Read KapsikiDC Gha ta Wəshi 37 Bible Online

Gha ta Wəshi 37 - KapsikiDC bible

Gha ta Wəshi 37

¹Pa Zhakob nzanyɛ te hɛɗia Kanan nya se yitenyɛ.

²Wa nya ghena ta ŋwalea Zhakob nya. Va meŋe mberefaŋeghəmbe menete Zhozɛf nda dzemte ŋkɛ yitea yɛ timɛti ba'a kwi zlaɓe le ka kesaka yitenyɛ, ŋwalea yɛ Bilha le Zilpa, mia yitenyɛ. Pɛtɛ geze nda wəsə kwa ndiremi nyi geze mbeli te hɛ Zhozɛf ke yitenyɛ

³Kwele ma ɗehwe Zhozɛf Zhakob ke kweci ŋwalea ŋkɛ, va nya nza ŋkɛ mbe meha yake ŋkɛ ŋkɛ. Pa ŋkɛ slate nda lekwesa ganyɛ kwa verezlɛzlɛ.

⁴Newe ke ŋwalea yitenyɛ ne, za ma Zhozɛf ɗehwe ŋkɛ ke hɛ pɛtɛ. Ntake hɛ kazlɛ ve kwele kwele ba'a kaɗema geze nda ghena zeɗe.

⁵Ma te kwete hɛ ne, pa Zhozɛf shiwəte shiwə. Pa ŋkɛ gezete nda shiwəa shɛ ke ŋwalea yitenyɛ, nyi keɗema ntsə ta ŋkɛ za ma zhɛkwa.

⁶Ma ke sha hɛ: «Fatema mə shiwə nya shiwəte 'ya gi:

⁷Kahwepe ha gheɓəmə hwa ɓeleve hɛ gheɓəmə kwamte mbe wəve kanewe 'ya, te ŋkwa shɛnyɛ ne, slete ŋa ɗa sletenyɛ, pa pɛtɛa ŋa ŋayɛ dzaslete ŋkɛ ba'a gwəɗəŋənji yite.»

⁸Ma ke ka kesaka yitenyɛ shɛ: «Gha ɗe kanza kameghea n'yɛ keɗema kasleke n'yɛ tsagha na?» Pa hɛ ɗema ntsə ta ŋkɛ za ma zhɛkwa va shiwəa ŋkɛ ba'a va ghena ta ŋkɛ.

⁹Pa Zhozɛf shiwəte kwete shiwə, pa ŋkɛ gezete nda ke ka kesaka yitenyɛ, ma ke: «Nahe 'ya keshiwəte kwete shiwə zhɛkwa: ma newe 'ya ne, kase veci, tere ba'a saseregwa meŋe kwetɛŋeghəmbe kagwəɗəŋə yitea hwəa ɗa.»

¹⁰Pa ŋkɛ gezete nda shiwəa shɛ ke yitenyɛ kala nya gezete nda ŋkɛ ke ŋwalea yitenyɛ. Pa yitenyɛ ŋelete ŋkɛ, ma ke shɛ: «Wa mama ta shiwə nya shiwəte nya na wa? Kaɗe na kase n'yɛ le meyɛ ŋa ba'a ŋwalea yiteyɛ ŋa kagwəɗəŋə ntiŋə ghə mbe hɛɗi yitea hwəa ŋa na?»

¹¹Kazhɛ nda zlɛ ke ŋwalea yitenyɛ ve, ama mbe zəzə shiwəa shɛ yitenyɛ.

¹²Ntəŋə ŋwalea yitenyɛa Zhozɛf kadzawa Sishɛm kaya wəshia yite nci.

¹³Ma ke Zhakob sha Zhozɛf te kwete hɛ: «Ashɛ kwa Sishɛm ŋwalea yiteyɛ ŋa kaya wəshi wəka? Nde, 'ya kaghwene ŋa kadzawa sha hɛ.» -- «Yewə», a ke Zhozɛf zhɛnete nda.

¹⁴Ma ke shɛ zhɛkwa: «Kwiɗi newakɛ tsema tsema nza ta nci ba'a wəshi keseɗa, nda se na kageze ɗa.» Pa ŋkɛ ghwenakɛ ŋkɛ same kwa zlərəa Hɛbron. Ma kwa nza Zhozɛf takwa yitea Sishɛm ne,

¹⁵begeme ŋkɛ le kwete wəndə vəa ŋkwa nya dzeghwa ŋkɛ hwa gamba. Ma ke wəndəa shɛ shɛ: «Wa yaghweze na wa?»

¹⁶Ma ke Zhozɛf zhɛnete nda: «'Ya kaghweze ka kesaka yiteyɛ ɗa. Kancɛte ɗa na ŋkwa nya ya wəshi hɛ te na təhwə təhwə ŋa 'ya tse na?»

¹⁷Ma ke wəndəa shɛ zhɛnete: «Nahe hɛ keslənji teke, kwa nza ŋkɛ nahe ŋkɛ kefa kageze dzawa Dotan hɛ.» Cape Zhozɛf kalə kazele ŋwalea yitenyɛ, pa ŋkɛ nakɛ hɛ kwa Dotan.

¹⁸Nda tentsehe ŋkɛ sha hɛ ne, nahe hɛ kenakɛ ŋkɛ cakeɗake, pa hɛ tsahwe ghena kezha pesle ŋkɛ.

