Read KapsikiDC 2 Saməyɛl 13 Bible Online

2 Saməyɛl 13 - KapsikiDC bible

2 Saməyɛl 13

¹Wa nya wəsə nya kemenete geva nya kwa sebe ta ŋkɛ. Absalom, wəzege ta David, wəzha ta ma ya ve Tamar sləa nta. Amnon kwete wəzege ta David, pa mawehwe Tamar.

²Kwele kwele zhɛte nda mawe ke Amnon yitea Tamar, wəzha ta yitenyɛ, pa nde ndeke nda geva kazereghwe, dzawe nda nza ŋkɛ kahendave nda geva, kwa nza nde mba nde kadegheli.

³Ama kwete mcɛ yave Amnon kentsehwele ntsehwele, sləa ŋkɛ Yonadab, wəzege ta Shama wəza meghekɛa David.

⁴Ma ke shɛ: «Wəzege ta meghe, va wa nza kema ɗaŋe ɗaŋe kwa gha kala kiɗi ta ŋkwa wa? Kaɗe na kageze ɗa wəka?» Ma ke Amnon zhɛnete: «'Ya mawehwe Tamar, wəzha ta meghekɛa Absalom, wəza yiteyɛ ɗa.»

⁵Ma ke Yonadab shɛ: «Yawa, ma tsagha ne, ɓelahe ŋa te gezle ta ŋa kamenete ghə ŋa kala wəsə nya shewə. Ma kese yiteyɛ ŋa kanewe ŋa ne, ma pa na shɛ: Ghwenakɛ Tamar wəzha ta yiteyɛ ɗa se nde takɛ ɗa wəsə kezeme teke kwa ntsə ta ɗa, kandeke ɗa le ghəa nta nda zeme 'ya.»

⁶Pa Amnon ɓelahenyɛ kala wəsə nya shewə. Pa meghe se kanewe, ma ke Amnon shɛ: «Ghwenakɛ Tamar wəzha ta yiteyɛ ɗa se nde takɛ ɗa gatewe bake ɓɛhwɛ ɓɛhwɛ. Ghenta nde ve ɗa le ghəa nta nda tezeme 'ya.»

⁷Pa David ghwenakɛ ŋkwa kagezete nda ke Tamar: «Kwiɗi sha wəza yiteyɛ ŋa Amnon, menete nda wəsə kezeme.»

⁸Pa Tamar lə sha Amnon meɓelahe ŋkɛ te gezle. Pa nde hwaɗete hə, keɓete ba'a takɛ gatewe kwa ntsə ta ŋkɛ.

⁹Pa fəakawa te kələa shɛ kwa kema ta ŋkɛ, pa ŋkɛ ndeke nda kezha zeme ŋkɛ, ama pa ɗema zeme. Pa geze nda ke mbeli kaslə pɛtɛ tagha, pɛtɛ hɛ jivenji.

¹⁰Ma ke sha Tamar: «Same ŋa te gezle ta ɗa le gatewea shɛ. Gha nde ve ɗa le ghəa ŋa nda zeme 'ya.» Laŋe Tamar te gatewe nya takɛ nde kakeleghe nda hwa'a te gezle ta Amnon.

¹¹Ma mbe ve nda nde kezha zeme ŋkɛ ne, pa keseve, ma ke shɛ: «Ɓelahe le 'ya Tamar.»

¹²Ma ke shɛ le lewela: «Ewə, Amnon! Kese ɗa ma na le berete ma! Kamene mbeli kala nya hwa ka Israyɛl we. Menema nya na wəsə kwa wale wale ma.

¹³Tema telə 'ya le hawe ta ɗa gɛ? Ma gha ne, kawəndə nya wale wale tenza na hwa ka Israyɛl. Geze nda ke meghe gi, kafɛa ŋa ŋkɛ kewəme ɗa we.»

¹⁴Kaɗe Amnon kafa nda we. Berete ma ŋkɛ ke ghenta, pa weleyi ŋkɛ ba'a yinehwe ŋkɛ.

¹⁵Ma ɓiyitsa ne, pa ɗema ghena ta nta tsape tsape. Kwele ma ɗema ŋkɛ kenya ɗehwe ŋkɛ. Ma ke shɛ: «Jive ŋa!»

¹⁶Ma ke Tamar le lewela: «Ewə! Ma ŋkamte ɗa teke ne, katenza ŋkɛ kajaɗafa nya wəba ma kenya menete ɗa na.» Ama kaɗe Amnon kafa zhɛkwa we.

¹⁷Pa ŋkɛ hekakɛ wəndə nya kemene nda slene, ma ke shɛ: «Ŋkamte wəzha nya shave mbe cɛa ɗa, ŋzlete cɛ megela kwa sebe ta nta.»

¹⁸Pa nde mene slene ŋkamte ŋkɛ ba'a ŋzlete cɛ. Lekwesa kwa jiɓe jiɓe ya kənəa Tamar kwa nza ŋkɛ tsagha seɗe ŋwalea kwɛa meghe tewə hɛ kedzembe cɛ.

¹⁹Pa nde kərəaghe pəsəɗə kənəa ghəa nta ba'a ŋkwahemte lekwesa ta nta nya ndeɗe. Beme nde sha dzeve kwa ghə kalə le lewela.

