Read Kapampangan 3 John 1 Bible Online

3 John 1 - Kapampangan bible

3 John 1

¹Ibat ya iting sulat king Matua. Miparala ya kang Gayo, ing pakamalan kung kakaluguran.

²Pakamalan kung Gayo, ipanalangin ku king dasan na ka sana niting sulat ku king mayap a kabilian at king masanting a pamikakatawan antimo ing mayap nang kabilian ning bie mung espiritual.

³Tutu kung matula inyang dinatang la ding mapilan a kapatad at belita ra king manatili kang tapat king katutuan at tune mabibie king katutuan.

⁴Ala nang maygit pang makaibie tula kanaku kesa king damdaman ku ing balita a mabibie la king katutuan ding kanakung anak.

⁵Pakamalan kung kakaluguran, ing kasuyuan mu karing kapatad, pati na karing e mu kakilala, patutu king tune kang tapat.

⁶Patutuan da reti ing kekang lugud king iglesia keni. Lalung mayap nung asaupan mu la king karelang pamaglakbe antimo ing karapatdapat karing talasuyu na ning Dios.

⁷Uling miglakbe la king lagyu nang Cristo at e la tinanggap nanumang saup karing e kikilala king Dios.

⁸Sukat ta lang saupan deting tau ban mikadake tamu king pangalaganap na ning katutuan.

⁹Sinulat kung makuyad king iglesia; oneng i Diotrefes a maburing maging manimuna da e na ku pekiramdaman.

¹⁰Sabian ku ngan pangaras ku ken ing sablang kalaraman a sinabi na laban kekami. At e pa makagyu iti kang Diotrefes. E na na la buring tanggapan ding kapatad a daratang karin, sasabatan na la pa, at tatabi na lang palualan king iglesia ding bisang tanggap karela!

¹¹Pakamalan kung kakaluguran, e mu pakiapusan ing e mayap a alimbawa; ing mayap ya ing pakiapusan mu. King Dios ya ing ninumang darapat mayap; ing ninumang darapat e mayap e ne pa ikit ing Dios.

¹²Mayap ing sasabian da ring sabla tungkul kang Demetrio, at makanyan ing pakilala na ning katutuan. Makanyan munaman ing kekaming patutuan kang Demetrio, at balu mu king e ke malaram.

¹³Dakal ku pa buring sabian keka, oneng e na kaniting sulat.

¹⁴Asahan kung mikit kata king lalung malaguang panaun at kanita ta na mipagsalita.

¹⁵Datang sa keka ing kapayapan. Kukomustan da ka ring kakaluguran mu keni. Pakikomusta mu na ku man karing sablang kakaluguran tamu ken; king balang metung at metung karela.