Read KapsikiDC 2 Saməyɛl 22 Bible Online

2 Saməyɛl 22 - KapsikiDC bible

2 Saməyɛl 22

¹Pa David gezete nda ghena kwa cimə ke Mahwətə, te veci nya mbeleke Mahwətə va ka ghema ta ŋkɛ pɛtɛ ba'a va Sawəl:

²Mahwətə ya kakeleɓa ta ɗa, kaberete ta ɗa, kande mbele ɗa.

³Nahe Shala ta ɗa kenza kagela nya wəfərə 'ya mbe, nahe ŋkɛ kenza kageləa ɗa, kawəsə kempa nya kembele ɗa, kaŋkwa nya berete ta ɗa. Kawəfərə 'ya vare gheŋkɛ kezha mbele 'ya va ka mene berete.

⁴Tsahe Mahwətə mbeli! Ma kenza 'ya kaheka ŋkɛ kezha kemane ne, kambele ɗa ŋkɛ va ka ghema ta ɗa.

⁵Kwa nza ŋkɛ nahe sefəa mte kentəsləte ɗa, kadake ɗa ŋkɛ kala ghwa nya kebeze ŋkwa.

⁶Mbasa 'ya kedzawa dəŋwə ketsa ŋkwa ta mte kentəsləte ɗa, kwa kema ta ɗa dagalawea mte.

⁷Mbe yaka ta ɗa, nahe 'ya kese kaheka Mahwətə, nahe 'ya kese kaheka Shala ta ɗa. Mbe ghɛa ŋkɛ ne, kafa heka ta ɗa ŋkɛ, nahe ŋkɛ keɗete kafa heka ta ɗa kezha kemane.

⁸Tagha gɛ, pa hɛɗi gaŋkəɗəte geva le berete. Pa ghweme gaŋkəɗəte geva te shihəa ŋkɛ. Pa hɛ gaŋkəɗəte geva va hwepe wənə ta ŋkɛ.

⁹Kashave n'yi mbe ŋshia ŋkɛ, pa ghwə ketere ŋkwa kasame kwa mɛa ŋkɛ. Pa yɛ laɗe ta ghwə same kwa.

¹⁰Kakesakawa ghweme ŋkɛ kasawa, pa sawa, deɓe deɓe ləmbə mbe seɗa ta ŋkɛ.

¹¹Pa ŋkɛ dzeme shɛrəbɛŋe kazli yitea ghweme, kanca ŋkɛ te bidzəa sefə.

¹²Kamene ŋkwesle ŋkɛ kala cɛ lekwesa ntəslə ŋkɛ kwa, mbe ləmbə nya nza yɛmə mbe.

¹³Te kema ta ŋkɛ ne, waŋetalaŋe ŋkwa, kazlɛŋe geva laɗe ta ghwə.

¹⁴Pelɛ ghweme gaka berazlɛ ta va Mahwətə, te hɛɗi cakeɗake kafa ŋwələa ŋkɛ.

¹⁵Kahe sla ta va ŋkɛ kadzete yayata ŋkwa, kahe have laka yayata ŋkwa.

¹⁶Kanca geva ŋkwəɗəa yɛ ndərə, darahwe shihəa hɛɗi ncɛte geva, kwa gaka Mahwətə laka sefəa ŋkɛ, nya keshave mbe ŋshia ŋkɛ.

¹⁷Pelɛ yitea ghweme kaha dzeve ŋkɛ kakese, pa kelakame ɗa kwa ndərə.

¹⁸Pa ŋkɛ mbeleke ɗa va ka ghema ta ɗa nyi kaka berete, va ka yiɗə ɗa nyi nza berete va hɛ za ma ke 'ya.

¹⁹Ghereŋe ŋkɛ te kema ta ɗa te vecia yaka nyi te 'ya, ama pa Mahwətə se kakemanakɛ ɗa.

²⁰Pa kelakave ɗa kaveyi ɗa waɗe, na kembelete ɗa va nya ɗe ɗa ŋkɛ.

²¹Kala nza tiɗiɗia ɗa menete ɗa Mahwətə, kamene ɗa wəsə ŋkɛ kala wɛŋea dzeve ta ɗa,

²²kwa nza ŋkɛ nahe 'ya keyate ghena ta Mahwətə, keslə ɗa 'ya cakeɗake yitea Shala ta ɗa kala ka 'yaghwa mehele we.

²³Pɛtɛ wəshi mahalegəa ŋkɛ kwa kema ta ɗa, kanehe 'ya le ghena nyi gezeke ŋkɛ we.

²⁴Tiɗiɗi se 'ya kadzeghwa le, nahe 'ya keyate ghəa ɗa va yayata fete.

