Read KapsikiDC 2 Saməyɛl 15 Bible Online

2 Saməyɛl 15 - KapsikiDC bible

2 Saməyɛl 15

¹Ma kwa sebe ta ŋkɛ ne, pa Absalom kelete wəmata gədəwə ba'a gədəwəa lɛmə, tsagha mbeli mcɛfemsə nyi kehwɛ te kema ta ŋkɛ.

²Masheke masheke, ntishɛ ŋkɛ kwa hweŋkwa mɛ mɛa meleme, yayata və nya se wəndə kwa kalə sha meghe kezha meha ghwə ne, kaheka ŋkɛ Absalom, ma ke sha 'yɛwe ve: «Tema se na wa?» Ma ke sha zhɛne: «Wəzege ta meghe, mbe yita nya tsetse ta Israyɛl se 'ya.»

³Ma ke Absalom sha geze nda: «Megela ghena ta ŋa, fete va gha we. Wəndə shɛ kafa ghena ta ŋa laka meghe we.»

⁴Ma ke sha mbake: «Ma ya kande meha ghwə 'ya mbe meleme nya ne, nza katese pɛtɛa mbeli nyi kedzete ghwə keɗema nyi nza ghena va hɛ sha 'ya, katemeha nda ghwə 'ya tiɗiɗi ke hɛ.»

⁵Ma kehendeke geva wəndə kezha gwəɗəŋə ntiŋə ghə mbe hɛɗi kwa kema ta ŋkɛ ne, kakese ŋkɛ ba'a kahəməwə ŋkɛ Absalom.

⁶Tsetse menete Absalom le yayata wəndə nya kese kezha meha nda ghwə meghe, pa kesehwe mehele ta ka Israyɛl le mbəɗəkwə.

⁷Ma kwa sebe ta va wəfaɗe ne, ma ke Absalom sha meghe: «Pelakɛ ɗa kalə 'ya kadzembe Hɛbron kezha yipə meɗe mɛ nya meɗeyi nda 'ya ke Mahwətə.

⁸Kwa nza 'ya mbe Gɛshəwr te hɛɗia ka Siri, nahe 'ya kemeɗeyi nda ke Mahwətə: ‹Ma kekeleghe geva 'ya kadzembe Zhɛrəzalɛm ne, katemene dzeghe ŋa melɛ 'ya› a 'ya shɛ.»

⁹Ma ke meghe shɛ: «Kwiɗi le kwelɛŋe.» Pa Absalom lə kadzembe Hɛbron.

¹⁰Ma mbagha ne, pa ŋkɛ ghwenakɛ mbelia ŋkɛ kadzehwa hwelefe ta pɛtɛa ka Israyɛl, ma ke sha hɛ: «Ma kefa gaka ta kwete yɛ vɛ geva ta tereme ne, ma pe yɛ sha tsa kaka: Nahe Absalom kekelete meghe mbe Hɛbron.»

¹¹Zhili gwəmsə bake yahekakɛ ŋkɛ kaslə le hɛ shave mbe Zhɛrəzalɛm kaɗema zəzə nya ndiremi va hɛ. Ama keɗepe wəsə nya ketemene geva hɛ we.

¹²Ma kadzeghe melɛ Absalom ne, pa kazele Ahitofɛl, nde ncɛ nda ntsehwele ke David nya mbe meleme ta Gilo nya se ŋkɛ le ghɛ. Mtsehe kwelea mbelia Absalom tsagha, mtsehe zəzə kekele meghe deŋwa.

¹³Ma ke kwete wəndə lə kagezete nda ke David: «Nahe ka Israyɛl kekelete ŋa Absalom ghena.»

¹⁴Pa David gezete nda ke ka mene slene ta ŋkɛ nyi mbe Zhɛrəzalɛm: «Hwɛ ɓəmə, ma keɗema mə kehwɛ ne, katesərə ɓəmə Absalom teghweme we. Wədə ɓəmə geva, kadera ŋkɛ nda tese ŋkɛ kaɗa ɓəmə we, pɛtɛ kele ndiremi ŋkɛ kase kadzembe meleme kempəmte ŋkwa ŋkɛ.»

¹⁵Ma ke hɛ shɛ: «Maze, tsema tsema zəzə ta ŋa ne, ŋa ŋa yafa ghen'yɛ.»

¹⁶Ma yɛ meghe le mbelia ŋkɛ nyi yite ne, cape hɛ le seɗa. Deke mi meghwa ta ŋkɛ meŋe ya sərəakɛ meghe kakese ghɛ.

¹⁷Ma vəa ŋkwa nya shave meghe le mbeli nyi yite mbe meleme, pa ŋkɛ ghereŋe yitea kwa keɗaŋe ta ghɛ.

¹⁸Pɛtɛa ka mene slene ta David kashave: ka Krɛte le ka Pɛlɛt le kaya meghe, kwa sebe ta ŋkɛ gwəmsə ŋkwaŋe ka sewajɛa ka Gat nyi ketəkwə təkwəte David. Pɛtɛ hɛ kadzeghwa te kema ta meghe.

