Read KapsikiDC 2 Saməyɛl 6 Bible Online

2 Saməyɛl 6 - KapsikiDC bible

2 Saməyɛl 6

¹Pa David tsenete ka sewajɛa ka Israyɛl nyi keɗepe mpa 30.000.

²Kabeghe ŋkɛ ka sewajɛ nyighɛ kadzeme Ba'ala, te hɛɗia Zhəwda, kezha kele səndəkwəa Shala nya nza sləa Mahwətə te, Shala nde berete, nya kenza kənəa ka ghwene ta ŋkɛ.

³Pelɛ ghɛa Abinadab ŋkɛ pelɛ wəmbəa ŋkwa. Pa mbeli veyi ŋkɛ kwa wəmata gədəwə mɛnɛfɛ ba'a keleke ŋkɛ. Əwza hɛ le Ahiyo wəzege ta Abinadab nya kezleɗe wəmata shɛ.

⁴Pa mbeli kelete shave ki ghɛa Aminadab nya pelɛ wəmbəa ŋkwa. Kadzeghwa Ahiyo te kema ta səndəkwəa Shala.

⁵David le ka Israyɛl ne, pɛtɛ hɛ kazlama kwa kema ta Mahwətə le pɛtɛa wəshi ketsa pɛtɛ nyi feɗete mbeli yitea sheghwəa vɛ: yɛ gagera, yɛ getsepele, yɛ dɛŋwə, yɛ ŋwe ba'a yɛ ciŋəci.

⁶Ma kwa ntsehe hɛ takwa yitea ghɛa Nakon ne, mbasa mbasa yɛ sla keteɗe le Səndəkwəa Shala. Pa Əwza hate dzeve kezha tawe ŋkɛ.

⁷Pa Mahwətə hwepete wənə ve, va wəsə nya menete ŋkɛ kaɗema kezəzəte. Pa Əwza mtenyɛ te ŋkwa shɛnyɛ vare səndəkwə.

⁸Pa wənəa David zhɛte nda va nya peslekɛ Əwza Mahwətə. Pa hekate nda slə ke ŋkwa shɛ kaPɛrɛs-Əwza. Tsagha heka ŋkwa shɛ mbeli pa ɓeshi.

⁹Pa David ghazlənənyɛ va Mahwətə, ma ke: «Kashɛ 'ya ve Səndəkwəa Mahwətə ki ghɛa ɗa we!»

¹⁰Pa ɗema kele Səndəkwəa Mahwətə kadzeki ghɛa ŋkɛ mbe meleme ta ŋkɛ, ama pa veyi ki ghɛa Obɛd-Ɛdom, nde meleme ta ka Gat.

¹¹Tere mahekene menete Səndəkwəa Mahwətə ki ghɛa Obɛd-Ɛdom, pa Mahwətə wəpikɛ le mbelia ŋkɛ pɛtɛ.

¹²Pa mbeli gezete nda ke maze David, na Mahwətə kewəpikɛ ghɛa Obɛd-Ɛdom le wəshi nyi ve pɛtɛ va nya nza Səndəkwəa Shala ki ghɛa ŋkɛ. Pa David lə kakele Səndəkwə shave ki ghɛa Obɛd-Ɛdom kase kadzembe meleme ta David te tepe ta mbeli nyi kekele le zlama.

¹³Ma kwa dzeghwate dzeghwa mbeli nyi kekele səndəkwəa Mahwətə kazewaŋe ta seɗa ŋkwaŋe ne, pa mbeli dzeghekɛ melɛ le mca ba'a le leve nya nɛɓe nɛɓe.

¹⁴Ntake David kawetse le berete ta ŋkɛ pɛtɛ kwa kema ta Mahwətə, deke lekwesa pawa ganyɛ ta ka dzeghe Shala ya kənə.

¹⁵Pa yɛ David le ka Israyɛl keleghe səndəkwəa Mahwətə le zlewezla ba'a vɛ ta yɛ kwelɛghə.

¹⁶Ma kase səndəkwəa Mahwətə kadzembe meleme ta David ne, Mikal, wəzha ta Sawəl, kanewe ŋkwa sawa te wəfela ta cɛ, pa nakɛ meghe David kawetse ba'a kazhɛre geva te kema ta səndəkwə. Pa ɗema ghena ta ŋkɛ kwele kwele kwa wənə nta.

¹⁷Pa mbeli veyi səndəkwə te ŋkwa nya hite nda mbeli, mbe cɛ lekwesa nya menete nda David. Pa ŋkɛ dzeghekɛ melɛ kwa tere tere ba'a melɛ kejikə ghə kwa kema ta Mahwətə.

¹⁸Ma kwa menemte ŋkɛ pɛtɛ ne, pa wəpikɛ mbeli te sləa Mahwətə, Shala nde berete.

¹⁹Pa geze nda ke mbeli kanehave nda wəshi kezeme ke pɛtɛa ka Israyɛl. Yayata wəndə za le male kekemave ɗafa, tsagha gatewe ya ta peha, ba'a ŋa rɛzɛŋe kwa ghwele ghwele kwete kwete. Kwa sebe ta ŋkɛ yayata wəndə kalə sha ghɛa ŋkɛ.

²⁰Ma kwa lə David kanjiŋwe mbelia ŋkɛ ne, pa Mikal shave kabegeme le, ma ke shɛ: «Wa nya zləvə te meghea ka Israyɛl ɓeshi kwa se ŋkɛ medəghərəkə kwa kema ta ka kwaterashia ka mavashia ŋkɛ ba'a kwa zhɛrete ghəa ŋkɛ ŋkɛ kala wəndə nya ɗema zləvə te gɛ!»

²¹Ma ke David shɛ: «Kezha zləvəa Mahwətə nya kentave ɗa ba'a nya keɗehwe ɗa sərə yiteyɛ ŋa le mbelia ŋkɛ, nya keveyi ɗa kameghea ka Israyɛl mbelia ŋkɛ. Katencɛ zlama ta ɗa 'ya zhɛkwa kazləvəa ŋkɛ.

²²Kazhɛre ghəa ɗa 'ya kawəndə nya ɓɛhwɛ, kashifə ghəa ɗa le ghəa ɗa 'ya za ma ke nya, nda nza 'ya kakemave zləvə va ka kwaterashi nyi geze nyi na.»

²³Mikal, wəzha ta Sawəl ne, keyake wəzege pa te mte ta nta we.