Read KapsikiDC 1 Ka Meghea Kɛfi 1 Bible Online

1 Ka Meghea Kɛfi 1 - KapsikiDC bible

1 Ka Meghea Kɛfi 1

¹Nahe meghe David halenyɛ təwə təwə. Kanza geva ta ŋkɛ ɓete ɓete ya mbeli zaɗaghe nda lekwesa kwele kwele kənəa geva we.

²Ma ke mbeli nyi yite shɛ ɓiyitsa: «Meghe, lə n'yɛ sepake ŋa degheli kezha mene ŋa slene kala male ta ŋa nda ɓelahe nde vare gha yitea nza na ɓete ɓete!»

³Cape hɛ kasepa degheli nya ganyɛ mbe hɛɗia pɛtɛa ka Israyɛl. Pa hɛ sepate mbe Shəwnɛm. Zlahe ndeɗea nta, Abishag sləa nta. Pa mbeli keleghe nda ke meghe. Cape nde kamene nda slene ke meghe kanewe ghweme te, ama kegha kase le meghe we.

⁴

⁵Ma te vəa shɛ ne, ma ke Adoniya nya kawəzege nya ndeɗe tsape, nya yake yɛ David le Hagite fegete fege kwa kema ta mbeli, ma ke: «'Ya nde tenza kameghe!» Kadzeghəa Absalom yake ŋkɛ mbeli. Nahe ŋkɛ kesepave wəmata gədəwə kwele kwele ba'a gədəwəa lɛmə, tsagha wəvəsəa mbeli mcɛfemsə nyi kedzeghwa te kema va wəmata ta ŋkɛ. Ndagwara kegha yitenyɛ kafɛa ŋkɛ yitea wəsə ghalanza ke'yɛwe ŋkɛ ve ba'a kageze yitea wa yitea wa mene ŋkɛ tsagha we.

⁶

⁷Pa yɛ Adoniya ntsəɓəte mɛ le meghea ka sewajɛ nya kwele, Zhowab nya nza sləa meghekɛ kaSerəwya, ba'a le nde dzeghe Shala Abiyatar, pa hɛ yɛte kakemane.

⁸Ama yɛ Sadok nya kande dzeghe Shala, le Benaya wəzege ta Yoyada, le nde mɛ ŋkwa ta Shala Natan, Shimɛyi, Rɛyi ba'a ka sewajɛ nyi keya David ne, kese hɛ kadzehwa ghena ta Adoniya we.

⁹Ma te kwete veci ne, pa Adoniya menete gəsəkə kewəbanyɛ kwa gela ta Zohɛlɛt, dekwede yitea Ɛn-Rogəwɛl, pa dzeghekɛ melɛ le timɛti, le sla ba'a le kweci wəshi keseɗa nyi hɛnɛhɛa hɛnɛhɛa. Pa ŋkɛ hekakɛ kweci ŋwalea meghe David, ka kesaka yitenyɛ ba'a mbeli pɛtɛ ganji nyi te hɛɗia Zhəwda nyi kese kamene nda slene ke meghe.

¹⁰Ama kese kaheka nde mɛ ŋkwa ta Shala Natan, le Benaya, le ka sewajɛ nyi keya meghe, ba'a wəza meghekɛ Salomon we.

¹¹Ma ke Natan ɓiyitsa sha Bacɛba meghekɛa Salomon: «Nahe na kefate nahe Adoniya, wəzege ta Hagite kedzete meghe te nza ta wəshi nyi mene ŋkɛ, kaɗema meghe David keɗepe kwete hwe tse yi?

¹²Tsetsenya ne, 'ya katencɛ ŋa ntsehwele keyɛte na, kezha mbelemte mpia ŋa na le mpia wəzege ta ŋa Salomon.

¹³Kwiɗi sha meghe David shɛ na gezete nda ghena nya: ‹Maze nya kwele nya kesleke ɗa, nahe na kemeɗeyi ɗa kala fela 'ya nya kakwatera ta ŋa: Wəzege ta ŋa Salomon nde kele meghea ɗa kwetere wəmbəa ɗa, gheŋkɛ nde tenza pelɛ pasla ta ɗa, a pa. Yitea wa kelehwe meghe Adoniya tsagha wa?›, a pa shɛ.»

