Read KapsikiDC Gha ta Wəshi 38 Bible Online

Gha ta Wəshi 38 - KapsikiDC bible

Gha ta Wəshi 38

¹Ma mbe vəa shɛ, ntəŋə Zhəwda slənyɛ hwa ka kesaka yitenyɛ ba'a dzawanyɛ kwa Adəwlam sha kwete wəndə nya nza sləa ŋkɛ kaHira.

²Kwagha ne, dəkwə ŋkɛ te wəzha ta Shəwa, kwete nde Kanan, pa ŋkɛ wəmeve ŋkɛ kamale. Ma kwa ɓelahe ŋkɛ le,

³njehe nde dzawa hwə, pa nde yake wəzege teza, pa Zhəwda hekate nda slə kaƐr.

⁴Njehe malea le hwə ɓiyitsa, bawe yake kwete wəzege teza nya hekate nda slə nde kaOnan.

⁵Kwa sebe ta ŋkɛ, bawe nde yake kwete wəzege teza nya hekate nda slə nde kaShɛla. Kwa Kezib Zhəwda nda yake wəzegea shɛ nde.

⁶Pa Zhəwda wəmave nda male nya nza sləa nta kaTamar ke Ɛr, tezhɛa wəzege ta ŋkɛ.

⁷Pa Ɛr nya katezhɛa wəzege ta Zhəwda menete wəsə kwa ndiremi kwa kema ta Mahwətə nya kemenete nda mtenyɛ ŋkɛ.

⁸Tagha, ma ke Zhəwda sha Onan: «Kelete male ta wəza meyɛ ŋa kamale kezeme ghɛ baŋe na kayake nda hwelefe.»

⁹Ama nahe Onan keɗepe kateɗema wəzegea shɛ kanza kaŋa ŋkɛ. Vatse ŋsle ŋkɛ kadzete hɛɗi kala yayata və nya ɓelahe ŋkɛ le male ta wəza meghekɛ, kezha ɗema ŋkɛ kaya nda hwelefe ke wəza meghekɛ.

¹⁰Wəsə kwa ndiremi yamenete ŋkɛ kwa kema ta Mahwətə nya kepeslekɛ ŋkɛ perə.

¹¹Tagha, ma ke Zhəwda sha makwa ta ŋkɛ Tamar: «Ma kwa nza nde male wede na, ntishɛ ŋa ki ghɛa yiteyɛ ŋa nda tekele wəzege ta ɗa Shɛla.» Kwa nza ŋkɛ ma zəzə ŋkɛ: «Yagha Shɛla kamtenyɛ perə kala ka kesaka meghekɛ.» Ntəŋə Tamar kalə kanza ki ghɛa yitenyɛ.

¹²Temə kwele kwele kadzeghə ne, mtiwə wəzha ta Shəwa nya kamale ta Zhəwda. Ma kwa gweɗakwe Zhəwda kwa sebe ta nehwene, ntəŋə ŋkɛ le mcɛnyɛ Hira, nde Adəwlam kadzeme Timna sha mbeli nyi ketsehe shinti te timɛtia ŋkɛ.

¹³Ma ke mbeli sha Tamar: «Wa nya yitenyɛa za ŋa nya kadzeme Timna kezha tsehe shinti te timɛtia ŋkɛ.»

¹⁴Pa nde seɗemte lekwesa male wede ta nta, dəpə nde sha wəsə kənəa ghə, pa nde lə kantishɛnyɛ mɛa ŋkwa kedzembe Ɛnayim nya kwa hweŋkwa ta Timna. Va nya nza ŋkɛ nahe nde kenakɛ nahe Shɛla kekelenyɛ kaɗema mbeli kenaka kandeke nda kamale.

¹⁵Ma kwa nakɛ Tamar Zhəwda, kamale mefətekwə newe ŋkɛ ŋkɛ, va nya dəpəyi wəsə nde kənəa ghə.

¹⁶Keɗepete ŋkɛ kamakwa ta ŋkɛ nde we. Pa ŋkɛ hendave nda geva va kema ta hweŋkwa, ma ke shɛ: «Kaɗe 'ya kanza le gha.» Ma ke zhɛnete nda: «Wa yateve ɗa na nda tenza gheɓə wa?»

