Read KapsikiDC Gha ta Wəshi 42 Bible Online

Gha ta Wəshi 42 - KapsikiDC bible

Gha ta Wəshi 42

¹Fa ke Zhakob ne, ha ya shɛ kwa Ɛzhipte. Ma ke sha ŋwalea ŋkɛ: «Wa raberə newe ghəa ŋayɛ kwa ntsə kwa ntsə wa?

²Nahe 'ya kefate ha ya shɛ kwa Ɛzhipte. Dzawa mə shɛ yɛ pave ɓəmə kezha dɛŋe wənəa ɓəmə ba'a kezha ɗema gheɓəmə kampə.»

³Ntəŋə kweci ka kesaka yitenyɛa Zhozɛf meŋe kadzawa Ɛzhipte kapa ha,

⁴ama kese Zhakob kaghwene Bɛnjamɛn, wəza meghekɛa Zhozɛf kadzawa yitea ka kesaka yitenyɛ we. Kwa nza ŋkɛ «Yagha wəsə kwa ndiremi temenete nda geva», ke mbe ghəa ŋkɛ.

⁵Hwa'a ŋwalea Israyɛl kapa ha zlaɓe le kweci mbeli, kwa nza ŋkɛ ma ya shɛ dzawe te hɛɗia Kanan.

⁶Zhozɛf ya kawəndə nya te ghəa hɛɗi, gheŋkɛ nde pamte nda ha ke pɛtɛa ka mentiɓəa sli. Hwa'a ka kesaka yitenyɛ, gwəɗəŋə hɛ mbe kema ta ŋkɛ ntiŋə ghə mbe hɛɗi.

⁷Dəkwəma ta Zhozɛf te ka kesaka yitenyɛ ne, pa ŋkɛ ɗepete hɛ, ama kese ŋkɛ kancɛ nda ghəa ŋkɛ ke hɛ we. Ma ke mpeɗete nda slene ke hɛ: «Tema se yɛ wa?» Ma ke hɛ shɛ: «Sawa pelɛ hɛɗia Kanan kezha pa wəshi kezeme.»

⁸Nahe Zhozɛf keɗepete ka kesaka yitenyɛ, ama kezhɛne hɛ kaɗepete ŋkɛ we.

⁹Tagha gɛ, pa Zhozɛf zəzəte shiwə nya shiwəte ŋkɛ te ghəa nci. Ma ke zhɛkwa: «Mbeli nyi kese kanewe ŋkwa yɛ! Gheyɛ se kezha newe zeweve ta hɛɗi nya.»

¹⁰Ma ke hɛ shɛ: «Ewə, nde sleke n'yɛ yawe we, ka mene slene ta ŋa se kezha pave wəshi kezeme nahe.

¹¹Nahe n'yɛ kenza kaŋwalea wəndə nya kwetɛŋe. Kaganda yageze ghen'yɛ! Kenza ghen'yɛ kambeli nyi kese kanewe ŋkwa we.»

¹²Ma ke sha hɛ: «Tseŋwəa ŋayɛ! Kezha newe zeweve ta hɛɗi se yɛ.»

¹³Ma ke hɛ: «Tsagha we, ŋwalea wəndə nya kwetɛŋe ghen'yɛ ba'a sawa pelɛ hɛɗia Kanan ghen'yɛ. Ka kesaka yita meŋe bakeghəmbe se ghen'yɛ, mba wəza yiteyɛa n'yɛ nya ɓɛhwɛ pelɛagha yitea yiteyɛa n'yɛ, nahe kwete wəndəa n'yɛ kezanyɛ.»

¹⁴Ma ke Zhozɛf sha hɛ: «Nahe 'ya kegezete ŋayɛ, mbeli nyi kese kanewe ŋkwa yɛ.

¹⁵Ama katedzeghe ŋayɛ 'ya: le Farawon ne, kazeme ŋayɛ fela 'ya: ashɛ yɛ kaslə te hɛɗi nya keɗema yɛ kekeleke wəza yiteyɛ ŋayɛ nya ɓɛhwɛ kase teke we.

¹⁶Ghwenakɛ mə kwete wəndəa ŋayɛ kalə kaheka wəza yiteyɛ ŋayɛ. Ma kweci mbeli ne, kwa daŋgayɛ tenza hɛ. Ma tsagha, katenewe 'ya kenza ŋkɛ kaganda ya va gheyɛ. Kazeme ŋayɛ fela 'ya le Farawon, ma keɗema ŋkɛ tsagha ne, ka se kanewe ŋkwa yɛ.»

¹⁷Pa Zhozɛf keseyi hɛ pɛtɛ kwa daŋgayɛ kahɛ mahekene.

¹⁸Te kwa mahekene ta hɛ, ma ke sha hɛ: «Wa nya wəsə nya temene yɛ nya kezha mbele mpia ŋayɛ. 'Ya ne, kahawe 'ya va Shala.

¹⁹Ma kenza ŋkɛ mbeli nyi tiɗiɗi yɛ ne, nza kwete wəndəa ŋayɛ kwa daŋgayɛ ki ghɛ nya nza nya yɛ. Ma gheyɛ kweci mbeli, fəghe nda mə ha ke mbelia ŋayɛ nyi shewə va ma.

²⁰Ma kwetere wəmbəa ŋkɛ, keleke ɗa mə wəza yiteyɛ ŋayɛ nya ɓɛhwɛ. Ma tsagha, kateɗepe 'ya kaganda yageze yɛ, katempə yɛ we.» Pa hɛ menete tsagha.

