Read KapsikiDC Gha ta Wəshi 14 Bible Online

Gha ta Wəshi 14 - KapsikiDC bible

Gha ta Wəshi 14

¹Ma mbe vəa shɛ ne, ntake Amrafɛl, meghea ka Mɛzopotami, Ariyok, meghea ka Ɛlasar, Kɛdorlawomɛr, meghea ka Ɛlam ba'a Tidal, meghea ka Goyim

²kampa le Bɛra, meghea ka Sodome, Birsha, meghea ka Gomore, Shinab, meghea ka Adma, Shɛmɛbɛr, meghea ka Seboyim ba'a le meghea ka Bɛla, geze ta ŋkɛ, Sowar.

³Pa ka meghe nyi mcɛfe nyi tsenete geva kwa zlərəa Sidim, geze ta ŋkɛ, ndərə kwa Ghwənəghwə.

⁴Va meŋe bakeghəmbe menete hɛ mbe dzeve ta Kɛdorlawomɛr, ama te kwa meŋe mahekeneghəmbe ta va ne, pa hɛ zhɛnete nda ghə.

⁵Ma te kwa meŋe wəfaɗeghəmbe ta va ne, pa Kɛdorlawomɛr ba'a ka meghe nyi kejikəte geva nyi ŋkɛ le hɛ kadzemte mpa. Pa hɛ ɗate ka Refay mbe Ashetarot-Karnayim, ka Zəwz mbe Ham ba'a ka Ɛmim te ŋwela ta Kiriyatayim.

⁶Ma ka Hor le ŋa nci ne, mbe meleme ta nci ɗate hɛ hɛ hwa ghweme ta Sɛyir. Vaŋe va Ɛl-Paran nya terasle yitea ɓerama kekate hɛ hɛ.

⁷Kwetere wəmbəa ŋkɛ ne, pa hɛ zhɛneke geva laka Ɛn-Mishepat, geze ta ŋkɛ, Kadɛs. Pa hɛ ɗate pɛtɛa hɛɗia Amalɛk ba'a ka Amor nyi mbe Hasason-Tamar.

⁸Pa ka meghe nyi mbe Sodome, Gomore, Adma, Seboyim ba'a Bɛla, geze ta ŋkɛ Sowar, hite geva yitea mpa kwa zlərəa Sidim

⁹le Kɛdorlawomɛr, meghea ka Ɛlam, Tidal, meghea ka Goyim, Amrafɛl, meghea ka Mɛzopotami ba'a Ariyok, meghea ka Ɛlasar: ka meghe wəfaɗe kampa le kweci mcɛfe.

¹⁰Kwele kwele ki nyi mene gwədereŋə mbeli same kwa hɛ kwa zlərəa Sidim. Ma kwa hwɛ yɛ meghea ka Sodome ba'a ŋa ka Gomore ne, pa hɛ teɗenji kwa hɛ. Ma nyi ketene ne, pa hɛ hwɛnji dzeme hwa ghweme.

¹¹Ma mbeli nyi kehərəte ŋkwa ne, pa hɛ fəhwe wəshi nyi mbe yɛ Sodome le Gomore ba'a pɛtɛa wəshi kezeme ta nci, pa hɛ dzeghwanji.

¹²Ma Lot, wəzege ta wəza meghekɛa Abram ne, mbe Sodome se ŋkɛ kanza. Pa hɛ keseghe ŋkɛ ba'a fəhwe pɛtɛa wəshia ŋkɛ.

¹³Pa kwete wəndə nya kembelenyɛ lə kagezete nda ghena shɛ ke Abram, nde Ɛbrə nya kese kanza yitea cɛana nyi mbe Mamrɛ, nde Amor. Ma Mamrɛ ne, wəza meghekɛa yɛ Ɛshekol le Anɛr ŋkɛ. Pɛtɛa nci mahekene kambeli nyi kejikəte geva le Abram.

¹⁴Fatema ta Abram ke kese ta wəzege ta wəza meghekɛ ne, pa ŋkɛ tsenete mbelia ŋkɛ nyi gwəmsə mahekene ba'a meŋe degheseghəmbe kwa peləa ŋkɛ. Pa hɛ təkwə təkwəte ka jaga ta nci hwa'a mbe Dan.

¹⁵Pa Abram nehemte mbelia ŋkɛ mbe kawəvəsə kwele kwele kezha ha nda mpa ke ka jaga heviɗi. Pa ŋkɛ ɗate ka meghea kɛfi ba'a kekaghe hɛ hwa'a mbe Hoba, laka bela kwa gwela yitea Damas.

¹⁶Pa ŋkɛ zhɛneke pɛtɛa mcɛlə, tsagha Lot, wəzege ta wəza meghekɛ ba'a wəshia ŋkɛ, mi ba'a kweci mbeli nyi kesehwe mbeli.

¹⁷Ma kwa zhɛneke geva Abram kwetere wəmbəa nya hərəte yɛ Kɛdorlawomɛr le kweci kameghe nyi kejikəte geva le ŋkɛ ne, cape meghea ka Sodome kadzawa shɛ kwa zlərəa Shavɛ, geze ta ŋkɛ, zlərəa meghe.

¹⁸Mɛlkisɛdɛk, meghea ka Salɛm nde keleke ɗafa ba'a tɛ. Nahe ŋkɛ kenza kande dzeghe nda melɛ ke Shala tehwə ghweme.

¹⁹Ntake ŋkɛ kawəpi Abram, ma ke: «Wəpikɛ Abram Shala tehwə ghweme nya kepate yɛ ghweme le hɛɗi!

²⁰Nza zləvə te sləa Shala tehwə ghweme nya kevame ŋa ka jaga ta ŋa mbe dzeve!» Pa Abram ndeke nda kwa meŋe ta bela ta pɛtɛa wəshi nyi fəke ŋkɛ hwa mpa.

²¹Ma ke meghea ka Sodome sha Abram: «Fəave ɗa mbeli shɛ na fəhwe wəshi.»

²²Ma ke Abram shɛ: «'Ya kakafe dzeve ta ɗa kwa kema ta Mahwətə, Shala tehwə ghweme nya kepate yɛ ghweme le hɛɗi:

²³Kazeme 'ya kafela kaɗema kakele wəsəa ŋa, ya shintia wəsə keseɗa keɗema zewe ta tsahwa ŋkɛ. Tsagha ne, kategeze na: ‹'Ya nde ŋkeɗekɛ Abram›, pa we.

²⁴Ketsakɛ ɗa wəsə we, deke wəsə kezeme nya zehwe megelɛgeshia ɗa ba'a bela nya kaŋa mbeli nyi kebeghakɛ ɗa yitea mpa yakele 'ya: Anɛr, Ɛshekol ba'a Mamrɛ. Ghenci ka tekele ŋa nci bela.»