Read KapsikiDC Gha ta Wəshi 45 Bible Online

Gha ta Wəshi 45 - KapsikiDC bible

Gha ta Wəshi 45

¹Ma kwa shaŋe Zhozɛf kazereghe zəzə nya mbe wənəa ŋkɛ kwa kema ta mbeli nyi yite ne, pa ŋkɛ gezete kezha jivenji hɛ. Wəndə shɛ tagha nda ncɛte nda ghəa ŋkɛ ŋkɛ ke ka kesaka yitenyɛ we.

²Ama ntake ŋkɛ kanehwene le berete kafefa ka Ɛzhipte, pa ki ghɛa Farawon ntsehe ghena shɛ.

³Ma ke sha ka kesaka yitenyɛ: «'Ya ya kaZhozɛf! Mba yiteyɛ ɗa teghweme na?» Ama kashɛ ka kesaka yitenyɛ zhɛne nda ghena va medada we.

⁴Ma ke sha hɛ zhɛkwa: «Hendave ɗa mə geva!» Pa hɛ hendave nda geva. «'Ya ya kaZhozɛf, wəza yiteyɛ ŋayɛ nya pamte nda yɛ ke ka Ɛzhipte.

⁵Ama mba yɛ kenza le kema teheɗe, mba yɛ keŋele ghə ŋayɛ va nya pamte ɗa yɛ teke, kwa nza ŋkɛ Shala nde ghweneke ɗa kase teke mpelɛa ma ke gheyɛ kezha mbele mpia ŋayɛ.

⁶Va bake ghala me ma te hɛɗi, mba va mcɛfe zhɛkwa kaɗema mbeli shɛ wəza keɗema kamene wəshi se te wəve.

⁷Shala nde ghweneke ɗa mpelɛa ma ke gheyɛ kadzete hɛɗi nya kezha wəmbəyi hwelefefi yɛ ba'a kezha mbele mpia ŋayɛ kala meŋele.

⁸Gheyɛ ka ghweneke ɗa kase teke we, ama Shala. Gheŋkɛ nde veyi ɗa kawəndə kwele nya yitea Farawon, kande sleke ghɛa ŋkɛ ba'a kawəndə nya te ghəa pɛtɛa hɛɗia Ɛzhipte.

⁹Ma pe yɛ kahe kahe sha yiteyɛ ɗa kedzeme yɛ: ‹Wa nya ghena nya geze wəzege ta ŋa Zhozɛf nya: Nahe Shala keveyi ɗa kawəndə nya te ghəa pɛtɛa hɛɗia Ɛzhipte. Sawa sha 'ya kahe kahe.

¹⁰Katenza na te hɛɗia Goshɛn le ŋwalea ŋa, ka shihɛ ŋa, timɛtia ŋa, kwia ŋa, sla ta ŋa ba'a pɛtɛa wəshi nyi va gha. Ma tsagha, dekwede tenza na yitea 'ya.

¹¹Teke ne, kateve ŋayɛ wəshi kezeme 'ya le mbelia ŋa ba'a wəshi keseɗa ta ŋa, yitea ɗema kwete wəsə kadewə va gha, kwa nza ŋkɛ mba va ta ma mcɛfe.›»

¹²Ma ke Zhozɛf zhɛkwa: «Kanewe newe yɛ le ntsə ta ŋayɛ, kanewe newe wəza meyɛ ɗa Bɛnjamɛn le ŋa ŋkɛ ntsə perə, 'ya nde geze ŋayɛ ghena.

¹³Kwiɗi mə kalə kageze nda zləvə nya te 'ya mbe Ɛzhipte ke yiteyɛ ɗa ba'a ɓelate nda mə wəshi nyi nakɛ yɛ. Kwa sebe ta ŋkɛ, kelakawa mə ŋkɛ teke kahe kahe.»

¹⁴Həməwə Zhozɛf sha wəza meghekɛ Bɛnjamɛn le nehwene. Pa Bɛnjamɛn həməwə ŋkɛ le nehwene perə.

¹⁵Pɛtɛ Zhozɛf hehəməwəve ka kesaka yitenyɛ le kema bətə mbe nehwene. Ma kwa sebe ta ŋkɛ, ntake hɛ kageze nda ghena.

¹⁶Pa mbeli fate ki ghɛa Farawon nahe ka kesaka yiteyɛa Zhozɛf kentsehe mbe Ɛzhipte. Zeɗehwe nda ghena shɛ ke yɛ Farawon le mbeli nyi yite.

¹⁷Ma ke Farawon sha Zhozɛf: «Geze nda ke ka kesaka yiteyɛ ŋa kave wəshi te wəshi keseɗa ta nci ba'a kazhɛre geva kadzeme hɛɗia Kanan

¹⁸kezha kelakawa yɛ yiteyɛa nci le mbelia nci kasawa teke. Kateve nda ŋkwa nya ganyɛ mbe Ɛzhipte 'ya ke hɛ, katezeme wəshi ganji nyi te hɛɗi nya hɛ.

¹⁹Kategeze nda na ke hɛ kanta yɛ wəmata gədəwə mbe Ɛzhipte kezha fə mia nci, ŋwalea nci ba'a yiteyɛa nci kasawa perə.

²⁰Mba hɛ kezəzə wəshi nyi tesərə hɛ pelɛagha, kwa nza ŋkɛ te hɛɗi nya ganyɛ ma mbe Ɛzhipte tesawa hɛ kanza.»

²¹Tsagha ŋwalea Israyɛl menete. Pa Zhozɛf nta nda wəmata gədəwə ba'a wəshi kezeme kwa hweŋkwa ke hɛ kala nya gezete Farawon.

²²Pa ŋkɛ nta nda lekwesa gəsəkə ke yayata wəndə, ama mcɛfe ŋkɛ shɛ va Bɛnjamɛn, tsagha dəɓərəa mze kwa tɛawetɛa gwəmsə mahekene.

²³Pa ŋkɛ ghweneghe nda wəshi ganji nyi mbe Ɛzhipte kabidalea kwara lɛmə meŋe, tsagha ha, ɗafa ba'a kweci wəshi kezeme kwa hweŋkwa kaŋemia kwara meŋe ke yitenyɛ.

²⁴Pa ŋkɛ gezave nda ke ka kesaka yitenyɛ kezha ɗema hɛ kampa kwa hweŋkwa. Kwa sebe ta ŋkɛ, pa ŋkɛ pelakɛ hɛ kaslə.

²⁵Cape hɛ shave mbe Ɛzhipte, hwa'a hɛ pelɛ hɛɗia Kanan sha yiteyɛa nci Zhakob.

²⁶Ma ke hɛ shɛ: «Mba Zhozɛf teghweme! Gheŋkɛ ya te ghəa pɛtɛa hɛɗia Ɛzhipte.» Ama kepele ghəa Zhakob yite we, kwa nza ŋkɛ keyɛte ghena ta nci ŋkɛ we.

²⁷Pa hɛ ɓelate nda pɛtɛa ghena nyi gezete nda Zhozɛf ke hɛ. Pa Zhakob nakɛ wəmata gədəwə nyi ghweneghe Zhozɛf kezha kele ŋkɛ. Ma tagha gɛ, werete mehele ta Zhakob.

²⁸Ma ke Israyɛl: «Ka'yɛwe kwete ghena 'ya zhɛkwa we! Mba wəzege ta ɗa Zhozɛf teghweme. Kaɗe 'ya kalə kanakɛ ŋkɛ nda temte 'ya.»