¹⁴Ma ke Natan zhɛkwa: «Ma mba na kakeɗaŋe ghena nyighɛ le meghe ne, katepɛkwe 'ya kezha geze nda kaganda ghena nya gezete nya na.»

¹⁵Cape Bacɛba kalə sha meghe mba ŋkɛ mbe cɛa ŋkɛ, kwa nza ŋkɛ kehale hale. Tagha Abishag, wəzha ta ka Shəwnɛm kənə kamene nda slene.

¹⁶Gwəɗəŋə Bacɛba mbe kema ta ŋkɛ, pa ŋame ghə mbe hɛɗi. Ma ke meghe shɛ: «Wa yaɗe na wa?»

¹⁷Ma ke shɛ: «Nde sleke ɗa, nahe na kemeɗeyi ɗa, 'ya nya kakwatera ta ŋa le sləa Mahwətə ta ŋa: ‹Wəzege ta ŋa Salomon nde tekele meghea ɗa, gheŋkɛ nde tenza pelɛ pasla ta ɗa›, a pa.

¹⁸Ama tsetsenya, nahe Adoniya kezhɛrenyɛ kameghe kaɗema na keɗepe kwete hwe.

¹⁹Nahe ŋkɛ kemenete gəsəkə nya wəba. Nahe ŋkɛ kedzeghekɛ melɛ le yɛ sla, le timɛti le kweci wəshi keseɗa nyi hɛnɛhɛa hɛnɛhɛa, na kehekakɛ ŋwalea ŋa pɛtɛ zlaɓe le nde dzeghe Shala Abiyatar ba'a wəndə kwelea ka sewajɛ Zhowab, ama kese kaheka wəzege ta ŋa Salomon we.

²⁰Tsetsenya tse gɛ meghe, pɛtɛ ka Israyɛl kevate ntsə te gha kaneghe kezha gezete sləa wəndə nya ketenza kameghe na fate fate te ŋkwa ŋa.

²¹Ma keɗema tsagha, keɗema na teke ne, katezhɛre wəzege ta ɗa Salomon mbeli le 'ya kaka beze ghena.»

²²Ma te və nya keɗaŋe geze ghena yɛ Bacɛba le meghe ne, pa nde mɛ ŋkwa Natan se kadzeki ghɛ meghe.

²³Pa mbeli gezete nda se ta ŋkɛ ke meghe, cape Natan kadzeyi shɛ, gwəɗəŋə ŋkɛ mbe kema ta meghe le kema mbe hɛɗi.

²⁴Kwetere wəmbəa ŋkɛ, ma ke gezete nda: «Maze nya kesleke ɗa, ma pa na gezete: ‹Adoniya nde tenza kameghe kwetere wəmbəa ɗa, gheŋkɛ nde kele ŋkwa kentishɛ pelɛ pasla ta ɗa›, a pa na?

²⁵Va nya nza nde nahe Adoniya kedzawa Ɛn-Rogəwɛl ɓeshi kamene gəsəkə nya wəba, na kedzeghekɛ melɛ le wəshi keseɗa kwele kwele, yɛ sla le yɛ leve nyi hɛnɛhɛa hɛnɛhɛa le timɛti. Nahe ŋkɛ kehekate ŋwalea ŋa yite, tsagha mbeli nyi te ghəa ka sewajɛ ba'a nde dzeghe Shala Abiyatar. Pɛtɛ mbeli nyighɛ kazeme wəshi ba'a kasa wəsə jikə le, ma ke hɛ sha lewela: ‹Ŋa ŋa hɛɗia ŋa meghe Adoniya!›

²⁶Ama kese ŋkɛ kaheka nde dzeghe Shala Sadok le Benaya nya kawəzege ta Yoyada, le wəzege ta ŋa Salomon le 'ya le ghəa ɗa we.