¹⁹Ma ke meghe sha Itay, meghea sewajɛa ka Gat: «Wa raberə təkwə təkwə n'yɛ na wa? Zhɛneghe geva kadzembe meleme, nza le meghe mɛnɛfɛ. Kwa nza ŋkɛ nahe na kenza kamentiɓə, kande se se.

²⁰Ketemə kwele kwele ghala se na kadzeyitea 'ya na, ɓeshi zhɛkwa ne, kacakwe cakwe na yitea ghen'yɛ, nahe 'ya keɗepe ŋkwa nya tedzete 'ya yi? Tsagha we, zhɛrete geva kadzembe meleme le mbelia ŋa. Pa Mahwətə menete ŋa ganyɛ le ndeɗea mehele!»

²¹Ma ke Itay zhɛnete nda: «Te sləa Mahwətə nya le mpi ba'a le ŋa ŋa mpi meghe, kazeme ŋa fela 'ya: le ŋkwa nya tedzete meghe, te ŋkwa shɛ nza 'ya, kezha nza teghweme keɗema kamte le.»

²²Ma ke David shɛ: «Ya megela, dzate te kema tsagha.» Pa Itay dzate te kema le ka sewajɛa ŋkɛ le mbelia ŋkɛ.

²³Pɛtɛ mbeli kanehwene katsa lewela, kadzeghwa ka sewajɛ te kema ta David. Pa meghe le ghəa ŋkɛ jivenyɛ te hələa Sɛdron, le mbelia ŋkɛ kwa hweŋkwa nya kedzemte te ɓerama.

²⁴Tagha nde dzeghe Shala Sadok le yɛ ka Lɛvi kakele səndəkwəa Shala. Pa hɛ veyi səndəkwə, pa nde dzeghe Shala Abiyatar dzeghekɛ melɛ nda jivenji mbeli nyi keshave mbe meleme.

²⁵Ma ke meghe sha Sadok: «Zhɛneghe səndəkwəa Shala kadzembe meleme. Ma keɗe Mahwətə kamene ɗa ganyɛ ne, wərə ŋkɛ kazhɛneke ɗa kanewe səndəkwə le cɛ lekwesa ta Shala.

²⁶Ama kezəzəte ŋkɛ kakelemte ndeɗea ŋkɛ kənəa 'ya ne, yewə, pa kelemte kənəa 'ya kala nya newe ŋkɛ megela.»

²⁷Pa meghe mtsehete ghena shɛ: «Kefa na, zhɛnete geva same kadzembe meleme, gheyɛ le wəzege ta ŋa Ahimas ba'a Abiyatar le wəzege ta ŋkɛ Yonatan.

²⁸Ma 'ya ne, 'ya kalə kaneghe kala ŋkwa nya te ɓerama dekwede yitea ŋkwa nyi jive mbeli te Zhəwrdɛŋe te, nda tefa ghena 'ya va gheyɛ.»

²⁹Yɛ Sadok le Abiyatar keleghe səndəkwəa Shala kadzembe Zhɛrəzalɛm kanzanji mbe.

³⁰Pa David dzemenyɛ pelɛ ghweme ta yɛ Bekele le nehwene. Tedəpə kema ve, tsahwa mbe seɗa ve we. Pɛtɛ nyi kedzeme ghweme le ne, tedəpəa shɛ kema va hɛ mbe nehwene hɛ perə.

³¹Pa mbeli geze nda ke David Ahitofɛl ne, hwa mbeli nyi ketseɓa ghena le Absalom ŋkɛ ke hɛ. Kɛake David sha lewela: «Mahwətə, zhɛrete ncɛ ntsehwelea Ahitofɛl kakwa gezhi gezhi!»

³²Hwa'a David pelɛ kwa cɛame cɛaɗɛme ta ghweme, vəkwə ŋkɛ kasəkwə Shala, pa nakɛ Həwshay nde Ark nde ncɛ nda ntsehwelea ŋkɛ le ghəa ŋkɛ kase, keŋkwahe ŋkwahe lekwesa ta ŋkɛ hɛɗi ya kənəa ghə ve.

³³Ma ke David shɛ: «Təkwə təkwə ɗa ma na ma, kaleɓe nya kənəa 'ya tenza na.

³⁴Zhɛnete geva ɓetəkə kadzembe meleme, ma pa na sha Absalom: 'Ya kanza kande mene ŋa slene meghe, kaŋa yiteyɛ ŋa se 'ya, tsetsenya ŋa ŋa 'ya. Wərə na kakemanakɛ ɗa le zhɛremte ntsehwelea Ahitofɛl kezha 'ya.

³⁵Ɓiyitsa ne, katekemane ŋa yɛ nde dzeghe Shala Sadok le Abiyatar. Pɛtɛ geze nda ghena nyi fate na ki ghɛa meghe ke hɛ.

³⁶Ahimas, wəzege ta Sadok le Yonatan, wəzege ta Abiyatar ne, pɛtɛa nci bake le hɛ. Nda teghwene ɗa ghena nyi fave yɛ pɛtɛ.»

³⁷Həwshay, nde ncɛ ntsehwelea David slə kadzeme Zhɛrəzalɛm yipə le və nya ntsehe Absalom.