Read KapsikiDC Gha ta Wəshi 32 Bible Online

Gha ta Wəshi 32 - KapsikiDC bible

Gha ta Wəshi 32

¹Pelɛhetɛme Laban sate te ŋkwa masheke masheke, pa ŋkɛ hehəməwəve hwelefefia ŋkɛ ba'a ŋwalea kwɛa ŋkɛ, pa ŋkɛ wəpikɛ hɛ, tewətelɛwe ŋkɛ zhɛreghe geva kalə sha ghɛa ŋkɛ.

²Ntəŋə Zhakob kwa hweŋkwa ta ŋkɛ. Pɛkwe ka ghwene ta Shala se shɛ.

³Ma kwa nakɛ hɛ ŋkɛ, ma ke: «Ghedəkwəa ka sewajɛa Shala ya teke.» Pa ŋkɛ hekate nda slə ke ŋkwa shɛ kaMahanayim.

⁴Pa Zhakob ghweneghe ka ghwene ta ŋkɛ mbe kema kalə sha wəza meghekɛ Ɛzawə nya hwa gamba ta Ɛdom, te hɛɗia Sɛyir.

⁵Ma ke gezave ke hɛ: «Wa nya ghena nya tegeze nda yɛ ke nde sleke ɗa Ɛzawə nya: ‹Ma ke nde mene slene ta ŋa Zhakob: Ki ghɛa Laban nza ɗa 'ya ba'a dera ɗa 'ya pa te və nya.

⁶Kwele kwele sla ba'a kwara lɛmə, timɛti ba'a kwi, ka mene slene ba'a ka kwaterashi va 'ya. 'Ya kaghwene ŋa mbeli nde sleke ɗa kezha zlaɓa na kakemaneve ɗa.›»

⁷Pa mbeli nyighɛ zhɛneke geva, ma ke hɛ sha Zhakob: «Nahe ghen'yɛ kese sha wəza meyɛ ŋa Ɛzawə. Gheŋkɛ perə ne, se yase ŋkɛ sha gha le zhili gwəmsə wəfaɗe.»

⁸Pa ghazlənə zhɛte nda kwele kwele ke Zhakob. Pa ŋkɛ neheve mbeli nyi yite kawəvəsə bake, tsagha yɛ timɛti le kwi, yɛ sla le zlegweməa lɛmə.

⁹Ma ke mbe ghəa ŋkɛ: «Ma kedzehwa kwete wəvəsə Ɛzawə le mpa ne, wərə kwete kambele.»

¹⁰Ntake Zhakob kasəkwə ghə kwa sebe ta ŋkɛ, ma ke: «Shala ta shi ɗa Abraham, Shala ta yiteyɛ ɗa Izak, gha Mahwətə. Ma pa na gezete ɗa: ‹Zhɛneghe geva kadzete hɛɗia ŋa, kadzehwa hwelefe ta ŋa. Katemene ŋa ganyɛ 'ya.›

¹¹Keɓɛhwɛ 'ya yitea zlaɓa ta ŋa ba'a ganyɛa ŋa nyi ndeke ɗa na, 'ya nya kande mene slene ta ŋa. Va nya nza ŋkɛ ne, deke le geta yitea dzeve jive ɗa 'ya te hələa Zhəwrdɛŋe, ama bake wəvəsəa mbeli va 'ya tsetsenya.

¹²Mbelemte ɗa va wəza meyɛ ɗa Ɛzawə kwa nza ŋkɛ kazhɛ ɗa ghazlənə ve, kaghazlənə 'ya yagha ŋkɛ kase kampəmte n'yɛ le mia ɗa ba'a ŋwalea ɗa.

¹³Zəzəte ghena nya gezete ɗa na, ma pa na: ‹Katemene ŋa ganyɛ 'ya. Kwele kwele tembake hwelefefia ŋa 'ya kala ndaleghe nyi kwa hələ nyi ɗema mbeli kaɓelate hɛ.›»

¹⁴Pa Zhakob hɛnyɛ te ŋkwa shɛ. Pa ŋkɛ ntave kweci hwa wəshi keseɗa ta ŋkɛ kezha fə nda kawəsə gəmə ke wəza meghekɛ Ɛzawə:

¹⁵kwi ŋemi gwəmsə ba'a zhɛfa lɛmə bakemsə, ŋemia timɛti gwəmsə bake ba'a gamea lɛmə bakemsə,

¹⁶zlegwemə ŋemi nyi nza ŋwale yitea hɛ mahekenemsə, ŋemia sla wəfaɗemsə ba'a mcɛmcɛli meŋe, ŋemia kwara bakemsə ba'a bidale meŋe.

¹⁷Pa ŋkɛ dapate nda yayata wəvəsə shɛ te dzeve ke ka mene slene ta ŋkɛ. Ma ke sha hɛ: «Dzeghwa mə mbe kema ta ɗa ba'a sərəakɛ mə ŋkwa kwelɛ wəvəsəa wəshi keseɗa shɛhɛ.»