²⁵Ma zhɛkwa ne, pa Mahwətə menete ɗa kala nza tiɗiɗia ɗa, kala wɛŋea ɗa kwa kema ta ŋkɛ.

²⁶Laka gheŋkɛ nya dɛŋe dɛŋe ne, kanza na dɛŋe dɛŋe, laka katsala nya kenza tiɗiɗi ncɛ ghəa ŋa na tiɗiɗi,

²⁷laka wəndə nya wɛŋe ne, kancɛ ghəa ŋa na wɛŋe, laka nde mbəɗəkwə ne, kancɛ ghəa ŋa na kentsehwele ntsehwele.

²⁸Kase na kakemane mbeli nyi keshifə ghəa nci. Le newe ŋkwa ta ŋa ne, kashifə ka kele ghə na.

²⁹Gha ya kapaterela ta ɗa Mahwətə! Mahwətə nde waŋe ɗa ŋkwa hwa ŋkwesle.

³⁰Le gha ne, kahwɛ 'ya kadzeghəa ka sewajɛ kahe kahe, le Shala ta ɗa mpereke 'ya dzawa wəmbəa zli.

³¹Hweŋkwa ta Shala ne, tiɗiɗi ŋkɛ, Ghena ta Mahwətə ne, kaganda ŋkɛ. Gheŋkɛ ya kageləa mbeli nyi kekemave ŋkwa kenza mbe.

³²Wa Shala wa, keɗema Mahwətə? Wa ya kakeleɓa keɗema Shala ta ɓəmə wa?

³³Shala ya ŋkwa nya berete ta ɗa nya kehi ɗa hweŋkwa ta ɗa tiɗiɗi.

³⁴Pa ŋkɛ yipəte seɗa ta ɗa le ŋa kɛme, pa veyi ɗa pelɛ ghəa wəmbə.

³⁵Kateke nda mpa ŋkɛ ke dzeve ta ɗa. Dzeve ta ɗa ne, pa benakete rəgi kwa mze kwa tɛawetɛa.

³⁶Mbe ve ɗa geləa mbele ŋkwa ta ŋa na, ghena nya zhɛne ɗa na nde kelete ɗa.

³⁷Waɗe pelakɛ ɗa na kadzeghwa, katsa ɗa tehene te seɗa we.

³⁸Kakeka ka ghema ta ɗa 'ya ba'a kaza hɛ 'ya. Kazhɛne geva 'ya kase keɗema 'ya kezamte hɛ we.

³⁹Pa 'ya zamte hɛ, kancɛhwemte hɛ, mba hɛ kasate tɛape we. Kabete hɛ yitea seɗa ta ɗa.

⁴⁰Gha nde ve ɗa berete yitea mpa, gha nde ve ka ghema ta ɗa kadzembe seɗa ta ɗa.

⁴¹Gha nde keka ka jaga ta ɗa te kema ta ɗa. Wərə 'ya kazamte ka mpa ta ɗa.

⁴²Newe ke hɛ ne, nde mbele hɛ shɛ we, katsa nda lewela hɛ ke Mahwətə ne, kazhɛne nda ŋkɛ ke hɛ we!

⁴³'Ya kahə hɛ kakeləwə, kaŋkeɗe hɛ kala rekɛ nyi kwa hweŋkwa.

⁴⁴Pa na mbelemte ɗa va zhɛne ghə ta mbelia ɗa. Kave ɗa na te ghəa mbeli. Hwelefefi nyi ɗepema 'ya ne, pa hɛ mbe dzeve ta ɗa.

⁴⁵Ka mentiɓə ne, kase sha 'ya le ghena zeɗe, kwa ghate ta ghena nya gezeke 'ya ne, mbe yɛ ɗa fete hɛ yite.

⁴⁶Benake ka mentiɓə, kashave hɛ mbe ghɛ kwa berete ta nci ne, kabare bare hɛ.

⁴⁷Le mpi Mahwətə, hana 'ya sha wəndə nya kakeleɓa ta ɗa! Pa Shala nya kakeleɓa, nya kembele ɗa nza kande hərə ŋkwa!

⁴⁸Shala nya keve ɗa wa ghena, nya keve mbeli yitea 'ya,

⁴⁹Gha nde mbele ɗa va ka jaga ta ɗa. Pa na kelete ɗa kewəbanyɛ kwa kema ta ka mpa ta ɗa, kambele ɗa na va ka mene berete.

⁵⁰Vatse nda tsahe ŋa 'ya hwa mbeli Mahwətə, kagha cimə 'ya te sləa ŋa.

⁵¹Wəsə nya wəba yamene ŋkɛ kezha mbele ta meghea ŋkɛ, kamene nda ganyɛ ŋkɛ ke wəndə nya ntave ŋkɛ, laka David ba'a laka ka shihɛnyɛ kaghala ghala.