Read KapsikiDC 2 Saməyɛl 24 Bible Online

2 Saməyɛl 24 - KapsikiDC bible

2 Saməyɛl 24

¹Pa Mahwətə hwepete wənə va ka Israyɛl zhɛkwa. Pa ŋkate David yitea mene wəsə nya ɗema hɛ, ma ke shɛ: «Kwiɗi ɓelate ka Israyɛl le ka Zhəwda le rafe!»

²Ma ke meghe sha Zhowab meghea ka sewajɛ nya nza hɛ: «Dzeghwamte pɛtɛa hɛɗia Israyɛl, se te hɛɗia Dan hwa'a te ŋa Bɛrshɛba, rafete mbeli. Kaɗe 'ya kaɗepete kwelea mbeli.»

³Ma ke Zhowab sha meghe: «Kamawe 'ya kezha zhɛrete mbeli Shala Mahwətə ta ŋa gwəmsə zhigə kwele kwele ma, ba'a ne, kezha nakɛ hɛ na le ntsə ta ŋa. Meghe yawe, yitea wa ɗe na kamene kala nya wa?»

⁴Ama ghena ta meghe ne, le berete ghereŋenyɛ ŋkɛ te, ndɛare Zhowab le mbelia jama ta ka sewajɛ va fɛake yite. Pa yɛ Zhowab le mbelia jama ta ka sewajɛ lə karafe mbeli.

⁵Pa hɛ jivenji te Zhəwrdɛŋe ba'a ghate mbe meleme ta Arowɛr ba'a meleme nya kwelɛ zlərə. Pa hɛ dzemenji laka Gad kadzembe Yazɛr.

⁶Pa hɛ lə dzembe Gala'ad ba'a hɛɗi nya kwake kwake ta Hodshi. Pa hɛ ntsehe mbe Dan-Ya'an, zhɛne, mbe Sidon.

⁷Pa hɛ lə laka meleme ta ka Tir nya nza berete ve, ba'a mbe yayata meleme ta ka Hava le ŋa Kanan. Pa hɛ kiɗimte laka Nɛgɛv ka Zhəwda, pa mbe Bɛrshɛba.

⁸Pa dzeghwamte hɛɗia shɛ pɛtɛ. Mbe tere mesli le hɛ bakemsə, pɛkwe hɛ mbe Zhɛrəzalɛm.

⁹Pa Zhowab ndeke nda kwelea nza ta mbeli ke meghe: ma mbelia ka Israyɛl ne, 800.000 zhili nyi gare kele hwa yitea mpa, ma ŋa ka Zhəwda ne, 500.000.

¹⁰Nahe David kefate fete nya menete ŋkɛ kwa wənəa ŋkɛ kwa rafete ŋkwa ŋkɛ. Ma ke David sha Mahwətə: «Nahe 'ya kemenete jaɗafa kewəbanyɛ kwa menete wəsə nya 'ya! Tsetsenya gɛ Mahwətə, kelemte ɗa jaɗafa shɛ te wənəa ŋa, kasəkwə ŋa 'ya, 'ya nde mene slene ta ŋa, kwa nza ŋkɛ slene gezhi yamenete 'ya.»

¹¹Ma feɗeghe David masheke ne, nahe ghena ta Mahwətə kese shɛ laka Gad, nde mɛ ŋkwa nya kande kelɛŋə David, ma ke:

¹²«Kwiɗi geze nda ke David: Wa nya ghena nya geze Mahwətə nya: ‹Kageze ŋa wəshi 'ya mahekene. Ntave kwetɛŋe, katemene 'ya kezha gha.›»

¹³Pa Gad lə sha David, ma ke gezete nda: «Wa yaɗe na kamene ŋa geva wa? Ma kamene geva te hɛɗia ŋa kava mberefaŋe yaɗe na na, na tere mahekene te gamba kahwɛ va ka jaga ta ŋa kakeka ŋa hɛ na, na hɛ mahekene ba te hɛɗia ŋa na? Tsetsenya zəzəve ghena ba'a gezete ghena nya lə kazhɛne nda ke wəndə nya keghwenakɛ ɗa.»

¹⁴Ma ke David sha Gad: «Mbe yaka nya wəba 'ya! Ganyɛ ma teɗe 'ya kadzembe dzeve ta Mahwətə kenya teteɗe 'ya kadzembe dzeve ta mbeli va nya nza ŋkɛ kwele kwele zhɛ helia ŋkɛ.»

¹⁵Pa Mahwətə kekele ba kadzete ka Israyɛl, masheke pa te və nya kedzeghete geva. Slə mbe Dan pa mbe Bɛrshɛba, na mbeli kempə 70.000.

¹⁶Ma kwa hate dzeve nde ghwene ta Mahwətə nya katebeze Zhɛrəzalɛm ne, pa Mahwətə zhɛremte zəzə ta ŋkɛ va ɗa nya teɗa ŋkɛ. Ma ke sha nde ghwene nya keteza sebe te mbeli: «Wərə! Ghereŋete tsetsenya.» Terasle nde ghwene ta Mahwətə yitea lane ta nde Zhɛbəs Aravna.

¹⁷Ma kwa nakɛ nde ghwene ta Shala nya keza ŋkwa David hwa mbeli, ma ke sha Mahwətə: «'Ya nde bezemte ghena! 'Ya nde menete jaɗafa. Ama mbeli nyi ne, wa yamenete hɛ wa? 'Ya yahi na kaɗa ba'a mbelia ɗa, kampi ŋa dzeve 'ya!»

¹⁸Ma te vecia shɛ ne, pa Gad se sha David, ma ke: «Dzeme pate nda reghwetɛ ke Mahwətə pelɛ te lane ta Aravna, nde Zhɛbəs.»

¹⁹Pa David dzeme kala nya gezete Gad, kala nya gezave nda Mahwətə.

²⁰Pelɛ ghəa ŋkwa Aravna, pa ŋkɛ nakɛ meghe kase shɛ le mbelia ŋkɛ. Pa Aravna shave kagwəɗəŋə kwa kema ta meghe, ntiŋə ghə mbe hɛɗi.

²¹Ma ke Aravna shɛ: «Meghe yitea wa se na sha nde mene slene ta ŋa wa?» Ma ke meghe shɛ: «Kezha pave ŋa ŋkwa nya yitea pa nda reghwetɛ ke Mahwətə te, nda nza ba nya kempə ŋkwa nya kakiɗi.»

²²Ma ke Aravna sha David: «Maze yawe, nde sleke ɗa, kelete dzeghekɛ nda melɛ te ke Mahwətə kala nya kehi sha gha. Wa nyi sla ta ɗa nyi kezha melɛ kwa tere tere, wəmata gədəwə le sheghwə kejikə sla nyi kasheghwə kemeha ghwə.

²³A maze yawe, pɛtɛ ndeke ŋa 'ya! Pa Shala Mahwətə ta ŋa fate ŋa ŋa ŋa!»

²⁴Ma ke meghe shɛ: «Ewə, pa pa 'ya va gha kala səkəməa ŋkɛ. Kadzeghe nda melɛ 'ya ke Shala Mahwətə ta ɗa le wəsə gəmə we!» Pa David pave yɛ lane le sla nyighɛ te dəɓərəa mze kwa tɛawetɛa mcɛfemsə.

²⁵Pa David pate nda reghwetɛ ke Mahwətə. Pa ŋkɛ dzeghekɛ melɛ kejikə ghə. Pa Mahwətə ncɛte nda ganyɛa ŋkɛ ke hɛɗi ba'a pa ndiremi nya wəba nya kempə ka Israyɛl kiɗinyɛ.