Read KapsikiDC Gha ta Wəshi 41 Bible Online

Gha ta Wəshi 41 - KapsikiDC bible

Gha ta Wəshi 41

¹Va bake kadzeghə ne, pa Farawon shiwəte shiwə: ma newe ŋkɛ ne, mɛa hələa Nil ŋkɛ.

²Pa ŋkɛ nakɛ mbəkwəa lɛməa sla mberefaŋe same kwa hələa shɛ kedɛɓedɛa dɛɓedɛanji. Ntake hɛ kazeme gwəzə dzeyi mɛa hələbə.

³Kwetere wəmbəa ŋkɛ, pɛkwe kweci mbəkwəa lɛmə mberefaŋe same kwa hələ kepahe pahe ba'a 'yɛrazlɛŋwe zlɛŋwe te sebe ta nci. Pa hɛ nzanji vare nyi keghate mɛa hələbəa Nil.

⁴Tagha gɛ, pa sla nyi kepahe pahe nyi zehwe nyi dɛɓedɛa dɛɓedɛa nyi mberefaŋe. Te vəa shɛ, feɗeghe Farawon feɗeghenyɛ.

⁵Zhɛne shelɛŋe ŋkɛ yitea hɛ, pa ŋkɛ shiwəte kwete shiwə. Ma newe ŋkɛ ne, mberefaŋe ghəa ha kejama jamanji ba'a kevərəzlə vərəzlə pesete geva te cafecɛge nya kwetɛŋe.

⁶Kwetere wəmbəa ŋkɛ, mberefaŋe kweci keshilə shilə ba'a keghwele ghwele va sefə nya kevɛ se te ɓerama pesete geva te sebe ta nci.

⁷Pa nyi ketiwɛɗi tiwɛɗi nyighɛ ndahwe ghəa ha nyi jama jama ba'a kevərəzlə vərəzlə nyighɛ. Tagha ne, feɗeghakwe Farawon feɗeghenyɛ, pa ŋkɛ ɗepete shiwə yashiwəte ŋkɛ.

⁸Ma masheke ne, kwetɛ kwetɛŋe mehele ta Farawon. Pa ŋkɛ hekake ka mene ghwɛ ba'a ka ntsehwele ntsehwele nyi mbe Ɛzhipte pɛtɛ. Pa ŋkɛ gezete nda shiwəa ŋkɛ ke hɛ, ama wəndə shɛ kegezete nda ghena nya mbe we.

⁹Tagha, ma ke wəndə nya te ghəa wəshi kesa sha Farawon: «Meghe yawe, 'ya kancɛ fete ta ɗa ɓeshi!

¹⁰Te kwete hɛ vəashi, nahe wənəa ŋa kezhɛte ŋa va 'ya ba'a va wəndə nya te ghəa wəshi kezeme, pa na keseyi n'yɛ kwa daŋgayɛ ki ghɛa wəndə nya te ghəa ka ya ŋkwa.

¹¹Pa n'yɛ shiwəte shiwə mbe viɗi nya kwetɛŋe bake n'yɛ. Ama keghə keghə ghena nyi mbe shiwəa shɛhɛ.

¹²Nahe kwete wəzege ta ka Ɛbrə kese hwa ghen'yɛ kamava ta wəndə nya te ghəa ka ya ŋkwa. Pa ghen'yɛ gezete nda shiwəa n'yɛ, pa ŋkɛ ncɛte nda ghena nya mbe shiwəa ŋkɛ ke yayata wəndəa n'yɛ.

¹³Pa wəshia shɛhɛ menete geva kala nya gezete ŋkɛ: pa mbeli zhɛneyi ɗa mbe slene ta ɗa, ghɛke mbeli hwepeyite nda zewe yitea welɛ ke wəndə nya te ghəa wəshi kezeme yitea nza ŋkɛ ŋalawe pelɛ wəfe.»

¹⁴Pa Farawon ghwenakɛ ŋkwa kaheka Zhozɛf. Pa mbeli kelakame ŋkɛ kahe kahe same kwa daŋgayɛ, pa mbeli ŋsəmte nda ghə, mbeɗakwe ŋkɛ mbeɗemte lekwesa, cape ŋkɛ kadzawa kema ta Farawon.

¹⁵Ma ke Farawon sha Zhozɛf: «Nahe 'ya keshiwəte shiwə, ama wəndə shɛ kegezete ghena nya mbe we. Nahe 'ya kefa wərə na kagezete ghena nyi mbe yɛ shiwə kegezete ŋa hɛ mbeli.»

¹⁶Ma ke Zhozɛf sha Farawon: «'Ya ŋkɛ we! Shala nde nza kancɛte ŋa ghena nya mbe tiɗiɗi.»

¹⁷Ma ke Farawon sha Zhozɛf: «Ma newe 'ya mbe shiwəa ɗa ne, mɛa hələa Nil 'ya.

¹⁸Pa 'ya nakɛ mbəkwəa lɛməa sla mberefaŋe kedɛɓedɛa dɛɓedɛanji ba'a keganji ganjinji kasame kwa hələa Nil. Ntake hɛ kazeme gwəzə dzeyi mɛa hələbə.

