Read KapsikiDC Gha ta Wəshi 30 Bible Online

Gha ta Wəshi 30 - KapsikiDC bible

Gha ta Wəshi 30

¹Ma kwa nakɛ Rashɛl kaɗema nde keyake nda wəzege ke Zhakob ne, ntake zlɛ kazhɛ nda va wəzha ta meghekɛ. Ma ke sha Zhakob: «Ve ɗa ŋwale, keɗema ŋkɛ tsagha ne, katemte 'ya.»

²Pa wənəa Zhakob hwepenyɛ ve, ma ke shɛ: «KaShala veyi ɗa na na? Gheŋkɛ nde fɛa ŋa keya wəzege.»

³Ma ke zhɛnete nda: «Wa nya kwatera ta ɗa Bilha nya, kwiɗi kaɓelahe le ghenta kezha yake ɗa ŋwale nde. Ma tsagha ne, kateŋ'we ŋwale 'ya te zlaɓa ta nta.»

⁴Pa nde ndeke nda kwatera ta nta Bilha ke Zhakob kamale, ntake ŋkɛ kaɓelahe le.

⁵Njehe Bilha le hwə, bawe yake nda wəzege teza ke Zhakob.

⁶Ma ke Rashɛl: «Nahe Shala keneghate ɗa fete! Nahe ŋkɛ kefate səkwə ta ɗa ba'a kendeke ɗa wəzege teza perə.» Vatse hekate nda slə nde kaDan.

⁷Njehe Bilha, kwatera ta Rashɛl le hwə zhɛkwa, bawe nde yake nda nde bake ta wəzege teza ke Zhakob.

⁸Ma ke Rashɛl: «Mpa nya dzawe yamenete 'ya le wəzha ta meyɛ ɗa, nahe 'ya kehərəte ŋkwa.» Pa nde ndeke nda slə kaNɛftali.

⁹Ma kwa nakɛ Lɛya nahe nde keghereŋe keya wəzege ne, pa nde ndeke nda kwatera ta nta Zilpa ke Zhakob kamale.

¹⁰Bawe Zilpa nya kakwatera ta Lɛya yake nda wəzege teza ke Zhakob.

¹¹Ma ke Lɛya: «Wa nya Shala te 'ya gɛ!» Pa nde hekate nda slə ke wəzegea shɛ kaGad.

¹²Bawe Zilpa, kwatera ta Lɛya yake nda nde bake ta wəzege teza ke Zhakob.

¹³Ma ke Lɛya: «Wa nya zeɗe nza va 'ya gɛ! Tsetsenya gɛ ne, wərə mi kageze zlama ya va 'ya.» Pa nde hekate nda slə kaAsɛr.

¹⁴Ma te kwete hɛ vəa ŋkwa nya leke ha mbeli ne, cape Rəbɛn kadzemte kasepa ya ta wəfe nya ɗe ŋkwa mbeli ve. Pa ŋkɛ ndake nda ke meghekɛ Lɛya. Ma ke Rashɛl sha Lɛya: «Nta ɗa ya ta wəfe ta ɗe nya ndake ŋa nya wəzege ta ŋa gi.»

¹⁵Ma ke Lɛya zhɛnete nda: «Dewə ŋa za ɗa nya kelehwe nya na nda ɗe na kakele ya ta wəfe ta ɗe nya ndake wəzege ta ɗa na?» Ma ke Rashɛl: «Yawa, hɛyi ŋa viɗi nya Zhakob nda nta ɗa ya ta wəfe ta ɗe nya ndake wəzege ta ŋa na!»

¹⁶Ma hetɛhwɛɗi kasheke Zhakob kwamte ne, cape Lɛya kashave shɛ. Ma ke shɛ: «Yitea 'ya tehɛ na ɓeshi, kwa nza ŋkɛ nahe 'ya kepave hweŋkwa te ya ta wəfe ta ɗe nya ndake wəzege ta ɗa.» Pa ŋkɛ hɛnyɛ le te viɗi shɛ.

¹⁷Pa Shala fate səkwə ta Lɛya, njehe le hwə zhɛkwa, bawe yake nda wəzege teza nde mcɛfe ke Zhakob.

¹⁸Ma ke: «Nahe Shala kendeke ɗa zhɛme kwa ndeke nda kwatera ta ɗa 'ya ke za ɗa.» Pa nde hekate nda slə kaIsakar.

¹⁹Njehe Lɛya le hwə zhɛkwa, bawe yake nda nde ŋkwaŋe ta wəzege teza ke Zhakob.

²⁰Ma ke: «Nahe Shala kendeke ɗa wəsə gəmə nya ganyɛ. Ma tsetsenya gɛ ne, kateve zləvə za ɗa te 'ya, kwa yake nda ŋwale tezhili 'ya ŋkwaŋe.» Pa nde hekate nda slə ke wəzegea shɛ kaZabəlon.

²¹Kwa sebe ta ŋkɛ ne, pa nde yake wəzha makwa nya hekate nda slə nde kaDina.

²²Ma ɓiyitsa gɛ, pa Shala zəzəte Rashɛl ba'a fate səkwə ta nta, pa ŋkɛ ndeke nda hweŋkwa keya wəzege.

²³Njehe Rashɛl le hwə, bawe nde yake wəzege teza. Ma ke: «Nahe Shala kekelemte hawe te 'ya.»

²⁴Pa nde hekate nda slə ke wəzegea shɛ kaZhozɛf, ma ke: «Hwe Mahwətə ndeke ɗa kwete wəzege teza tse gɛ!»

