumbadu, matas a lub, at luguran da ing pamitutula na ning yatu kesa king luguran de ing Dios.

⁵Papakit da king relihiosu la, oneng e mu naman akit king bie ra ing upaya na ning kabanalan. Pangilagan mu la ding taung anti kareti.

⁶Ila ding lulub karing bale at magsamantala karing babaing ating keinan at kababayatnan karing karelang kasalanan, at mayayagkat king pita ning laman.

⁷Deti babai lang makiramdam kaninu man, oneng kapilan man e la miraras king katutuan.

⁸At nung makananu lang sinalangsang di Janes at Jambres kang Moises, makanyan la namang sasalangsang deting tau king katutuan, marok la pamisip at mapagkunwaring talasalpantaya.

⁹Oneng e ra malyaring asundung malambat ing karelang dewakan uling ing karelang kamulangan akit dang malino ding sabla antimo ing milyari na kari Janes at Jambres.

¹⁰Oneng ika tikian mu la ding turu ku, ing panugali ku, at parasan ku king bie; pakiapusan mu ing kanakung pamanialpantaya, ing kapibabatan, ing lugud, at ing katapatan.

¹¹Balu mu nung nu anti kabayat ing pamagligalig da kanaku at ing kasakitan a delanan ku king Antiokia, king Iconio, at king Listra. Oneng linigtas na ku ning Ginu king sablang iti.

¹²At ding sablang magnasang mie banal bilang talatuki nang Cristo Jesus dumalan lang pangalupig.

¹³Ding taung marawak at ding magbalatkayu lalu lang maging marawak, maglinlang la, at ila mismu malinlang la.

¹⁴Oneng ika, manatili ka king katutuan a abalu mu at king matibe mung kapaniwalan. Balu mu naman nung ninu ding meging maestru mu.

¹⁵At manibat inyang malati ka balu mu na la ding Banal a Kasulatan a minie kabiasnan keka, at meging dalan king kaligtasan king kapamilatan na ning pamagtiwala mu kang Cristo Jesus.

¹⁶Pengisnawanan na la ning Dios ding sablang Kasulatan at maragul la kasilbian king pamanuru king katutuan, king pamaglaban king kamalian, king pamitulid king maling dapat, at pamagsane king malinis a pamibiebie.

¹⁷King uli na niti, maging ganap ya ing talasuyu na ning Dios at mirinan yang kagiwan dapat king sablang mayap.