²⁰Ma ke Absalom, wəza meghekɛ 'yɛwete ve: «Amnon yinehwe ŋa le berete na wəzha ta meyɛ ɗa nya ɓɛhwɛ? Gezema na ma, kwa nza ŋkɛ kawəza yiteyɛ ŋa. Zəzəma na zhɛkwa ma.» Se te vəa shɛ ne, mba Tamar ki ghɛa Absalom wəza meghekɛ, kala male nya ɗema mbeli.

²¹Kwele kwele zhɛte nda ŋkɛ ke meghe David kwa fate ŋkɛ. Ndagwara kese kaŋele Amnon we, kwa nza ŋkɛ katezhɛa wəzege ta ŋkɛ, tsape ɗehwe ŋkɛ.

²²Ma Absalom ne, kamɛ hɛ le Amnon we, kwa ɓelahehwe Tamar, wəzha ta yitenyɛ ŋkɛ kaberete.

²³Va bake kwa sebe ta ŋkɛ ne, və kesla shintia timɛti ki ghɛa Absalom kwa Ba'al-Hasor takwa yitea Ɛfrayim. Pɛtɛ hekakɛ ŋwalea meghe.

²⁴Pa Absalom lə sha David kageze: «Və kesla shintia timɛti ya va 'ya. Vate zləvə te 'ya le se ta ŋa kadzehwa gəsəkəa shɛ le yɛ mbelia jama ta ŋa yɛ.»

²⁵Ma ke meghe shɛ: «Ewə, wəzege ta ɗa! Kewəba tenza ŋkɛ kənəa gha kelə ghen'yɛ pɛtɛ.» Kwele kwele ntsəte geva Absalom te ghena shɛ. Keɗe meghe we, pa wəpikɛ nahe.

²⁶Ma ke Absalom: «Ma kwa ɗema na ne, pelakɛ wəza yiteyɛ ɗa Amnon beghakɛ n'yɛ ŋkɛ.» Ma ke meghe: «Yitea wa tsagha wa?»

²⁷Ghwə yitea shaga, ghwə yitea dəghwə Absalom, pa meghe sərəakɛ Amnon le kweci ŋwalea ŋkɛ kalə. Pa Absalom takɛ veghe kwele kwele, veghe ta meghe ŋkɛ tsape.

²⁸Pa gezave nda ghena ke ka mene slene ta ŋkɛ: «Newe mə ŋkwa nya yitea Amnon. Ma kenza ŋkɛ fare fare va tɛ heshi ne, ma kegeze ŋayɛ 'ya: ‹Ɗa mə Amnon!› A 'ya ne, peslekɛ mə. Kwiɗi mə mba yɛ keghazlənə, kwa ghəa ɗa ghena shɛ. Nza mə ghyanake, ncɛte nda mə ke mbeli bereteke yɛ!»

²⁹Pa ka mene slene menete ghena nya gezete nda Absalom ke hɛ ba'a peslekɛ Amnon. Pa kweci ŋwalea meghe satenji, pa yayata wəndə dzeme gədəwə kwara ta ŋkɛ ba'a hwɛnyɛ.

³⁰Mba hɛ kwa hweŋkwa nda fate ghena shɛ David: «Nahe Absalom kempəmte ŋwalea ŋa pɛtɛ, ya kwetɛŋe ketene le mpi we.»

³¹Pa meghe ŋkwahemte lekwesa ta ŋkɛ kaɓelahe hwa hɛɗi. Pɛtɛ ka mene slene nyi yite le lekwesa keŋkwahe ŋkwahe ntəslə ŋkɛ kwa hɛ.

³²Pa Yonadab, wəzege ta Shama, wəza meghekɛa David kelete ghena kageze, ma ke: «Yagha meghe kazəzə ne, pɛtɛ mpəmte ŋwale mbeli. Deke Amnon nde mte. Nahe Absalom kegezete se te veci nya ntsamte Tamar nya Amnon le berete wəzha ta meghekɛ.

³³Zəzəma na nahe pɛtɛa ŋwale kempə ma. Ewə, Amnon kwetɛŋe nde mte,

³⁴na Absalom kehwɛnyɛ.» Pa kwete mempɛhweta nya kenewe ŋkwa nakɛ wəvəsəa mbeli kasawa kwa hweŋkwa ta Horonayim, kasawa vare ghweme, pa ŋkɛ se kancɛte nda ke meghe le ghena kala nya: «Nahe 'ya kenakɛ mbeli kasawa kwa hweŋkwa ta Horonayim, kasawa vare ghweme.»

³⁵Ma ke Yonadab sha meghe: «Ŋwalea meghe ka sawa! Kala nya gezete ŋa 'ya menete geva ŋkɛ gɛ wa?»

³⁶Kiɗima ta ghena shɛ te mɛ va Yonadab ne, pɛkwe ŋwalea meghe. Ntake hɛ kenehwene. Tsagha meghe le ghəa ŋkɛ le yɛ ka mene slene ta ŋkɛ kanehwene kwele kwele.

³⁷Pa Absalom hwɛnyɛ kalə sha Talmay, wəzege ta Amihəwd, ba'a meghea Gɛshəwr. Mbe və nyagha pɛtɛ ne, mbe nehwene wəzege ta ŋkɛ Amnon David.

³⁸Ma kwa hwɛnyɛ Absalom kadzembe Gɛshəwr ne, mahekene menete va mbe.

³⁹Ama mba ɗe ta David laka Absalom ɓiyitsa kwa gweɗakwete mbeli va mte ta Amnon we.