²⁵Ma kwa yake Zhozɛf Rashɛl ne, ma ke Zhakob sha Laban: «Pelave ɗa hweŋkwa kalə sha ghɛa ɗa, kadzete hɛɗia ɗa.

²⁶Pelave ɗa hweŋkwa kaslə le mia ɗa ba'a ŋwalea ɗa. Kadzembe mia shɛhɛ menete ŋa slene 'ya. Nahe na keɗepe slene nya menete ŋa 'ya megela.»

²⁷Ma ke Laban shɛ: «Təhwə təhwə ŋa 'ya, fate ɗa ŋa ɗa. Nahe yɛ shala ta ɗa kencɛte ɗa kewəpi wəpi 'ya va Mahwətə tewəmbəreke gha.

²⁸Gezete ɗa meleɓe ta ŋa shɛ 'ya ŋkikɛ ŋa ŋkɛ.»

²⁹Ma ke Zhakob shɛ: «Nahe na keɗepe slene nya menete ŋa 'ya gha le ghəa ŋa ba'a tsema tsema yate ya wəshi keseɗa ta ŋa yitea 'ya.

³⁰Ɓɛhwɛ wəshi va gha nda se 'ya, pa hɛ mbakete geva yitea 'ya kwele kwele. Nahe Mahwətə kewəpikɛ ŋa se te və nya dzeki ghɛa ŋa 'ya. Ma tsetsenya gɛ ne, hweŋkwa temene slene 'ya kaŋa ghɛa ɗa wa?»

³¹Ma ke Laban shɛ: «Wa wəsə nya ve ŋa 'ya wa?» Ma ke Zhakob shɛ: «Wəsə shɛ kave ɗa na we. Ma keyɛte wəsə nya tegeze ŋa 'ya na ne, kazhɛne 'ya kanewe ghweme te wəshi keseɗa ta ŋa ba'a kaya hɛ.

³²'Ya katedzate hwa pɛtɛa wəshi keseɗa ta ŋa ɓeshi. Katetsene timɛti nyi bawe bawe keɗema nyi jiɓe jiɓe le ɗɛkeɗɛ 'ya pɛtɛ te ŋa nci ŋkwa, tsagha kwi. Kameleɓe ta ɗa tenza hɛ.

³³Ma hendɛ, katenewe na kenza nde wəndə ganyɛ 'ya kese na kanewe meleɓe ta ɗa. Pɛtɛa kwi nyi ɗema bawe bawe keɗema jiɓe jiɓe, tsagha timɛti nyi ɗema bawe te hɛ ne, nahe 'ya keghərəhwe hɛ tsagha.»

³⁴Ma ke Laban shɛ: «Ya ndeɗekə, kayɛ 'ya kala nya gezete na.»

³⁵Te vecia shɛnyɛ, pa Laban tseheyi zhɛfa lɛmə nyi galawe galawe keɗema bawe bawe, ŋemia kwi nyi bawe bawe keɗema jiɓe jiɓe ba'a timɛti nyi ɗɛkeɗɛ keɗema gaze te tɛawetɛa te ŋa nci ŋkwa. Pa ŋkɛ dapate nda hɛ te dzeve ke ŋwalea ŋkɛ.

³⁶Kwetere wəmbəa ŋkɛ, pa ŋkɛ ghweneghe hɛ kadzete kwete ŋkwa cakeɗake le Zhakob, hɛ mahekene mene mbeli kadzeghwa. Ma Zhakob le ŋa ŋkɛ ne, kweci wəshi keseɗa ta Laban nyi ketene yaya ŋkɛ.

³⁷Pa Zhakob tsasleve yɛ geta ta wəfe mahekene keghə keghə. Pa ŋkɛ sleslate ŋkwa te zlapələa nci yitea rafete geva hɛ hweliɗiɗi mbe tɛawetɛa.

³⁸Pa ŋkɛ veyi geta nyi hwelɛɗiɗia shɛhɛ kwa ŋkwa kesa yɛmə ta wəshi keseɗa, mbe kema ta nci, kwa nza ŋkɛ kahe kahe vale wəshi kese hɛ kasa yɛmə.

³⁹Ntake wəshi keseɗa nyighɛ kavevale kwa kema ta geta nyighɛ. Ntake ŋemi kaya ŋwale galawe galawe, bawe bawe keɗema jiɓe jiɓe.

⁴⁰Pa Zhakob tseweyi timɛti te ŋa nci ŋkwa. Pa ŋkɛ zhɛreghe hɛ laka nyi galawe galawe ba'a nyi ɗɛkeɗɛ hwa wəshia Laban. Pa ŋkɛ menete kweci wəvəsə wəshi keseɗa kaŋa ŋkɛ, kaɗema jikə hɛ kadzehwa ŋa Laban.

⁴¹Yayata və nya vale wəshi keseɗa nyi tekele nyighɛ ne, nda ve yave geta nyighɛ Zhakob kwa kema ta nci kwa ŋkwa kesa yɛmə kezha vale hɛ kwa kema ta geta shɛhɛ.

⁴²Ama vəa ŋkwa nya nza wəshi keseɗa kepahe pahe ne, kave geta shɛhɛ ŋkɛ we. Ma tsagha, kaŋa Laban nza wəshi keseɗa nyi kepahe pahe, ŋa Zhakob nza nyi kekele kele.

⁴³Nda zhɛre yazhɛre Zhakob kande mcɛlə. Kwele kwele ŋkɛ kemave timɛti ba'a kwi, ka kwaterashi ba'a ka mene slene, zlegweməa lɛmə ba'a kwara lɛmə.