Read KapsikiDC Gha ta Wəshi 44 Bible Online

Gha ta Wəshi 44 - KapsikiDC bible

Gha ta Wəshi 44

¹Ma ke Zhozɛf gezave nda ke wəndə nya te ghəa wəshia ŋkɛ: «Viɗikɛ nda behwe mbeli nyi le ha kala nya nza hɛ wərə kakelete. Zhɛneyi nda cɛdɛa ŋkɛ ke yayata wəndə mɛa behwea ŋkɛ.

²Kateve helape kesa wəsə kwa mze kwa tɛawetɛa ta ɗa na mɛa mɛa behwea nya ɓɛhwɛ, tsagha cɛdɛa ŋkɛ.» Pa wəndəa shɛ menete kala nya gezete nda Zhozɛf.

³Kiɗima ta ŋkwa te hendɛ ta ŋkwa ne, pa mbeli pelakɛ hɛ kaslə le kwara lɛməa nci.

⁴Nahe hɛ keshavenji mbe meleme kaɗema kenaka kalə cakeɗake ne, ma ke Zhozɛf gezete nda ke wəndə nya te ghəa wəshia ŋkɛ: «Kwiɗi le hwɛ, kekave mbeli nyighɛ. Ma pa na sha hɛ: ‹Yitea wa wate wəsə kwa ganyɛ yɛ le kwa ndiremi wa?

⁵Yitea wa ghərəhwe helape kesa wəsə ta nde sleke ɗa ba'a nya newe wəsə nya ketemene geva ŋkɛ kwa yɛ wa? Wəsə nya ndiremi yamenete yɛ.›»

⁶Pa wəndə nya te ghəa wəshi nyi ki ghɛa Zhozɛf kekave hɛ ba'a gezete nda ghena shɛhɛ ke hɛ.

⁷Ma ke ka kesaka yita nyighɛ: «Tsema geze ghena nya kala nya na te ghen'yɛ tse wa nde sleke n'yɛ? Ndiremike ŋkɛ sha ghen'yɛ kamene wəsə nya kala nya!

⁸Ma cɛdɛ nya ntsate ghen'yɛ mɛa mɛa behwea n'yɛ ne, ashɛ ghen'yɛ kezhɛneke se te hɛɗia Kanan wəka? Tsema nza ghen'yɛ kaghərəve mze kwa tɛawetɛa keɗema mze kwa tere tere ki ghɛa nde sleke ŋa wa?

⁹Ma wəndəa n'yɛ nya ntsate helape kesa wəsəa shɛ mbeli ve ne, pa mbeli peslekɛ ŋkɛ. Ma ghen'yɛ ɓiyitsa, kaka mavashi ŋa tenza n'yɛ.»

¹⁰Ma ke wəndəa shɛ zhɛnete: «Ma wəndə nya ntsate mbeli ve ne, kamava ta ɗa tenza ŋkɛ, ama waɗe tenza kweci.»

¹¹Pa ka kesaka yita nyighɛ fəakawa behwea nci kahe kahe, yayata wəndə kapele behwea ŋkɛ.

¹²Ntake wəndə shɛ kanewe pɛtɛa behwea nci. Pa ŋkɛ ghate te ŋa wəndə kwele ba'a keɗaŋemte te ŋa nya ɓɛhwɛ. Pa mbeli ntsate zlerekwe kwa behwea Bɛnjamɛn.

¹³Pa hɛ ŋkwahemte lekwesa ta nci, yayata wəndə kave behwea ŋkɛ kadzete kwara, tewətelɛwe hɛ zhɛneghe geva kadzembe meleme.

¹⁴Hwa'a yɛ Zhəwda le ka kesaka yitenyɛ ki ghɛa Zhozɛf, mba Zhozɛf kiagha. Gwəɗəŋə hɛ ntiŋə ghə mbe hɛɗi kwa kema ta ŋkɛ.

¹⁵Ma ke Zhozɛf sha hɛ: «Wa nya wəsə menete yɛ wa? Keɗepe yɛ wərə wəndə nya kala 'ya kaɗepete wəshi nyi tewəfərə wəka?»

¹⁶Ma ke Zhəwda zhɛnete: «Wa ke ghen'yɛ sha geze gɛ wa nde sleke ɗa? Wa ghena nya geze n'yɛ tse wa? Tsema nza ghen'yɛ kawiɗike fela yitea ghəa n'yɛ wa? Shala nde ncɛte fete ta n'yɛ. Kaka mavashia ŋa tenza n'yɛ, ghen'yɛ le ghəa n'yɛ ba'a wəndə nya ntsate helape kesa wəsə mbeli ve.»

