Read Kapampangan Judges 3 Bible Online

Judges 3 - Kapampangan bible

Judges 3

¹Deti ngeni ila ring mapilan a taung tinagan na ning Ginu king bansa ban panyubukan ne ing Israel kapamilatan da. E la pa mika sibukan deting Israelita king pamakigera karin Canaan.

²Depat na mu iti ban dinan na lang lisyun ding balang lahi da ring Israelita tungkul king gera lalung-lalu na detang ala pang sibukan king gera.

³Ding mitagan king bansa ila ding lima dang siudad ding Filisteo, ding Cananeo, ding Sidoniano, at ding Heveo a manuknangan karing kabundukan na ning Lebanon manibat king Bunduk ning Baal Hermon angga na king Pidadalanan ning Hamat.

⁴Ila ding meging kasangkapan na ning pangasubuk ning Israel ban mabalu nung mamintu la o ali la ding Israelita karing kautusan a binie ning Ginu karing makatua da king kapamilatan nang Moises.

⁵Inya menuknangan la ding Israelita libutad da ring Cananeo, ding Hiteo, ding Amoreo, ding Perezeo, ding Heveo, at ding Jebuseo;

⁶at tinggap da la ring anak dang babai deti ban maging asawa ra, at peintulutan da la ring anak dang babai ding Israelita a makiasawa karing anak dang lalaki, at sinamba la karing kikilalanan dang dios.

⁷Depat da ring Israelita ing e mayap king akakit na ning Ginu. Kelinguan de ing Ginung karelang Dios; mikasala la king Ginu at simban da la ring larawan nang Baal at Asera.

⁸Inya mimua ya ing Ginu karing Israelita at pepaburen na lang menabu king gamat ning Aring Cusan Risataim ning Mesopotamia. Mipailalam la king upaya na kilub ding walung banua.

⁹Kanita sinaingsing la ding Israelita king Ginu, at tinubud ne ning Ginu ing metung a lalaki a migligtas karela. Iti ya i Otniel a anak nang Kenaz at wali nang Caleb.

¹⁰Dinatang ya kang Otniel ing upaya ning Ginu at ya ing meging ukum ning Israel. Minta ya king labanan at binie na ning Ginu ing tagumpe. Simbut ne ing ari ning Mesopotamia.

¹¹Mika kapayapan king bansa kilub ding apat apulung banua. Kaybat na nita, mete ya i Otniel.

¹²Pasibayu no namang mikasala king akakit na ning Ginu ding memalen na ning Israel. Inya peintulutan neng maging mas masikan ning Ginu ing Aring Eglon ning Moab kesa king Israel.

¹³Mekiabe ya i Eglon karing Ammonita at karing Amalekita; simbut de ing Israel at abihag de ing Jerico, ing siudad ding palma.

¹⁴Mipailalam la ding Israelita king upaya nang Eglon kilub ding labing walung banua.

¹⁵Kanita sinaingsing la king Ginu ding Israelita, at tinubud ne ning Ginu ing metung a lalaki ban iligtas na la. Ya i Ehud, ing kaliweti a anak nang Gera ning tribu nang Benjamin. Tinubud de ring Israelita i Ehud kang Aring Eglon ning Moab at pepagdalan deng regalu.

¹⁶Ginawa yang espada a misusumangid a taram a maki metung at kapitnang talampakan king kaba. Tinali ne iti king wanan nang puad lalam ning imalan na.

¹⁷Kaybat, dela na la ring regalu na kang Eglon; mataba yang lalaki i Eglon.

¹⁸Kaybat na lang binie Ehud ding regalu na, sinabi na karing lalaking migdala kareti ing muli na la.

¹⁹Oneng karas nang Ehud karing dinukit a batu malapit Gilgal, mibalik ya kang Eglon at ngana, Makamal a Ari, atin kung lihim a mensahi para keka. Inya ngana ning ari karing ipus na, Lakuan yu kami! At meko la ngan.

²⁰Kanita, kabang makalukluk yang magdili-dili ketang marimla nang kuartu ning ari, linapit ya i Ehud at ngana, Atin kung mensahi para keka a ibat king Dios. At tinalakad ya ing ari.

²¹Kinua neng Ehud king kayli nang gamat ing espada king banda nang wanan at siksak ne king atian na ning ari.

²²Linub ya ing mabilug a espada pati na ing pulu na at mitakpan ya iti king taba na ning ari. E ne begut Ehud king atian ning ari at linsut ya iti kagulutan na pilatan ding bitis na.

²³Linual ya i Ehud; sera na la ding pasbul at kindadu na la.

²⁴Kaybat meko ya. Dinatang la ding ipus at ikit da king makakandadu la ding pasbul, oneng inisip da king atyu kilub ing ari at magbawas ya mu.

²⁵Menaya la angga king oras a isipan dang dapat lang manaya, oneng inyang e ne pa bubuklat ning ari ing pasbul, kinua de ing susi at biklat de. At ikit deng makapase ing panginuan da; mete ya!

²⁶Kabang manaya la ding ipus, tinakas ya i Ehud. Delanan na la ding dinukit a batu at tinakas yang papunta Seira.

²⁷Karas na karin king bulubundukan nang sakup ning Efraim, tiniupan ne ing tambuli ban ausan na la ding lalaki ning Israel ba lang makilaban; penimunan na lang kinuldas karing bunduk-bundukan.

²⁸Ngana karela, Tukian yu ku! Binie ne ning Ginu kekayu ing tagumpe laban karing kalaban, ding tau Moab. Inya tinuki lang kinuldas kang Ehud, at ikua re ing lugal nung nu re daralakitan ding Moabita ing Jordan; ala lang peintulutan makadalakit metung mang katau.

²⁹Itang aldong ita pete da la ring ating apulung libu katau karing mayap nang diling sundalus ning Moab; metung man karela alang mekatakas.

³⁰King aldong ita simbut de ring Israelita ing Moab, at mika kapayapan king bansa kilub ding walung pulung banua.

³¹Ing tutuking meging ukum ya i Samgar, ing anak nang Anat; linigtas nia naman ing Israel. King kapamilatan na ning pamarug baka pete na la ding anam a ralan a Filisteo.