Read KapsikiDC 2 Saməyɛl 3 Bible Online

2 Saməyɛl 3 - KapsikiDC bible

2 Saməyɛl 3

¹Nahe mpa ketemə kwele kwele kwelɛ yita ta Sawəl le yita ta David. Ma kazhɛre David berete ma ne, kadene berete ta ŋwalea Sawəl ɓɛhwɛ ɓɛhwɛ.

²Kwa Hɛbron ne, kwele kwele yake ŋwale tezhili David. Pa yake Amnon, nde ghate ta wəzege ta ŋkɛ sawa hwa Ahinowam, wəzha ta ka Zhizrɛyɛl.

³Kilab ya kakwa bake, sawa hwa Abigayil, male wedea Nabal nya kande Karmɛl. Absalom, kande maheke, sawa hwa Ma'aka, wəzha ta Talmay, mazea ka Gɛshəwr.

⁴Adoniya ya kande wəfaɗe, sawa hwa Hagite sawa ŋkɛ. Shefatiya ya kande mcɛfe, sawa hwa Abital ŋkɛ.

⁵Itrɛyam ya kande ŋkwaŋe, sawa hwa Ɛgla sawa ŋkɛ, ghenta perə ne, male ta meghe nde. Nyi ya kaŋwalea David nyi keya mbe Hɛbron.

⁶Ma kwa temə mpa kwelɛ mbelia Sawəl le mbelia David ne, pa Abnɛr ghwəɗə ghwəɗəyi meghea ŋkɛ mbe hwa mbelia Sawəl.

⁷Pa Sawəl kelete kwete male kwatera, sləa nta Rispa, wəzha ta Aya. Te ghena ta nta ne, ma ke Ishebal sha Abnɛr te kwete hɛ: «Wa raberə nda ɓelahe na le male ta yiteyɛ ɗa wa?»

⁸Ma kwa fate ghena nya Abnɛr ne, kwele kwele zhɛ nda wənəa ŋkɛ, ma ke: «Kelɛ 'ya nya keveyi geva kezha mbelia Zhəwda na? Pa tsetsenya 'ya kancɛ ɗe ta ɗa kaɗe mbelia meghe Sawəl yiteyɛ ŋa, kezha ka kesaka meghekɛ le yɛ ka mcɛhɛnyɛ, pɛtɛ menete ntsehwele 'ya ya shɛ na kateɗe kadzembe dzeve ta David, ma ɓeshi ne, kaŋele ɗa na te ghə male nya!

⁹Pa Shala menete ɗa wəsə kwa ndiremi kamtsehete ɗa zhɛkwa keɗema 'ya kamene nda ke David kala nya meɗeyi nda Mahwətə.

¹⁰Kwa nza ŋkɛ na kemeɗeyi kezha kelemte meghe shave ki ghɛa Sawəl, kezha mene meghe David te ka Israyɛl tsagha te ka Zhəwda, slə mbe Dan hwa'a mbe Bɛrshɛba.»

¹¹Shaŋe Ishebal kazhɛne nda ghena kwa nza ŋkɛ kaghazlənə ve.

¹²Ma tagha ne, pa Abnɛr ghwenakɛ nda mɛ ke David kageze shɛ: «Ŋa wa hɛɗi nya wa? Menete ɓə jikə geva, kezha kemane ŋa 'ya katsene pɛtɛa ka Israyɛl kwa sebe ta ŋa.»

¹³Ma ke David shɛ: «Tsagha ɗe 'ya kamene jikə geva na le 'ya. Ka'yɛwe kwete 'ya hwa wəsə ya kwetɛŋe va gha we: Mba na kese kasləyi ɗa keɗema na kekeleke ɗa male ta ɗa Mikal wəzha ta Sawəl. Ma tsagha nda nza na kashɛ se kadzawa kema ta ɗa.»

¹⁴Pa David ghwenakɛ mɛ kageze nda ke Ishebal, wəzege ta Sawəl: «Ndeke ɗa male ta ɗa Mikal nya wəmekɛ 'ya le mɓɛta ta ka Filisti gwəmsə.»

¹⁵Pa Ishebal keseke Mikal ki ghɛa za nta Paltiyɛl ɓiyitsa, wəzege ta Layish.

¹⁶Pa Paltiyɛl kabeghe. Kadzeghwa ŋkɛ kwa sebe ta nta le nehwene hwa'a mbe Bahəwrim, tsagha ne, pa Abnɛr gezete nda kazhɛne geva ŋkɛ kalə sha ghɛa ŋkɛ, pa yɛte.

¹⁷Pa Abnɛr gezehwe ghena le mbelia jama ta ka Israyɛl, ma ke hɛ shɛ: «Ɓəshi ɓeshi yɛ kaɗe David kanza kamazea ŋayɛ we.

¹⁸Yawa, və kemene ta ŋayɛ nya tsetsenya! Kwa nza nde nahe Mahwətə kegezete ghena te David: ‹Laka nde mene slene ta ɗa David tembele ka Israyɛl 'ya, mbelia ɗa nyi sleke ka Filisti ba'a va kweci ka ghema ta nci pɛtɛ.›»

¹⁹Pa Abnɛr gezehwe ghena le ka Bɛnjamɛn perə. Cape kadzembe Hɛbron le ghəa ŋkɛ kezha ncɛ nda ghena nya yɛhwe mbelia Bɛnjamɛn ba'a kweci ka Israyɛl.

²⁰Hwa'a ŋkɛ sha David kwa Hɛbron, hɛ le mbeli bakemsə. Pa David sha wəshi kezeme kwele kwele va hɛ.

