Read KapsikiDC Gha ta Wəshi 2 Bible Online

Gha ta Wəshi 2 - KapsikiDC bible

Gha ta Wəshi 2

¹Tsagha kiɗimte geva pa ta yɛ ghweme le hɛɗi ba'a pɛtɛa wəshi nyi te hɛ.

²Ma kwa kiɗimte slene ta ŋkɛ Shala ne, pa ŋkɛ zhɛnakɛ mpi va slene nyi menete ŋkɛ te kwa mberefaŋe ta hɛ.

³Pa Shala wəpikɛ kwa mberefaŋe ta hɛ nyagha, pa ŋkɛ veyi vecia shɛ tekeleke, kwa nza ŋkɛ te vecia shɛ zhɛnakɛ mpi ŋkɛ va slene ta wəshi nyi pate ŋkɛ.

⁴Nya ya kaghena ta pa ta yɛ ghweme le hɛɗi. Ma kwa pate yɛ ghweme le hɛɗi Shala ne,

⁵wəfe shɛ te hɛɗi we, gwəzə shɛ kenaka kapese we. Kwa nza ŋkɛ kenaka Shala Mahwətə kameke va kadzete hɛɗi we, wəndə shɛ kezha wəza ŋkwa nya te hɛɗi we.

⁶Ama deke kwete mama ta ɗasle nde hwɛ shave mbe hɛɗi kezha ɓasle ŋkwa nya te.

⁷Pa Shala Mahwətə pate wəndə ŋelɛ le keləwəa hɛɗi nya ntave ŋkɛ. Pa ŋkɛ vɛsəame nda sefəa mpi mbe ŋshi, ntake ŋkɛ kanza teghweme.

⁸Kwetere wəmbəa ŋkɛ, pa Shala Mahwətə menete ntsa te hɛɗia Ɛdɛn, laka ŋkwa kesame ta veci, pa ŋkɛ veyi wəndə nya pate ŋkɛ kwa.

⁹Pa Shala Mahwətə pesete mama ta wəfe nyi ganji ganji ba'a nyi zeɗe zeɗe te hɛɗi. Pa ŋkɛ veyi wəfe ta mpi te tepe ta ntsa shɛ ba'a wəfe ta ɗepe wəsə nya ganyɛ keɗema nya ndiremi.

¹⁰Kwete hələ nde hwɛ shave mbe hɛɗia Ɛdɛn kezha ɓasle ntsa shɛ. Se tagha ne, pa hələa shɛ neheve geva wəfaɗe mbe.

¹¹Nahe sləa kwa ghate kenza kaPishon. Gheŋkɛ nde dzasle hɛɗia Havila nya nza mze kwa tere tere mbe,

¹²mze kwa tere tere nya ganyɛ, tsagha kwete nehwene ta wəfe nya kezəŋwə ganyɛke ba'a kwete pelɛ kwa gheme nya nza zləvə te.

¹³Gihon sləa kwa bake ta dzeve ta hələa shɛ. Gheŋkɛ nde ntəslə hɛɗia Kəwsh.

¹⁴Tigre sləa kwa maheke ta hələa shɛ, laka ŋkwa kesame ta veci yitea meleme ta Asəwr hwɛ ŋkɛ. Efrate sləa kwa wəfaɗe ta dzeve ta hələa shɛ.

¹⁵Pa Shala Mahwətə kelete wəndə ŋelɛ ba'a veyi ŋkɛ kwa ntsa ta Ɛdɛn kezha wəza ba'a kezha ya.

¹⁶Ma ke Shala Mahwətə gezave nda: «Wərə na kazeme yayata wəfe nya kwa ntsa nya,

¹⁷ama katezeme ya ta wəfe ta ɗepe ta wəsə kwa ganyɛ keɗema kwa ndiremi na we, kwa nza ŋkɛ ma te veci nya tezehwe na ne, katemte na.»

¹⁸Ma ke Shala Mahwətə: «Ndeɗekə kanza za kwetɛŋenyɛ we. 'Ya katemene nda nde kemane ŋkɛ nya kala ghəa ŋkɛ.»

¹⁹Le hɛɗi pate mama ta wəshi keseɗa nyi hwa gamba ba'a 'yɛ nyi yitea ghweme Shala Mahwətə, pa ŋkɛ fəke nda hɛ ke za kezha newe tsema tsema teheka nda slə ŋkɛ ke hɛ. Yayata wəsə keseɗa kakele slə nya hekate nda za.

²⁰Pa ŋkɛ hekate nda slə ke wəshi keseɗa nyi ki ghɛ, nyi hwa gamba ba'a 'yɛ nyi yitea ghweme. Ama kaŋa ŋkɛ ne, kenakɛ wəndə nya kala ghəa ŋkɛ ŋkɛ kezha kemane ŋkɛ we.

²¹Pa Shala Mahwətə veyite wəndə nyagha yitea hɛ tsape tsape, pa ŋkɛ kweraɗeve slerepe ta ŋkɛ kwetɛŋe, zhiɓəyi sli te ŋkwa ŋkɛ.

²²Pa Shala Mahwətə menete male le slerepe nya kweraɗeve nyagha ŋkɛ hwa za shɛ ba'a keleke nda ŋkɛ.

²³Tagha gɛ, ma ke za: «Yawa! Nya ya kamimia ɗa ghɛmɛ gɛ! Male ta za tenza sləa nta kwa nza ŋkɛ shave mbe za nde.»

²⁴Vatse tesərə yɛ yitenyɛ le meghekɛ za kezha jikə geva le male ta ŋkɛ yitea nza hɛ kageva nya kwetɛŋe.

²⁵Bake nci se yɛ za le male ta ŋkɛ mederelaŋe, kaɗema kahawe va ghəa nci.