¹⁹Ma ke hɛ kwelɛ ghəa nci: «Wa nya nde shiwə nya kase!

²⁰Tsetsenya ne, nde mə, peslekɛ ɓəmə ŋkɛ shɛ mə negheyi ŋkɛ kwa belageji. Kategeze gheɓəmə nahe wəsə nya hwa gamba kempeɗehwe ŋkɛ, nda newe gheɓəmə tsema tsema tenza shiwəa ŋkɛ.»

²¹Pa Rəbɛn fate ghena nyagha. Kaɗe ŋkɛ kambele Zhozɛf shave mbe dzeve ta nci. Ma ke: «Mba gheɓəmə keza mpia ŋkɛ.»

²²Ma ke sha hɛ zhɛkwa: «Peslema wəndə yɛ ma. Negheyi mə ŋkɛ kwa belageji nya te ɓerama nya ɓetəkə, mba yɛ kedɛape dzeve te.» Kezha mbelemte ŋkɛ shave mbe dzeve ta nci ba'a kezha keleghe nda ŋkɛ ke yitenyɛ nda gezete ŋkɛ kala nyagha.

²³Ma kwa ntsehe Zhozɛf sha ŋwalea yitenyɛ ne, pa hɛ keseve ŋkɛ ba'a seɗemte lekwesa ganyɛ kwa verezlɛzlɛ nya kənə.

²⁴Pa hɛ negheyi ŋkɛ kwa belageji. Kehase hase belagejia shɛ kaɗema yɛmə kwa.

²⁵Kwetere wəmbəa ŋkɛ, ntishɛ hɛ kazeme wəsə kezeme. Newe ke hɛ ne, dandelaŋe ka Ismayɛl kwa zəɗə se mbe Gala'ad kajive Ɛzhipte. Kwele kwele mama ta 'wərdə va hɛ te zlegweməa lɛmə.

²⁶Ma ke Zhəwda sha ŋwalea meghekɛ: «Wa yateŋ'we gheɓəmə kepeslekɛ wəza yiteyɛ ɓəmə gheɓəmə ba'a kewəfərəakɛ mte ta ŋkɛ gheɓəmə tse wa?

²⁷Pamte nda ɓəmə ŋkɛ ke ka Ismayɛl nyi, mba gheɓəmə kepesle ŋkɛ, va nya nza ŋkɛ kawəza yiteyɛ ɓəmə, kamimia ɓəmə!» Pa ka kesaka yitenyɛ fate nda ghena.

²⁸Ama pa ka Madiyan nyi kemene fəli dzeghwake dzeghwa ta nci ba'a kelakame Zhozɛf same kwa belageji. Pa hɛ pamte nda ŋkɛ ke ka Ismayɛl kadəɓərəa mze kwa tɛawetɛa bakemsə, pa mbelia shɛhɛ keleghe Zhozɛf kajive Ɛzhipte.

²⁹Ma kwa zhɛneke geva Rəbɛn kadzemɛa belagejia shɛ ne, mba Zhozɛf kwa we. Pa ŋkɛ ŋkwahemte lekwesa ta ŋkɛ.

³⁰Tewətelɛwe ŋkɛ zhɛneghe geva kalə sha ka kesaka yitenyɛ, ma ke: «Mba Zhozɛf kwa we. Dzeyi tema 'ya tse gɛ wa?»

³¹Pa hɛ kelete lekwesa ganyɛ ta Zhozɛf, ma kwa henekɛ zhɛfa hɛ ne, selame hɛ selamahwe ŋkɛ hwa mimia ŋkɛ.

³²Kwetere wəmbəa ŋkɛ, pa hɛ ghweneghe nda lekwesa ganyɛ kwa verezlɛzlɛa shɛ ke yiteyɛa nci, ma ke hɛ shɛ: «Wa nya wəsə nya ntsate ghen'yɛ nya! Neweve kenza ŋkɛ lekwesa ganyɛ ta wəzege ta ŋa ŋkɛ.»

³³Pa ŋkɛ ɗepete lekwesa shɛ, ma ke sha lewela: «Lekwesa ta wəzege ta ɗa deŋwa! Wəsə nya hwa gamba nde slekwemte ba'a nde mpeɗehwe Zhozɛf.»

³⁴Pa Zhakob ŋkwahemte lekwesa ta ŋkɛ, mɓɛke ŋkɛ sha zewe hwa hwə, kwele kwele menete hɛ ŋkɛ kanehwene wəzege ta ŋkɛ.

³⁵Pa pɛtɛa ŋwale tezhili ba'a ŋwale kwɛa ŋkɛ dzeghakɛ kezha gweɗakwe ŋkɛ, ama pa ŋkɛ ɗema gweɗakwe ta ŋwalea ŋkɛ. Kwa nza ŋkɛ ma ke: «Mbe nehwene tedzawa 'ya sha wəzege ta ɗa hwa mbelia kwahɛɗi.» Nda nehwene yanehwene ŋkɛ.

³⁶Pa ka Madiyan pamte nda pelɛ Ɛzhipte ke Potifar, wəndə kwele nya yitea Farawon. Gheŋkɛ ya te ghəa mbeli nyi keya meghe.