¹⁷Ma ke shɛ: «Kateghwene ŋa zhɛgwəa kwe 'ya se hwa wəshia ɗa.» Ma ke shɛ: «Yɛkwa, ama ɗave ɗa wəsə kaba nda teghweneke ɗa ŋkɛ na.»

¹⁸Ma ke shɛ: «Wa wəsə nya ɗe na wa?» Ma ke shɛ: «Yɛ lamba ta ŋa le zewe nya mbe ba'a geta nya yitea dzeve va gha.» Pa ŋkɛ fəave nda hɛ. Pa ŋkɛ ɓelahe le, njehe nde le hwə.

¹⁹Cape nde kalə sha ghɛ. Pa nde kelemte wəsə nya kənəa ghəa nta ba'a seɗete lekwesa wede ta nta.

²⁰Pa Zhəwda ghwenakɛ nde Adəwlam nya kamcɛnyɛ le zhɛgwəa kwe nyagha ba'a kezha fəke nda wəshi nyi fəave nda ŋkɛ. Ama kenakɛ malea shɛ ŋkɛ we.

²¹Ma ke sha ka Ɛnayim: «Tema male mefətekwə nya kese nya teke mɛa hweŋkwa wa?» Ma ke hɛ shɛ: «Kegha male mefətekwə teke we.»

²²Pa mcɛnyɛa shɛ zhɛneke geva kase sha Zhəwda, ma ke shɛ: «Kesləyi ŋkɛ 'ya we, nahe mbeli nyi mbe melemea shɛ kegezete ɗa kaɗema male mefətekwə kegha tagha.»

²³Ma ke Zhəwda shɛ: «Nza wəshia shɛhɛ ve! Vema hawe mə te ghəa ɓə ma. Nahe 'ya keghweneghe nda zhɛgwəa kwe, ama gha ne, kesləyi ŋkɛ na we.»

²⁴Kwa sebe ta tere mahekene, ma ke mbeli sha Zhəwda: «Nahe makwa ta ŋa Tamar kemenete mefətekwə. Le hwə nde tsetsenya.» Ma ke Zhəwda: «Keleghe ŋkɛ mbeli kajive te ŋwela shɛ mbeli teremte ŋkɛ teghweme le ghwə.»

²⁵Ma vəa ŋkwa nya kese ŋkɛ mbeli kashave ne, pa nde ghweneghe wəndə kageze nda ke yitenyɛa za nta: «Wəndə nya nza wəshi nyi kaŋa ŋkɛ nde ndeke ɗa hwə. Təhwə təhwə ŋa 'ya, ɗepete ŋa wa ŋa wa yɛ lamba nya le zewe nya mbe ba'a geta nya.»

²⁶Ma kwa ɗepete wəshia shɛhɛ Zhəwda, ma ke: «Tiɗiɗi ma nde ke 'ya, kwa ɗema 'ya kendeke nda ŋkɛ kamale ke wəzege ta ɗa Shɛla.» Ama kezhɛne Zhəwda kaɓelahe le we.

²⁷Newe ke mbeli kwa senyɛ vəa ya ta nta, kwalegha ya kwa hwə ve.

²⁸Ma vəa ŋkwa nya ya nde ne, mpɛke kwete hakayi dzeve. Pa male kwa ya ŋkwa keseve dzevea shɛ ba'a hwepeyi zewe kwa ghɛmɛ kwa, ma ke: «Nya nde ghate kasawa.»

²⁹Ama pa wəzegea shɛ zhɛneghe dzeve ta ŋkɛ kadzate hwə, pa wəza meghekɛ sawanyɛ mpelɛa ma. Ma ke male kwa ya ŋkwa: «Laka ma perawete nya na hweŋkwa gɛ!» Pa Zhəwda hekate nda slə kaPɛrɛs, geze ta ŋkɛ “Perawe”.

³⁰Ma kwa sebe ta ŋkɛ, pa wəza meghekɛ nya nza zewe kwa ghɛmɛ kwa dzeve ve sawa. Pa mbeli hekate nda sləa kaZɛra.