Read KapsikiDC Gha ta Wəshi 6 Bible Online

Gha ta Wəshi 6 - KapsikiDC bible

Gha ta Wəshi 6

¹Ma kwa ghate mbeli kambake geva kwele kwele te hɛɗi ba'a kwa yake ŋwalea kwɛ hɛ ne,

²pa ŋwale tezhilia Shala nakɛ kendeɗe ndeɗenji ŋwalea kwɛ nyi yake mbeli. Ntake hɛ kanta nyi ɗe hɛ kamale.

³Ma ke Mahwətə: «Mba sefəa mpi nya ndeke nda 'ya ke mbeli kanza mbe hɛ kaghala ghala we, kwa nza ŋkɛ ne, katempə hɛ te kwete veci. Katezhɛne hɛ kazlake va gwəmsə ba'a bakemsə teghweme we.»

⁴Ma mbe və shɛ ne, kweci hwelefefi kebebiya bebiyanji ya shɛ te hɛɗi, mba hɛ te hɛɗi nda se ŋwalea Shala kanza le ŋwalea kwɛa mbeli, nahe hɛ keyake ŋwale hwa hɛ. Ghenci ya kaka katsala kɛfi nyi vəashi, mbeli nyi nza zləvə te sləa nci.

⁵Ma newe ke Mahwətə ne, mbake yambake ndiremia mehele ta mbeli te hɛɗi. Keveci keveci nza hɛ le mene zəzə wəsə kwa ndiremi mbe wənəa nci.

⁶Ntake Mahwətə kazəzə yitea wa yitea wa pate mbeli ŋkɛ te hɛɗi, petefe wənəa ŋkɛ wepete geva.

⁷Ma ke: «'Ya kateza sebe te mbeli nyi pate 'ya te hɛɗi, wəshi keseɗa nyi jama jama keɗema nyi ɓɛhwɛ ɓɛhwɛ ba'a 'yɛ nyi kezlə yitea ghweme, kwa nza ŋkɛ kwele kwele zəzə 'ya kwa pate hɛ 'ya.»

⁸Ama nahe Nowɛ kekemave zlaɓa kwa kema ta Mahwətə.

⁹Wa nyi hwelefefia Nowɛ nyi: Ma Nowɛ ne, kawəndə nya tiɗiɗi nya kedzeghwa le hweŋkwa ta ŋkɛ se ŋkɛ hwa mbeli nyi te vəa ŋkɛ. Hweŋkwa ta Shala yazelete ŋkɛ,

¹⁰ŋwale tezhili mahekene yake ŋkɛ: Sɛm, Sham ba'a Zhafɛt.

¹¹Ama kambeli nyi kebeze beze se mbeli nyi te hɛɗi kwa ntsə ta Shala: nda mene berete nde mene geva te yayata ŋkwa.

¹²Newe ke Shala sha ŋkwa nya te hɛɗi ne, keda da ŋkɛ. Kwa nza ŋkɛ ne, nahe yayata wəndə kebezemte nza ta ŋkɛ te hɛɗi.

¹³Ma ke Shala sha Nowɛ: «Nahe 'ya ketarete kezha za sebe te mbeli. Kwa nza ŋkɛ ne, nahe hɛɗi kenza viɗi va mene berete. 'Ya kateza sebe te hɛ te hɛɗi.

¹⁴Baŋete nda kwambelə nya wəba yitea sheghwəa vɛ ke ghəa ŋa. Katemene cɛ na kwele kwele mbe ba'a katezleraɗe ŋkɛ na le ɗəkə mbe hwəa ŋkɛ ba'a pelɛ te wəmbəa ŋkɛ.

¹⁵Wa nya tsetse temene na: mɛtre gwəmsə ba'a mcɛfemsə nza biya ŋkɛ, mɛtre bakemsə mcɛfeghəmbe nza bezlea ŋkɛ ba'a mɛtre meŋe mcɛfeghəmbe nza dzeme ta ŋkɛ yitea ghweme.

¹⁶Katebaŋe wəsə na kənəa ghəa ŋkɛ, katetene ŋkwa na dzeyi yitea yɛ ghəa ŋkɛa shɛ gare slə yitea fegwele hwa'a mɛa ŋwalea dzeve. Katemene gelembe na mɛ laka bela kwetɛŋe. Ma kwetere wəmbəa ŋkɛ ne, katemene cɛ nyi mencikə mencikə na mahekene mbe.

¹⁷Ma 'ya le ŋa ɗa gɛ, katekele yɛmə nya wəba kase kezha za te yayata wəsə nya le mpi te hɛɗi. Pɛtɛ tempə wəshi nyi te hɛɗi.

¹⁸Ama katemene jikə geva 'ya le gha. Katedzembe kwambeləa shɛ na le male ta ŋa, ŋwale tezhilia ŋa ba'a ka makwashia ŋa.

¹⁹Katenta mama ta wəsə nya nza mpi hwe na bake nyi bake nyi, yɛ za le male kezha mbele mpia nci yitea gha.

²⁰Tsagha mama ta 'yɛ, mama ta wəshi keseɗa nyi jama jama ba'a nyi kedzeghwa te hɛɗi, bake nyi bake nyi kase yitea gha kezha mbele mpia nci.

²¹Ma gha gɛ ne, ntave mama ta wəshi kezeme, katebete hɛ na te ŋa nci ŋkwa. Kawəshi kezeme ta ŋayɛ le wəshi keseɗa shɛhɛ tenza hɛ.»

²²Tsagha Nowɛ menete. Pa ŋkɛ menete wəshi nyi gezete nda Shala tserame.