Read KapsikiDC Gha ta Wəshi 21 Bible Online

Gha ta Wəshi 21 - KapsikiDC bible

Gha ta Wəshi 21

¹Pa Mahwətə zhɛakɛ heli yitea Sara kala nya se ŋkɛ kageze, pa ŋkɛ menete nda kala ghena nya meɗeyi nda ŋkɛ.

²Njehe nde le hwə, bawe nde yake nda wəzege teza ke Abraham mbe meha ta ŋkɛ te və nya gezete Shala.

³Pa Abraham hekate nda slə ke wəzege nya yake nda shɛ Sara kaIzak.

⁴Pa ŋkɛ slamte nda mɓɛta te kwa deghese ta hɛa ŋkɛ, kala nya gezete nda Shala.

⁵Va gwəmsə menete Abraham nda yake geva Izak, wəzege ta ŋkɛ.

⁶Ma ke Sara: «Nahe Shala kendeke ɗa ŋ'wəshi. Yayata wəndə nya ketefa kageze ghena ta Izak mbeli ne, kateŋ'wəshi ɗa ŋkɛ.»

⁷Ma ke zhɛkwa: «Wa wəndə nya kese kazəzə geze nda ke Abraham katesa nda ŋ'wa Sara ke ŋwale te kwete hɛ wa? Wa nya 'ya nya keyake nda wəzege teza mbe meha ta ŋkɛ gɛ!»

⁸Nahe Izak kekelenyɛ, pa Sara fɛake ŋkɛ yitea ŋ'wa. Ma te veci nya slamte nda ŋ'wa Sara ke Izak ne, pa Abraham takɛ wəshi kezeme kwele kwele.

⁹Pa Sara nakɛ Ismayɛl, wəzege nya yake nda Agar, wəzha ta ka Ɛzhipte ke Abraham karaberə.

¹⁰Ma ke sha Abraham: «Ŋkamte yɛ kwatera nya le wəzege ta nta, kwa nza ŋkɛ kazeme ghɛ wəzege ta kwatera shɛ le wəzege ta ɗa Izak we.»

¹¹Pa ghena shɛ zhɛte nda kwele kwele ke Abraham, va nya nza Ismayɛl kawəzege ta ŋkɛ perə.

¹²Ama ma ke Shala gezete nda: «Hwepema wənə na te ghəa yɛ wəzege nya le kwatera ta ŋa ma. Yɛte pɛtɛa ghena nyi geze ŋa Sara, va nya nza ŋkɛ laka Izak teŋ'we hwelefefi nyi meɗeyi ŋa 'ya na.

¹³Ama kaŋa wəzege ta kwatera ta ŋa ne, kateve nda hwelefe 'ya perə, kwa nza ŋkɛ ne, wəzege ta ŋa ŋkɛ.»

¹⁴Te hendɛ ta ŋkwa masheke masheke ne, pelɛhetɛme Abraham sate te ŋkwa, pa ŋkɛ kelete wəshi kezeme ba'a slibə hweta nya nza yɛmə mpɛafe te ba'a ndeke nda hɛ ke Agar. Pa ŋkɛ vate nda wəzege te wəmbə ba'a ŋkamte ŋkɛ. Cape nde kalə kandeŋe te ɓerama ta Bɛrshɛba.

¹⁵Ma kwa nahe yɛmə kwa slibə hweta nya ve ne, pa nde negheyi wəzege yitea kwete sleke.

¹⁶Pa nde lə kantishɛ nda cakeɗake le, gare heghe have mbeli kadzete ŋkwa shɛ. Ma ke mbe ghəa nta: «Kaɗe 'ya kanewe wəzege ta ɗa kamte we!» Mentishɛ nde talɛ ŋwela, ntake nde katsa lewela ba'a kanehwene.

¹⁷Pa Shala fate wəzege nyagha kanehwene, pa nde ghwene ta Shala hekakɛ Agar sawa pelɛ ghweme. Ma ke shɛ: «Agar, wa wəsəa shɛ wa? Ghazlənəma na ma, kwa nza nde nahe Shala kefate nehwene ta wəzege nyagha kwagha.

¹⁸Sate! Kesakate wəzege shɛ, keseve ŋkɛ te dzeve, kwa nza ŋkɛ kateve nda hwelefe nya wəba 'ya.»

¹⁹Pa Shala pelemte nda ntsə ke Agar, pa nde nakɛ kwete ghwa le yɛmə kwa. Pa nde lə kaviɗikɛ slibə hweta nya ve ba'a same nda ke wəzege ta nta.

²⁰Nahe Shala kenza le wəzegea shɛ, pa ŋkɛ kelenyɛ. Pa ŋkɛ nzanyɛ te ɓerama ba'a zhɛrenyɛ kande he have.

²¹Te ɓerama ta Paran nzanyɛ ŋkɛ. Pa meghekɛ wəmave nda wəzha ta ka Ɛzhipte.

²²Ma mbe vəa shɛ ne, ma ke Abimɛlɛk ba'a Pikol nya te ghəa ka sewajɛa ŋkɛ sha Abraham: «Nahe Shala kenza le gha mbe yayata wəsə nya mene na.

²³Zemete ɗa fela le Shala teke tsetsenya, kaɗema na kapamte ɗa, ya ŋwalea ɗa, ya ka shihɛ ɗa. Kala nya se 'ya ganyɛke laka gha, nza le ganyɛa mehele laka 'ya ba'a laka hɛɗi nya nza nya na te.»

²⁴Ma ke Abraham: «Kazeme 'ya kafela.»

²⁵Ma te kwete veci, pa Abraham ndeke nda fete ke kweci ka mene slene ta Abimɛlɛk kwa kema ta Abimɛlɛk kwa kelehwe kwete ghwa hɛ.

²⁶Ma ke Abimɛlɛk shɛ: «Keɗepe wəndə nya kemenete wəsə nya kala nya 'ya we. Keɗema ɓeshi nya ne, kegha na kageze ɗa we, 'ya ɓiyitsa, kegha 'ya kafa kageze mbeli we.»

²⁷Pa Abraham ŋkave timɛti, kwi ba'a sla, pa ŋkɛ fəave nda hɛ ke Abimɛlɛk. Pa hɛ menete jikə geva bake nci.

²⁸Pa Abraham ŋkeyi kweci daɓa lɛməa timɛti mberefaŋe te ŋa nci ŋkwa.

²⁹Ma ke Abimɛlɛk shɛ: «Yitea wa ŋkeyi daɓa lɛməa timɛti nyi na mberefaŋe te ŋa nci ŋkwa wa?»

³⁰Ma ke Abraham zhɛnete nda: «Yitea ŋ'wete daɓa lɛməa timɛti na mberefaŋe se mbe dzeve ta ɗa. Te timɛtia shɛhɛ tezəzə na 'ya nde late ghwa nya.»

³¹Vatse hekate nda slə ŋkɛ ke ŋkwa shɛ kaBɛrshɛba, va nya nza ŋkɛ tagha zemete fela hɛ bake nci.

³²Mbe Bɛrshɛba tsahwe ghena ta jikə geva hɛ. Kwetere wəmbəa ŋkɛ, pa yɛ Abimɛlɛk le Pikol nya te ghəa ka sewajɛa ŋkɛ zhɛneghe geva kadzete hɛɗia ka Filisti.

³³Pa Abraham mɓete kwete wəfe kala keyitə mbe Bɛrshɛba. Ntake ŋkɛ kasəkwə Shala nya kaghala ghala laka heka sləa ŋkɛ kaMahwətə.

³⁴Pa Abraham nzanyɛ kavə kwele kwele te hɛɗia ka Filisti.