¹⁸Kwatera wəmbəa ŋkɛ, ma ke gezave nda ke nde mene slene ta ŋkɛ nya te kema: «Ma kebegeme na le wəza meyɛ ɗa Ɛzawə, ke'yɛwe ŋkɛ va gha: ‹Ŋa wa na wəndə wa? Tema lə na wa? Ŋa wa wəvəsəa wəshi keseɗa nyi te kema ta ŋa wa?›, ke ne,

¹⁹ma tezhɛne nda na: ‹Ŋa nde mene slene ta ŋa Zhakob. Gheŋkɛ nde ghweneke ŋa hɛ kawəsə gəmə nde sleke ɗa Ɛzawə, kwa sebe ta n'yɛ ŋkɛ kase le ghəa ŋkɛ›, pa shɛ.»

²⁰Tsagha gezave nda ghena nya kwetɛŋe ŋkɛ ke nde bake ta nde mene slene, ke nde mahekene ba'a ke pɛtɛa mbeli nyi kwa sebe ta wəvəsəa wəshi keseɗa: tsagha shɛ tegeze nda yɛ ke Ɛzawə kebegeme yɛ le kwa hweŋkwa.

²¹Ma pe yɛ sha tegeze nda: «Kwa sebe ta n'yɛ Zhakob nde mene slene ta ŋa le ghəa ŋkɛ kase.» Kwa nza ŋkɛ ne, ma ke mbe ghəa ŋkɛ: «Kategweɗakwe nda wənəa Ɛzawə 'ya le wəshi gəmə nyi te kema ta ɗa nyi. Kwetere wəmbəa ŋkɛ tedzawa kema ta ŋkɛ 'ya, nda kwete katekemaneve ɗa ŋkɛ megela.»

²²Cape yɛ wəvəsəa wəshi keseɗa mbe kema, ama mba ŋkɛ mbe ghedəkwə kahɛ mbe viɗia shɛ.

²³Pelɛhetɛme Zhakob sate te ŋkwa heviɗia shɛnyɛ, pa ŋkɛ fəte mia ŋkɛ nyi bake, ka kwaterashia ŋkɛ nyi bake ba'a ŋwalea ŋkɛ nyi meŋe kwetɛŋeghəmbe. Pa ŋkɛ fəghe hɛ jive te hələa Yabok.

²⁴Pa hɛ fəghe hɛ jive te hələa shɛ, kwa sebe ta ŋkɛ, pa ŋkɛ fəghe wəshia ŋkɛ jive te perə.

²⁵Mba Zhakob kwetɛŋenyɛ, pa kwete wəndə wətite wəti le pa te kiɗi ta ŋkwa.

²⁶Ma kwa nakɛ wəndəa shɛ kaɗema ŋkɛ kaweleve Zhakob ne, pa ŋkɛ mpamte ŋkɛ mbe ghwela, veraɗe 'yɛ'yɛa ghwela ta ŋkɛ samenyɛ kwa.

²⁷Ma ke sha Zhakob: «Pelakɛ ɗa kadzeghwa ɗa 'ya kwa nza ŋkɛ wakaka zeweve ta ghweme.» -- «Katepele ŋa 'ya kaɗema na kewəpikɛ ɗa we», ke Zhakob shɛ.

²⁸Ma ke shɛ: «Wa sləa ŋa wa?» -- «Zhakob sləa ɗa», ke shɛ.

²⁹Ma ke wəndəa shɛ zhɛkwa: «Katezhɛne mbeli kaheka ŋa kaZhakob we, Israyɛl tenza sləa ŋa. Kwa nza ŋkɛ nahe na kewətite wəti le Shala ba'a le mbeli, ama gha nde hərəte ŋkwa.»

³⁰Ma ke Zhakob shɛ: «Gezete ɗa sləa ŋa təhwə təhwə ŋa 'ya.» Ma ke shɛ: «Yitea wa 'yɛwe sləa ɗa na wa?» Tagha gɛ, pa ŋkɛ wəpikɛ Zhakob.

³¹Ma ke Zhakob: «Nahe 'ya kenakɛ kema ta Shala, ama mba 'ya teghweme.» Vatse hekate nda slə ŋkɛ ke ŋkwa shɛ kaPenəwɛl, geze ta ŋkɛ, “Kema ta Shala”.

³²Ma nda same veci kwa ghɛ ne, kajive Zhakob te hələa Penəwɛl. Tseheɗe yatseheɗe ŋkɛ va ghwela ta ŋkɛ.

³³Vatse ɗema ka Israyɛl kazeme pamə nya kwa ghwela pa ɓeshi, va nya nza ŋkɛ te pamə ghwela ɗakɛ Zhakob wəsə.