²¹Ma ke Abnɛr sha David: «Mazea ɗa, 'ya kaslə katetsene pɛtɛa ka Israyɛl yitea gha. Tsagha ne, pa hɛ kamene jikə geva le gha, wərə na kamene meghe te hɛɗi pɛtɛ kala nya zəzə na.» Pa David ndeke nda hweŋkwa ke Abnɛr kalə, pa slə le kwelɛŋe.

²²Temə ɓɛhwɛ ne, pɛkwe yɛ Zhowab le mbeli nyi keya David. Sheke kwamte mpa le wəshi kwele kwele nyi fəke hɛ hwa mpa. Mba Abnɛr kwa ghɛa David kwa Hɛbron we, kwa nza ŋkɛ na maze kesərəakɛ kaslə le kwelɛŋe.

²³Ma kwa sheke Zhowab kwamte mpa le ka sewajɛ nyi nza ŋkɛ le hɛ, ma ke mbeli gezete nda ghena: «Teke se Abnɛr, wəzege ta Nɛr, sha meghe, pa sərəakɛ ŋkɛ kaslə le kwelɛŋe.»

²⁴Hwa'a Zhowab sha meghe, ma ke shɛ: «Wa nya wəsə menete na wa? Nahe Abnɛr kese sha gha, wa raberə pelakɛ ŋkɛ na kaslə kala nya wa?

²⁵Nahe na keɗepe Abnɛr megela, wəzege ta Nɛr! Kezha ghwete ŋa se ŋkɛ, kezha ɗepete hɛɗia ŋa ba'a le wəsə nya mene na.»

²⁶Ma kwa shave Zhowab ki ghɛa maze ne, le ghena kekese Abnɛr mbe ghə, keɗepe David we, pa keleke kwa wəsə kala weta ta ka Sira.

²⁷Ma kwa zhɛneghe geva Abnɛr kadzawa Hɛbron, pa Zhowab hekate kashave kwa mɛa degha ta meleme, kala wəndə nya keɗe kageze nda ghena nya tewəfərə. Tɛapa'a ŋkɛ sha hwa te hwə ve kawa mte ta wəza meghekɛ Asayɛl.

²⁸Ma kwa fate wəsə nya kemenete geva David ne, kɛake sha lewela: «Nahe Mahwətə keɗepe kaɗema fete va 'ya le mbeli nyi te hɛɗia ɗa hwa mte ta Abnɛr, wəzege ta Nɛr.

²⁹Deke kənəa Zhowab ba'a mbelia ghɛa ŋkɛ dzeghə ghena ta ŋkɛ! Pa beze kanza ki ghɛa shɛ kaghala ghala, zhili ka wale wale, ka derena, mbeli nyi dewə wəshi va hɛ, zhili nyi kemene slene ta mi, zhili nyi mpə hɛ mbeli le kafayɛ, ka dewə wəsə kezeme!»

³⁰Tsetse peslekɛ Abnɛr yɛ Zhowab le wəza meghekɛ Abishay va nya peslekɛ wəza megheyɛa nci Asayɛl ŋkɛ hwa mpa nya kwa Gabawon.

³¹Ma ke David sha Zhowab le yɛ mbeli nyi nza hɛ pɛtɛ: «Ŋkweŋkwahemte mə lekwesa ta ŋayɛ, seɗete mə nyi wale wale nda se yɛ yitea nehwene ta Abnɛr kave zləvə te.» David meghe le ghəa ŋkɛ ne, kadzeghwa ŋkɛ kwa sebe ta wəndə kemte mte.

³²Pa mbeli lamte Abnɛr kwa Hɛbron. Ntake meghe kanehwene te kwele ta ŋkɛ, ca pɛtɛ mbeli kanehwene.

³³Kwa sebe, ma ke meghe ŋgaɗete ghə te ghəa Abnɛr: Abnɛr, wa raberə mte ŋa na, kala mte wəndə nya ɗema mehele ve wa?

³⁴Kenza dzeve ta ŋa tehwepe we, zewe lɛ kwa seɗa we. Ya tsagha shɛ ŋkɛ tehwepərə na kemte mte kala nya teɗe wəndə te kema ta ka mpə ŋkwa. Pɛtɛa mbeli nyi tagha kanehwene.

³⁵Ma kwa sebe ta ŋkɛ ne, pa mbeli hendeke nda geva ke David kave nda wəsə kezeme kwa nza ŋkwa mba heveci. Ma ke zemete fela: «Pa Shala ɗate ɗa kwele kwele kendɛamakɛ ɗafa 'ya, ya yayata wəsə ŋkɛ nda tepəkwə veci!»

³⁶Pɛtɛa mbeli keɗepete ba'a keyɛte nda ŋa meghe. Bandanyɛ ne, na mbeli kenakɛ megela wəshi nyi mene maze pɛtɛ.

³⁷Tsetse se ŋkɛ nda ɗepete mbeli nyi te hɛɗia Zhəwda le yɛ ŋa ka Israyɛl te vecia shɛ ashɛ meghe nde ndeke nda hweŋkwa kepesle Abnɛr, wəzege ta Nɛr we.

³⁸Ma ke maze sha ka mene slene ta ŋkɛ: «Nahe yɛ keɗepete tse ɓeshi ne, meghe zake, meghea ka Israyɛl nya wəba nde mte na?

³⁹'Ya le ghəa ɗa ya tsema nza 'ya kamaze ne, kafefa dewə berete ta ɗa 'ya va berete nya menete nya mbeli nyi, ŋwalea male nya heka mbeli kaSerəwya. Pa Mahwətə le ghəa ŋkɛ ɗate mbeli nyi kempəmte ŋkwa nyi.»