Read KapsikiDC 2 Saməyɛl 11 Bible Online

2 Saməyɛl 11 - KapsikiDC bible

2 Saməyɛl 11

¹Ma hecimə nya kedzeghə, və nya nza ka meghe kadzemte mpa kala nya ghalanza ne, pa meghe David ghwenakɛ Zhowab, wəndə kwelea ka sewajɛ te ghəa ka sewajɛa ka Israyɛl ba'a mbeli nyi te ghəa ka sewajɛa ŋkɛ, kampa le ka Amon. Pa hɛ bezemte hɛɗia nci ba'a ntishɛnji mbe Raba, meleme nya wəba ta nci. David le ŋa ŋkɛ ne, mbe Zhɛrəzalɛm ntishɛnyɛ ŋkɛ.

²Ma te kwete hɛ hetɛhwɛɗi, kwa zhɛnehwe mpi ŋkɛ ne, pa David sate kadzeghwa pelɛ dɛɓere nya kənəa ghɛ meghea ŋkɛ. Pa ŋkɛ nakɛ kwete male kapɛ, nahe nde kenza kendeɗe nda.

³Pa ŋkɛ 'yɛwete ghena te ghəa nta. Ma ke mbeli shɛ: «Bacɛba nde, wəzha ta Ɛliyam, male ta Əwri, nde Hɛt.»

⁴Pa David ghwenakɛ ŋkwa kezha heka ŋkɛ. Pa nde se shɛ ki ghɛa ŋkɛ, pa ɓelahehwe ɓelahe le, pa nde zhɛneke geva kase sha ghɛa nta. Kwatepɛmte ghəa nta nde wɛŋe va wəshi nyi kese yite.

⁵Pa Bacɛba dzawa hwə nda. Ma ke ghwenakɛ nda mɛ ke David: «Le hwə 'ya.»

⁶Te ŋkwa shɛnyɛ, ma ke David ghwenakɛ nda mɛ ke wəndə kwelea ka sewajɛ Zhowab: «Ghweneke ɗa Əwri nde Hɛt.» Pa Zhowab ghweneghe nda Əwri.

⁷Pa Əwri se sha meghe, pa ŋkɛ 'yɛwakɛ nza ta Zhowab ba'a ka sewajɛ, tsagha nza ta mpa.

⁸Ma ke shɛ: «Kwiɗi sha ghɛa ŋa shɛ na zhɛnakɛ mpi.» Pa Əwri shavenyɛ ki ghɛa meghe, pa meghe ghwenakɛ nda wəsə gəmə.

⁹Ama kese Əwri kalə sha ghɛa ŋkɛ we. Pa ŋkɛ ɓelahenyɛ hwa wəvəsəa ka sewajɛ nyi keya ghɛa meghe, takwa yitea mɛ degha.

¹⁰Pa David fate, ma ke 'yɛwete va Əwri: «Tsema wa? Cakeɗake se na. Wa raberə ɗema na lə kanewe ghɛa ŋa wa?»

¹¹Ma ke Əwri sha David: «Meghe yawe, deke cɛ lekwesa yanza yɛ səndəkwə nya keveyi geva kaŋa Mahwətə, ka sewajɛa ka Israyɛl ba'a ŋa Zhəwda mbe. Nahe wəndə kwelea ka sewajɛ Zhowab ba'a mbelia jama ta ka sewajɛa ŋa kenza hwa gamba. Tsagha gɛ ne, tsema nza 'ya kadzeki ghɛa ɗa kazeme wəsə, kasa wəsə ba'a kahɛ le male ta ɗa wa? Kamene wəsə nya kala nya 'ya we, kazeme ŋa fela 'ya!»

¹²Ma ke David shɛ: «Yewə, nza teke ɓeshi, nda ve ŋa hweŋkwa 'ya kaslə hendɛ.» Mba Əwri mbe Zhɛrəzalɛm pa va hendɛ.

¹³Pa David hekake ŋkɛ yitea wəsə kezeme ba'a wəsə kesa ta ŋkɛ, Tagha gɛ, pa ghwəyimte ŋkɛ. Ama hetɛhwɛɗi ne, pa Əwri lə ba'a hɛnyɛ le ka sewajɛa meghe, kaɗema lə sha ghɛa ŋkɛ.

¹⁴Ma te hendɛ ta ŋkwa masheke masheke, pa David rafete nda palepa ke Zhowab, pa ŋkɛ ndeke nda ke Əwri.

¹⁵Ma ke te palepa shɛ: «Veyi Əwri te kema ta mpa te ŋkwa nya nza mpa dzawe, hendemte mə geva yite mba ŋkɛ kwetɛŋenyɛ, yitea kekave ŋkɛ nde ghema ba'a yitea mte ŋkɛ.»

¹⁶Pa Zhowab nya keya meleme, veyi Əwri te ŋkwa nya ɗepe ŋkɛ berete ma ka sewajɛa ka ghema.

¹⁷Pa mbeli shave mbe meleme kampa le Zhowab. Pa hɛ mpəmte kweci mbelia jama hwa mbelia David. Əwri perə ne, nahe ŋkɛ kemte.

¹⁸Pa Zhowab ghweneghe nda ghena te nza ta mpa ke David.

¹⁹Ma ke sha wəndə nya ghwenakɛ ŋkɛ le ghena: «Ma kekiɗimte geze ghena ta mpa na ne,

²⁰nda kwete katehwepe wənə meghe kageze: ‹Wa raberə hendeyite geva yɛ yitea meleme terasle le mpa wa? Keɗepe yɛ kahe have mbeli sawa pelɛ te zli wəka?

²¹Wa nde peslekɛ Abimɛlɛk, wəzege ta Yerəwba'al mbe Tɛbɛs? Male nde 'yapaghe vena kənə sawa pelɛ zli, mbəhə ŋkɛ! Va wa hendeyite geva yɛ yitea meleme terasle?› Kegeze ŋa meghe kala nya ne, nda ncɛ nda na: ‹Nahe wəndə kwele Əwri, nde Hɛt kemte perə› pa shɛ.»

²²Pa nde ghwene ta Zhowab lə le ghena ta ŋkɛ ke David kala nya gezete nda ŋkɛ.

²³Ma ke shɛ: «Za ma berete va kaya meleme ke ghen'yɛ, pa hɛ shave le mpa tsape sha ghen'yɛ pelɛke te ŋwela. Pa ghen'yɛ ŋkaghe hɛ kadzeyi te sebe pa mɛa mɛa meleme.

²⁴Ama pa ka he have heke n'yɛ have sawa pelɛ zli. Tsetse mpənji kweci ka mene slene ta ŋa, pa le wəndə kwelea ŋa Əwri, nde Hɛt kemte perə.»

²⁵Ma ke meghe sha nde ghwene nyagha: «Kwiɗi mtsehete nda berete ke Zhowab, ma pa na shɛ: ‹Dakema na va wəsə nya ma. Tsagha ghena ta mpa, ka leŋea kɛfi ya laka yayata bela. Ntsə geva yitea ɗa melemea shɛ ba'a kezha mpəmte.›»

²⁶Ma kwa fate Bacɛba nahe za nta kemte ne, pa hwepete beza kanehwene.

²⁷Ma nahe nehwene ne, pa David keleke ŋkɛ kadzeki ghɛa ŋkɛ. Pa ŋkɛ wəmeve ŋkɛ, pa nde yake nda wəzege teza. Ama pa Mahwətə ɗema wəsə nya menete David.