²¹Ma ke hɛ kwelɛ ghəa nci: «Aya! Ɗa ya te gheɓəmə va wəsə nya menete nda gheɓəmə ke wəza yiteyɛ ɓəmə. Nahe gheɓəmə kenakɛ taze ta mehele ta ŋkɛ, nahe ŋkɛ kese katsa ɓəmə təhwətə, ama kese gheɓəmə kafa we. Vatse nda nza ɗa nya te gheɓəmə tsetsenya.»

²²Ma ke Rəbɛn sha hɛ: «Ashɛ 'ya kegezete ŋayɛ kezha ɗema yɛ kamene nda wəsə ke wəzege nya wəka? Ama hɛreɗɛ yɛ ɗema fa ɗa. Ma tsetsenya gɛ, kelɛhe ta ŋkɛ yaŋki gheɓəmə.»

²³Keɗepe hɛ kafefa Zhozɛf we, kwa nza ŋkɛ ne, wəndə nya kezhɛre ghena ya kwelɛ hɛ.

²⁴Ma tagha gɛ, pa Zhozɛf hendemte geva vare hɛ kalə kanehwene. Ma kwa zhɛreke geva Zhozɛf ne, pa ŋkɛ gezete nda ke hɛ kezha keseyi Simɛyon. Pa ŋkɛ hwepeyi ŋkɛ kwa zewe lɛ kwa ntsə ta nci.

²⁵Kwa sebe ta ŋkɛ, pa Zhozɛf gezete nda ke mbeli kezha viɗi behwea nci le ha, kezha ve nda cɛdɛa ŋkɛ ke yayata wəndə kwa slibə ba'a kezha ɗave nda wəshi nyi tezeme hɛ kwa hweŋkwa ke hɛ. Pa mbeli menete nda tsagha ke hɛ.

²⁶Pa ka kesaka yita nyighɛ vate wəshi te kwara ta nci, cape hɛ kwa hweŋkwa.

²⁷Ma kwa ghereŋe hɛ kezha hɛ kwa hweŋkwa heviɗi, pa kwete wəndəa nci pelemte behwea ŋkɛ kezha nta nda wəsə kezeme ke kwara ta ŋkɛ, pa ŋkɛ ntsate dala ta ŋkɛ mɛa behwe.

²⁸Ma ke sha ka kesaka yitenyɛ: «Nahe mbeli kezhɛnave ɗa dala ta ɗa! Wa nya kwa behwea ɗa.» Wewəɗike helia nci slanji, ntake ghazlənə kazhɛ nda ke hɛ. Ma ke hɛ kwelɛ ghəa nci: «Wa wəsə nya menete ɓəmə nya Shala wa?»

²⁹Ma kwa ntsehe hɛ te hɛɗia Kanan sha yiteyɛa nci ne, pɛtɛ hɛ ɓelamte nda wəshi nyi kemenete geva.

³⁰Ma ke hɛ: «Kwele kwele mpeɗete n'yɛ slene wəndə nya kesleke hɛɗia shɛ, kambeli nyi kelə kanewe ŋkwa newe n'yɛ ŋkɛ.

³¹Ma pe n'yɛ zhɛnete nda: Mbeli nyi kese kanewe ŋkwa ghen'yɛ we, ama mbeli nyi tiɗiɗi.

³²Kaka kesaka yita meŋe bakeghəmbe se n'yɛ. Nahe kwete wəndəa n'yɛ kezanyɛ, ama mba nya ɓɛhwɛa n'yɛ yitea yiteyɛa n'yɛ pelɛ hɛɗia Kanan.

³³Ma ke wəndə nya te ghəa hɛɗia shɛ sha ghen'yɛ: ‹Wa nya tsetse teɗepe 'ya kenza nde kaganda ya va gheyɛ: sərəakɛ ɗa mə kwete wəndəa ŋayɛ teke, fəghe nda mə ha ke mbelia ŋayɛ nyi shewə va ma.

³⁴Kwa sebe ta ŋkɛ, keleke ɗa mə wəza yiteyɛ ŋayɛ nya ɓɛhwɛa shɛ, ma tsagha, kateɗepete 'ya kaɗema yɛ kaka newe ŋkwa, ama kambeli nyi tiɗiɗi. Katepele ŋayɛ wəza yiteyɛ ŋayɛ 'ya ba'a katepele ŋayɛ hweŋkwa 'ya kamene fəli te hɛɗi nya.›»

³⁵Ma kwa betakame wəshi hɛ same kwa behwea nci ne, pa yayata wəndə ntsate slibə cɛdɛa ŋkɛ kwa behwea ŋkɛ. Ma kwa nakɛ cɛdɛa shɛ hɛ le yiteyɛa nci ne, ntake ghazlənə kazhɛ nda ke hɛ.

³⁶Ma ke yiteyɛa nci Zhakob sha hɛ: «Nahe yɛ kezamte ŋwale bake yitea 'ya: bətə Zhozɛf, bətə Simɛyon, zhɛne ne, kaɗe yɛ kakelemte Bɛnjamɛn va 'ya! Kadzeghəa 'ya dzeghə ghena shɛhɛ pɛtɛ!»

³⁷Ma ke Rəbɛn shɛ: «Pa na mpəmte ŋwale tezhilia ɗa nyi bake nyi kekelekema ŋa Bɛnjamɛn 'ya! Dapate ɗa te dzeve, katezhɛneke ŋa ŋkɛ 'ya kase.»

³⁸Ma ke Zhakob zhɛnete nda: «Ewə, kadzawa wəzege ta ɗa yitea gheyɛ we. Nahe wəza meghekɛ kemte, deke gheŋkɛ nde tene va 'ya. Ma kemenete nda geva wəsə kwa ndiremi mbe dzeghwa ta ŋayɛ kehale hale 'ya kala nya ne, katemte ɗa 'ya va zəzə ta beze ghena ta ŋayɛ.»