¹⁹Zhɛne ne, mberefaŋe kweci mbəkwəa lɛməa sla kepahe pahe, kendiremi ndireminji ba'a 'yɛrazlɛŋwe zlɛŋwe same kwa hələa shɛ. Kegha 'ya kanakɛ wəshi keseɗa nyi 'yɛrazlɛŋwe zlɛŋwe kala hɛ te hɛɗia Ɛzhipte we.

²⁰Pa mbəkwəa lɛməa sla nyi kepahe pahe ba'a nyi 'yɛrazlɛŋwe zlɛŋwe mpeɗehwe nyi mberefaŋe nyi keghate kedɛɓedɛa dɛɓedɛanji.

²¹Ma kwa zehwe hɛ hɛ ne, kaɗepete wəndə nahe hɛ kezehwe wəsə ya ci'a ŋkɛ we. Ma vəa ŋkwa nyagha gɛ ne, pa 'ya feɗeghe ɗa.

²²Zhɛne, pa 'ya shiwəte kwete: newe 'ya, mberefaŋe ghəa ha mberefaŋe kejama jamanji ba'a kevərəzlə vərəzlə same te cafecɛge nya kwetɛŋe.

²³Ɓiyitsa, mberefaŋe kweci keshilə shilə, keslɛahe slɛahenji ba'a keghwele ghwele va sefə nya kevɛ se te ɓerama pesete geva kwa sebe ta nci.

²⁴Pa ghəa ha nyi slɛahe slɛahe nyighɛ ndahwe nyi jama jama mberefaŋe. Pa 'ya gezete nda shiwəa shɛhɛ ke ka mene ghwɛ ne, ama wəndə shɛ hwa hɛ kegezete ɗa ghena nyi mbe hɛ we.»

²⁵Ma ke Zhozɛf sha Farawon: «Yipə yipə ghena nyi mbe shiwəa ŋa nyi bake nyi meghe yawe. Shala nde ncɛ ŋa wəsə nya teɗe ŋkɛ kamene.

²⁶Ma mbəkwəa lɛməa sla nyi dɛɓedɛa dɛɓedɛa nyi mberefaŋe ne, va mberefaŋe hɛ, ghəa ha nyi jama jama nyi mberefaŋe ne, va mberefaŋe hɛ perə: shiwə nya kwetɛŋe hɛ.

²⁷Ma mbəkwəa lɛmə sla nyi mberefaŋe nyi kepahe pahe ba'a 'yɛrazlɛŋwe zlɛŋwe nyi kesame kwa sebe ta nci ne, va mberefaŋe hɛ. Tsagha ghəa ha nyi mberefaŋe keshilə shilə ba'a keghwele ghwele va sefə nya kevɛ se te ɓerama, ama kava mberefaŋe ta ma tenza hɛ.

²⁸Wa nya ghena nya va 'ya nya kageze nda ke Farawon, Shala nde ncɛte ŋa wəshi nyi temene ŋkɛ.

²⁹Katemene geva va mberefaŋe nyi nza wəshi kezeme kwele kwele te pɛtɛa hɛɗia Ɛzhipte.

³⁰Kwa sebe ta ŋkɛ, katese ma kava mberefaŋe nya ketezaghə nda wəshi nyi kese kwele kwele te hɛɗia Ɛzhipte ke mbeli. Katesa nda gəli ma ke mbeli nyi te hɛɗi.

³¹Dzawe tenza ma shɛ kaɗema mbeli kateɗepete nahe wəshi kezeme kese kwele kwele te hɛɗi.

³²Ma nda shiwəte shiwəa shɛ Farawon bake zhigə ne, va nya tarete Shala ba'a va nya ɗe ŋkɛ katemene kahe kahe.

³³Ma tsetsenya ne, zeleve wəndə nya keɗepe wəsə ba'a nya kentsehwele ntsehwele Farawon yitea nza te ghəa Ɛzhipte.

³⁴Nteyi mbelia jama Farawon dzeyi mbe hɛɗia Ɛzhipte yitea kele kwa mcɛfe ta bela ta wəshi nyi kese te wəve mbe va mberefaŋe nyi nza wəshi kezeme kwele kwele.

³⁵Tsene wəshi kezeme hɛ mbe va ganji mberefaŋe nyi ketese, bete ha shɛ hɛ mbe yɛ cɛ kebete wəshi te sləa ŋa dzeyi mbe yɛ meleme kezha wəmbəyi hɛ kambe kwete veci.

³⁶Kawəsə nya wəmbəyi hɛɗi tenza ŋkɛ kezha va ta ma nyi ketemene geva mberefaŋe mbe Ɛzhipte. Ma tsagha, kateza sebe ma te mbeli te hɛɗia Ɛzhipte we.»

³⁷Zeɗehwe ghena shɛ ke yɛ Farawon le mbeli nyi yite pɛtɛ.

³⁸Ma ke Farawon sha hɛ: «Wəndə nya ne, Sefəa Shala ya viɗi mbe. Katenakɛ kwete gheɓəmə wəndə za ma ke gheŋkɛ na?»