¹⁷Ma ke Zhozɛf zhɛkwa: «Ewə, kehite geva ŋkɛ kamene 'ya tsagha we. Ma wəndə nya ntsate helape kesa wəsə nya mbeli ve ne, kamava ta ɗa tenza ŋkɛ. Ma gheyɛ le ŋayɛ, kwiɗi mə kalə sha ghɛ le kwelɛŋe.»

¹⁸Pa Zhəwda hendave nda geva ke Zhozɛf, ma ke: «Təhwə təhwə ŋa 'ya nde sleke ɗa, pelave ɗa hweŋkwa kagezete ŋa ghena, mba na kehwepe wənə, ya gha nza yipə yipə le Farawon.

¹⁹Ma vecagha ne, nahe na ke'yɛwakɛ kenza nde mba yiteyɛa n'yɛ teghweme ba'a kenza kwete wəza yita va ghen'yɛ.

²⁰Ma ke ghen'yɛ zhɛnete ŋa: ‹Mba yiteyɛa n'yɛ teghweme ba'a wəza yiteyɛa n'yɛ nya kawəzege meha ya shɛ. Kwele kwele ɗehwe ŋkɛ yitenyɛ, kwa nza ŋkɛ deke gheŋkɛ nde tene va male kwa jiwənia ŋkɛ. Nahe wəza meghekɛ kemte.›

²¹Ma pa na sha ghen'yɛ: ‹Keleke ɗa mə ŋkɛ, kaɗe 'ya kanakɛ ŋkɛ.›

²²Nahe ghen'yɛ kegezete ŋa kaɗema wəzegea shɛ kanehemte geva le yitenyɛ. Kwa nza ŋkɛ ma keslənyɛ ŋkɛ yite ne, katemte yitenyɛ.

²³Ama pa na gezete n'yɛ kaɗema n'yɛ kazhɛne kadzawa kema ta ŋa keɗema wəzegea shɛ kesawa yitea ghen'yɛ.

²⁴Pa ghen'yɛ zhɛreghe geva kalə sha yiteyɛa n'yɛ nya kande mene slene ta ŋa, pa ghen'yɛ gezete nda ghena ta ŋa.

²⁵Ma ke yiteyɛa n'yɛ: ‹Zhɛneghe mə geva kalə kapa ɓəmə wəshi kezeme.›

²⁶Ma ke ghen'yɛ shɛ: ‹Kashɛ ghen'yɛ dzawa keɗema wəza yiteyɛa n'yɛ nya ɓɛhwɛa yitea ghen'yɛ we. Ma keɗema ŋkɛ le ghen'yɛ ne, hweŋkwa va ghen'yɛ kadzawa kema ta wəndə nya te ghəa hɛɗia Ɛzhipte we.›

²⁷Ma ke yiteyɛa n'yɛ sha ghen'yɛ: ‹Nahe yɛ keɗepe deke bake yake ɗa ŋwale male ta ɗa Rashɛl.

²⁸Nahe kwete kezanyɛ, wəshi nyi hwa gamba ka mpeɗehwe ŋkɛ, zəzə 'ya, kwa nza ŋkɛ kezhɛne 'ya kanakɛ ŋkɛ we.

²⁹Gheyɛ ka ɗe kakele nya va 'ya zhɛkwa! Ma kemenete nda geva wəsə kwa ndiremi, kehale hale 'ya kala nya ne, katemte ɗa 'ya va zəzə ta fete ta ŋayɛ.›

³⁰Ma tsetsenya gɛ nde sleke ŋkwa, tsema nza 'ya kazhɛreghe geva kalə sha yiteyɛ ɗa kaɗema wəzege nya yitea ghen'yɛ wa? Mbe wəzege nya mpia yiteyɛ ɗa tsape tsape,

³¹ma kenakɛma ŋkɛ ŋkɛ kezhɛneke geva ne, katemte ŋkɛ. Ma tsagha gɛ, ghen'yɛ ya te ghəa mte ta ŋkɛ mbe meha va zəzə.

³²Ɓiyitsa, nahe 'ya kekelete ghena ta wəzegea shɛ kwa ghə kwa kema ta yiteyɛ ɗa. Ma 'ya shɛ: ‹Ma kekelekema ŋa ŋkɛ 'ya ne, ŋa ɗa tenza fete kaghala ghala kwa kema ta ŋa.›

³³Təhwə təhwə ŋa 'ya, pelakɛ ɗa kanza teke kamava ta ŋa te zhia wəzege nya! Zhɛneghe geva ŋkɛ kadzeme le kweci ka kesaka yitenyɛ!

³⁴Tsema nza 'ya kazhɛneghe geva kalə kadzawa kema ta yiteyɛ ɗa kaɗema wəzege nya yitea 'ya wa? Katesəwəte newe ndiremi nya ketedzete yiteyɛ ɗa 'ya we.»