²⁷Ma ke Natan mtsehete: Gha nde zəzəte fate fate kantave wəndə nya ketekele meghea ŋa kaɗema kageze n'yɛ ghen'yɛ ka mene slene ta ŋa nyi dɛŋe dɛŋe na?»

²⁸Ma ke meghe David ɓiyitsa: «Hekakɛ ɗa mə Bacɛba!» Pɛkwe nde mbe kema ta meghe zhɛkwa.

²⁹Ma ke meghe zemete nda fela: «Laka Mahwətə nya teghweme le ntsə, nya kembelemte ɗa shave mbe yaka ne,

³⁰kazeme ŋa 'ya kafela, kateyipə ghena nya gezete ŋa 'ya mbe kema ta Shala Mahwətə ta ka Israyɛl kwa, kala nya meɗeyi ŋa 'ya: ‹Wəzege ta ŋa Salomon nde tenza kameghe kwetere wəmbəa ɗa kanza pelɛ pasla ta ɗa, a 'ya sha gha.›»

³¹Gwəɗəŋə Bacɛba mbe kema ta meghe le kema mbe hɛɗi, ma ke shɛ: «Ŋa ŋa hɛɗia ŋa kaghala ghala, maze David!»

³²Kwetere wəmbəa ŋkɛ, ma ke meghe David: «Hekakɛ ɗa mə yɛ nde dzeghe Shala Sadok le nde mɛ ŋkwa ta Shala Natan ba'a Benaya wəzege ta Yoyada!» Pa mbeli hekakɛ nda hɛ.

³³Ma ke sha hɛ: «Tsenete ɗa mə ka mene slene ta ɗa pɛtɛ le gheyɛ, pa yɛ veyi wəzege ta ɗa Salomon pelɛ gədəwə kwara ta ɗa shɛ yɛ keleghe kadzawa ɗaslea Gihon.

³⁴Te ŋkwa shɛ ne, kateshike n'yi yɛ Sadok nde dzeghe Shala hɛ le nde mɛ ŋkwa ta Shala Natan kadzawa ghə ve kezha nza ŋkɛ kameghea ka Israyɛl. Ma gheyɛ le ŋa ŋayɛ, pa yɛ kavɛ kwelɛghə kageze: ‹Ŋa ŋa hɛɗia ŋa maze Salomon!› Pe yɛ.

³⁵Kwetere wəmbəa ŋkɛ, pa yɛ zhɛreke geva kadzembe meleme le dzeghwa kwa sebe ta ŋkɛ kezha se ŋkɛ kantishɛ pelɛ pasla ta ɗa. Gheŋkɛ nde tekele meghe kwetere wəmbəa ɗa kwa nza ŋkɛ gheŋkɛ yantave 'ya kanza kameghea ka Israyɛl ba'a ŋa ka Zhəwda.»

³⁶Pa Benaya zhɛnete nda ke meghe: «Megela gezete na maze! Shala Mahwətə le ghəa ŋkɛ nde gezete ghena laka mɛa meghe.

³⁷Pa Mahwətə nza le Salomon kala nya se ŋkɛ le gha ba'a pa mbakete zləvə te meghea ŋkɛ za ma ke ŋa ŋa!»

³⁸Cape yɛ nde dzeghe Shala Sadok le nde mɛ ŋkwa ta Shala Natan, le Benaya wəzege ta Yoyada zlaɓe le ka Krɛte ba'a ka Pɛlɛt ghenci nyi keya meghe, kalə sha Salomon. Pa hɛ veyi ŋkɛ pelɛ gədəwə kwara ta meghe David ba'a begheghe ŋkɛ kadzawa ɗaslea Gihon.

³⁹Nahe nde dzeghe Shala Sadok kekelete tereme mbe cɛ lekwesa ta Mahwətə, mpɛafe n'yi te, pa fikɛ Salomon le kezha nza kameghe, pa mbeli vɛte kwelɛghə, ntake mbeli pɛtɛ katsa kaka le geze: «Ŋa ŋa hɛɗia ŋa maze Salomon!»

⁴⁰Pa mbeli pɛtɛ zhɛneghe kadzeme meleme kwetere wəmbəa ŋkɛ. Kavɛ shela mbeli ba'a kancɛ zlama nya wəba mbeli. Kagaŋkəɗə hɛɗi va gaka ta nci.