³⁹Kwa sebe ta ŋkɛ, ma ke Farawon sha Zhozɛf: «Kwa nza ŋkɛ nahe Shala kencɛte ŋa pɛtɛa wəshia shɛhɛ, wəndə nya ɗepe ma wəsə ba'a nya ntsehwele ma shɛ ke gha we.

⁴⁰Gha nde nza kawəndə nya te ghəa hɛɗia ɗa, va gha tefa ghena mbeli nyi te pɛtɛa hɛɗia ɗa, deke va nza pelɛ pasla nza 'ya kwele ma ke gha.

⁴¹Tsetsenya ne, 'ya kave ŋa te ghəa pɛtɛa hɛɗia Ɛzhipte.»

⁴²Seɗeŋwe ŋkɛ sha ŋgwedɛba same kwa dzeve ta ŋkɛ, pa ŋkɛ seɗate nda ŋkɛ te dzeve ke Zhozɛf. Pa ŋkɛ seɗaghe nda lekwesa kwa kweɗekwe ba'a seɗeŋwe ŋkɛ sha zhɛɗa mze kwa tere tere kwa welɛ ve.

⁴³Kwa sebe ta ŋkɛ, pa ŋkɛ veyi ŋkɛ pelɛ kwa bake ta wəmata gədəwəa ŋkɛ, ma ke mbeli sha zlape te kema ta ŋkɛ: «Slə mə kwa hweŋkwa!» Tsetse veyi Zhozɛf Farawon te ghəa hɛɗia Ɛzhipte.

⁴⁴Ma ke sha Zhozɛf zhɛkwa: «'Ya ya kaFarawon! Wəndə shɛ kakafe ya kwatɛka ta dzeve ŋkɛ te pɛtɛa hɛɗia Ɛzhipte keɗema na kendeke nda hweŋkwa we.»

⁴⁵Ma kwetere wəmbəa ŋkɛ, pa Farawon hekate nda slə ke Zhozɛf kaSafnat-Panɛya, pa ŋkɛ ndeke nda Asnat, wəzha ta Potifɛra nya kande dzeghe Shala mbe meleme ta On kamale. Tagha, cape Zhozɛf kalə kanewe hɛɗia Ɛzhipte.

⁴⁶Va ta Zhozɛf mahekenemsə nda dzawa kema ta Farawon, meghea ka Ɛzhipte ŋkɛ. Pa Zhozɛf sərəakɛ Farawon kezha dzedzeghwa dzeyi mbe pɛtɛa hɛɗia Ɛzhipte.

⁴⁷Ma va ganji nyi mberefaŋe nyi, kwele kwele menete mene wəshi te hɛɗi.

⁴⁸Pa Zhozɛf tsenete wəshi kezeme mbe Ɛzhipte kava mberefaŋe. Dzeyi mbe yɛ meleme ne, pa ŋkɛ bebeteyi wəshi kezeme nyi kese mbe wəve nyi dzeyi yitea hɛ.

⁴⁹Pa ŋkɛ tsenete ha kwele kwele kala ndaleghe nya kwa hələ. Pa mbeli sərəakɛ ɓela hɛ kwa ɗema mbeli kapesle yite.

⁵⁰Nda tese va ta ma ne, nahe Asnat, wəzha ta Potifɛra, nde dzeghe Shala nya mbe meleme ta On keyake nda ŋwale tezhili bake ke Zhozɛf.

⁵¹Pa ŋkɛ ndeke nda slə ke nde ghate ta wəzege ta ŋkɛ kaManasɛ, ma ke: «Nahe Shala kendeke ɗa hweŋkwa kezaghə yaka nyi sahwe 'ya ba'a geva nya nehemte ya le mbelia n'yɛ.»

⁵²Ama nde bake ne, kaƐfrayim hekate nda slə ŋkɛ, ma ke: «Nahe Shala kendeke ɗa ya ŋwale te hɛɗi nya sahwe yaka 'ya.»

⁵³Nahe va mberefaŋe nyi nza nyi wəshi kezeme kwele kwele mbe kekiɗinji mbe Ɛzhipte.

⁵⁴Pa va ta ma nyi ketemene geva mberefaŋe ghate geva kala nya gezete Zhozɛf. Pa ma pesleyi geva te pɛtɛa yɛ hɛɗi, ama wəshi kezeme ya mbe Ɛzhipte.

⁵⁵Ma kwa dzete ka Ɛzhipte ma ne, ntake hɛ ka'yɛwe wəshi kezeme va Farawon. Ma ke Farawon sha hɛ: «Kwiɗi mə sha Zhozɛf, mene mə wəsə nya tegeze ŋayɛ ŋkɛ!»

⁵⁶Pɛtɛ mbeli nyi te hɛɗia shɛ te ma shɛ. Pa Zhozɛf pelemte yɛ cɛ kebete wəshi kezha pamte nda ha ke ka Ɛzhipte. Kwele kwele ma mtsehete geva mbe Ɛzhipte.

⁵⁷Kase mbeli te yayata hɛɗi kezha pa ha va Zhozɛf, kwa nza ŋkɛ ghyanake ma te yayata ŋkwa.