Read KapsikiDC Gha ta Wəshi 13 Bible Online

Gha ta Wəshi 13 - KapsikiDC bible

Gha ta Wəshi 13

¹Pa Abram same kwa Ɛzhipte le male ta ŋkɛ ba'a pɛtɛa wəshia ŋkɛ kadzembe Nɛgɛv. Nahe Lot kenza yite.

²Nahe Abram kenza kande mcɛlə fate fate. Kwele kwele wəshi keseɗa, mze kwa tɛawetɛa ba'a mze kwa tere tere ve.

³Hɛakɛ hɛ teke hɛakɛ hɛ teke same ŋkɛ kwa Nɛgɛv hwa'a mbe Bɛtɛl, te ŋkwa nya ghate ŋkɛ kanza kwelɛ yɛ Bɛtɛl le Ay.

⁴Te ŋkwa nya ghate ŋkɛ kapate reghwetɛ ne, pa Abram səkwəte Shala le heka sləa ŋkɛ kaMahwətə.

⁵Ma Lot nya nza ŋkɛ le ne, wəshi keseɗa nyi ɓɛhwɛ ɓɛhwɛ ba'a nyi jama jama ya ve perə, tsagha yɛ cɛ lekwesa.

⁶Tewəmbəreke mbeli ba'a wəshi keseɗa nyi kwele kwele va hɛ ne, dewə hɛɗia shɛ kezha nza hɛ zlaɓe te.

⁷Pa mɛ tsehate geva kwelɛ ka ya wəshia Abram le ŋa Lot. Mbe vəa shɛ ne, te hɛɗia shɛ ka Kanan ba'a ka Pɛrɛs le nza perə.

⁸Ma ke Abram sha Lot: «Mba mɛ kenza kwelɛ gheɓə, kwelɛ ka ya wəshia ɗa le ŋa ŋa, va nya nza ŋkɛ hwelefe nya kwetɛŋe gheɓə.

⁹Mbe kema ta ŋa hɛɗi nya pɛtɛ wəka? Hendemte geva vare 'ya. Ma kenza nde dzeyi te kwa gwela na, dzeyi te kwa zeme 'ya. Kenza nde dzeyi te kwa zeme na, dzeyi te kwa gwela 'ya.»

¹⁰Kafe Lot sha ghə, pa ŋkɛ nakɛ hɛɗia Zhəwrdɛŋe: nda yɛmə nde hwɛ te. Kala ntsa ta Mahwətə se ŋkɛ hwa'a mbe Sowar, kala hɛɗia Ɛzhipte tewə Mahwətə kezamte yɛ Sodome le Gomore.

¹¹Pa Lot ntave hɛɗia Zhəwrdɛŋe, cape ŋkɛ kadzawa laka ŋkwa nya same veci. Tsagha ne, nahe hɛ kenehemte geva.

¹²Pa Abram nzanyɛ te hɛɗia Kanan. Pa Lot nzanyɛ dekwede yitea meleme nyi te hɛɗia Zhəwrdɛŋe, pa ŋkɛ mɓeyi yɛ cɛ lekwesa ta ŋkɛ vaŋe mbe Sodome.

¹³Ma Mbeli nyi mbe Sodome ne, ka mefətekwə nyi kebeze nda ghena ke Mahwətə hɛ.

¹⁴Ma kwa nehemte geva yɛ Lot le Abram ne, ma ke Mahwətə sha Abram: «Kafete ghə te ŋkwa nya nza nya na, newe ŋkwa nya laka bela kwa gwela, laka ŋkwa kesame veci, laka ŋkwa kepəkwə ta veci ba'a laka bela kwa zeme.

¹⁵Ma hɛɗi nya newe nya na pɛtɛ ne, kateve ŋa ŋkɛ 'ya kaŋa ŋa ba'a ke hwelefefia ŋa kaghala ghala.

¹⁶Katezhɛre hwelefefia ŋa 'ya kala ndaleghe, ma nda kaɓelate ndaleghe mbeli ne, wərə mbeli kaɓelate hwelefefia ŋa perə.

¹⁷Kwiɗi dzaslemte hɛɗi nya kala biya ta ŋkɛ ba'a bezlea ŋkɛ, va nya nza ŋkɛ kateve ŋa ŋkɛ 'ya.»

¹⁸Ntəŋə Abram le yɛ cɛ lekwesa ta ŋkɛ se kanzanyɛ yitea cɛana nyi mbe Mamrɛ, dekwede yitea Hɛbron. Pa ŋkɛ pate nda reghwetɛ tagha ke Mahwətə.