⁴¹Pa yɛ Adoniya le mbelia ŋkɛ nyi hekate ŋkɛ fate gaka ta nci kwa slə hɛ kənəa wəsə kezeme, pa Zhowab fate gaka ta kwelɛghə, ntake kageze: «Yitea wa gaka wəshi nyi mbe meleme wa?»

⁴²Mbanyɛ ŋkɛ kageze ghena, pɛkwe Yonatan wəzege ta nde dzeghe Shala Abiyatar. Ma ke Adoniya shɛ: «Nde, wəndə nya nza na zləvə te, ma zəzə 'ya ne, le ghena ganyɛ va gha kageze.»

⁴³Ma ke Zhonatan zhɛnete: «Ewə, ghena ganyɛ shɛ we! Nahe maze David keveyi Salomon kameghe!

⁴⁴Nahe meghe keghweneghe yɛ nde dzeghe Shala Sadok, le Natan nde mɛ ŋkwa ta Shala, le Benaya wəzege ta Yoyada zlaɓe le ka Krɛte ba'a ka Pɛlɛt ghenci ka keleghe kadzeme gədəwə kwara ta meghe.

⁴⁵Kwetere wəmbəa ŋkɛ, pa yɛ nde dzeghe Shala Sadok le nde mɛ ŋkwa Natan veyi ŋkɛ kameghe kwa Gihon ba'a samenji le zlama, vatse nza meleme viɗi va zlama. Gheŋkɛ wəsə nya fa yɛ kagaka.

⁴⁶Ɓiyitsa, pa Salomon ntishɛnyɛ pelɛ pasla meghe,

⁴⁷kwetere wəmbəa nyagha, pɛkwe mbeli nyi yitea meghe katsahe meghe David, ma ke hɛ: ‹Pa Shala vate zləvə te sləa Salomon kwele ma ke ŋa ŋa ba'a pa veyi zləvə te meghea ŋkɛ kwele ma ke ŋa ŋa›. Nahe meghe kese kaŋa ghə kahawe ve kwa nza ŋkɛ te ŋkwa keɓelahea ŋkɛ.

⁴⁸Nahe ŋkɛ kegezete ɓiyitsa: ‹Katsa nda ŋ'wese 'ya ke Shala Mahwətə ta ka Israyɛl nya kendeke ɗa wəndə nya kekele slene ta ɗa ɓeshi ba'a kwa ndeke ɗa hweŋkwa ŋkɛ kezha nakɛ wəshi nyi kemene geva nyi 'ya.›»

⁴⁹Ntake pɛtɛa ka mentiɓəa slia Adoniya kabare bare va ghena nyighɛ, pelɛhetɛme hɛ, kweracɛ hɛ dzeghwanji, yayata wəndə kakele ŋa ŋkɛ hweŋkwa.

⁵⁰Pa ghazlənə zhɛte nda ke Adoniya va Salomon, pa ŋkɛ lə kawəfərənyɛ yitea reghwetɛ kedzeghe melɛ.

⁵¹Ma ke mbeli gezete nda ke Salomon: «Kwele kwele ghazlənənyɛ Adoniya va gha, vatse wəfərənyɛ ŋkɛ vare reghwetɛ. Tagha ne, ma ke gezete: ‹Ma nda nza 'ya kaslə te ŋkwa nya ne, nda meghe Salomon kameɗeyi ɗa kezha ɗema kapesle ɗa.›»

⁵²Ma ke Salomon: «Ma kenza nde kawəndə nya tiɗiɗi ŋkɛ ne, kakwaɗe 'ya ya ci'a ŋkɛ we, ama kebezemte ghena ŋkɛ ne, katemte ŋkɛ.»

⁵³Pa maze Salomon ghwenakɛ ŋkwa kezha slə ŋkɛ yitea reghwetɛ. Pa ŋkɛ sawa kaŋa ghə kwa kema ta meghe Salomon, ma ke Salomon gezete nda: «Kwiɗi sha ghɛa ŋa.»